Том 12 (XVI век, литература «обобщающих предприятий»)

Глава 12. Начало о святем Владимире, иже бысть 4 степень от Рюрика, благочестию 1. Время уже настоит воспомянути о сем преславном Владимире, — како преже, еллинскимъ обычаемъ последуя,[894]

в нечестии самодержствуя, и како последи и истиннаго Бога взыска и обрете, и како во благочестии самодержствуя и преспевая правоверием древле царствовавших во благочестии, такоже и процветший иже от чреслъ его многорасленый плодъ благословеный в род и род непреложнии исполнители бяху всему закону християнскому. И не зрим никтоже на первое нечестие и злострастное ко греху Владимирово рачение, но последними его иже к Богу и человекомъ благочестивыми делы уцеломудримся. Стремления бо его нечестивая и страстная сего ради явлена зде, да не впаднем в таковая, а иже впадшии и останем от согрешения, Владимирову подражающе исправлению и совершению благочестия.

Глава 13. О святей Олге. Сего великаго самодержца, святаго Владимира, преблаженная баба, великая княгиня Олга, предтеча руская к Богу, егда позна сущаго Бога, и благоверно живущи в Киеве граде; с нею же бяху трие внуцы ея, Ярополкъ, и Олег, и сий великий князь Владимир, Светославичи, ихже премудрая Олга любляше и снабдевати их всячески тщашеся. Аще же и хотяше крестити их, но невозможно бе, понеже сынъ ея Светослав непокорив бяше благочестивымъ словесем: много бо со слезами увещаваше его блаженная мати его, дабы веровал во Христа и крестил бы сея, и не послуша. Тогда бо сии рустии людие неверием одержими, и слово Божие яко уродство вменяшеся имъ. Дивная же Олга остави сие на воли Божии. Самъ бо тогда самодержец Светослав живяше в Переяславце на Дунаи;[895]

и тогда печенези, яко время си улучивше, нападоша на град Киев; и аще не бы Господь храняй Владимира, раба своего, хотящаго последи быти ему сосуда избраннаго, и молитвъ ради преподобныя Олги, вмале бы взят был Киев град. И посла Олга к сыну си, возвещая ему случшаяся. Он же вскоре прииде и целова матерь свою и чад своих, и прогна печенег, и бысть мир. При нем же, в лето 6475, блаженная Олга, мати его, с миром к Богу отиде, память добру, начало благочестия всем нам остави.

Глава 14. О позорной ловитве,[896]

и о братоубийстве, и о гиганте. По погребении же честнаго телеси блаженныя Олги, паки иде Светослав Игоревич в Переяславец на Дунаи, сына же своего Ярополка в себе место посади в Киеве, а другаго сына Олега в Деревех. Новогородцы же испросиша себе у Светослава сына его, сего великаго князя Владимира, и даде имъ. Он же иде с ними, и седе Владимир в Великом Новеграде.[897]

По смерти же Светославли воздвижеся братоубийственая крамола в Руси по образу древния злобы перваго Каинова братоубийства.[898]

Како же и откуду начася братоубийство в руских самодержателех? Начало же бяше таковыя братоненавистныя вражды от ловитвы животных. Гигантъ Невротъ.[899] Сия же ловы первее показа деяти и волшвения в первых родех некий гигантъ именемъ Неврот, создавый Вавилонъ град, иже бяше от племени проклятаго Хама. И таковою прелестию и до ныне тешахуся мнози властодержателие, не токмо нечестивии, но и благочестивии прелщахуся глумными утехами, внимающе поганским обычаем, любяще многообразныя позоры и глумления, и на песие брехание в ловитвах кличюще, и от всея силы кричаху беспрестани, елико можаху многоразличными козлогласовании, яко неистови. И сих ради бесовских коварствъ от властоначалствующих многажды приимаху скороминующее дарование и маловременную почесть, не богараднаго ради подвига, ни людския ради ползы. И вместо таковых худых прибытков от ловитвы мнози отщетишася не токмо многаго своего имения, но вкупе и живота своего, с ним же и душевнаго прибытка, и вместо веселия и жкогосладостныя утехи восприимаху с плачем горким и многоразличное уязвление и нелепотною смертию незапное животу применение, а по смерти вечное мучение. (...)

Глава 38. О крещении всея Русии. Потом же блаженный Владимир со отцем своим Михаилом митрополитом[900] и со благородными новопросвещенными чады своими, и со епископы и презвитеры, и з боляры и со всеми верующими в Господа нашего Исуса Христа бяху вкупе единодушно благодарствующе Бога, в молитвах и молениих и в воздержании пребывающе и подвизающеся, и совещевающе душеспасителное совещевание, еже проповедати слово Божие с трудолюбным потщанием всем людем, не токмо единем кияном, но и во всей Русстей земли, яко да вси отвратятся от идолския лсти и от грех очистятся и крещение да приимут во имя Отца и Сына и Святаго Духа. И со властию заповеда во всех градех всем быти християном, рабом и свободным, юным и старым, богатым и убогим, и во всех ясно и велегласно славитися Святей Троицы, непокоривых же и обетшавших во идолобесии и сих учителными словесы с любовию наказати, прочим же и страхом запрещати, дабы никтоже не прекословил слову Божию.