Том 12 (XVI век, литература «обобщающих предприятий»)

Сий Владимир — добляя благочестия ветвь! Сий Владимир — апостольский ревнитель! Сий Владимир — церковное утвержение! Сий Владимиръ — идольский раздрушитель! Сий Владимир — благоверия проповедник! Сий Владимир — царская похвала! Вся того правоверная исправления дивна! Того вся благочестивая проповедания красна! По истине рещи, аще и от нечестива родителя сицевым именемъ прозвася, всеже се Божия промысла действу последуя и въ лепоту Владимир наречеся, яко да владый миром и побежая супостаты, не токмо егда в нечестии пребывая, наипаче же последи, егда и во благочестии преспевая и владый миромъ и премирная наследова, и не токмо видимыя враги побежаше, но и невидимыя, и самого диявола и всяко нечестие потреби и правоверие укрепи. И тако во святомъ крещении сугубо и тезоименитство царскаго звания приобрете: Василие наречен бысть. «Василие» же по греческому языку глаголется, по рускому же языку толкуется «царь». Василий бо царское священие, царское же се и Божественое именование.

Глава 2. Владимир бысть сродник Августу Кесарю.

[875] Кто же и откуду и от коего сродствия бысть сий Божий избранный сосуд, сугубо царскоименитый самодержец, Владыческо и царско звание имея? Сий преименитый самодержавный царь и великий князь Владимиръ — сынъ пресловущаго во храбрости великого князя Светослава, внук самодержавнаго Игоря и достохвалныя в премудрости блаженныя и великия княгини Ольги, правнук Рюриков, первовладычествующаго в великом Новеграде и во всей Руской земли. Не худа же рода бяху и не незнаема, но паче — преименита и славна римскаго кесаря Августа, обладающаго всею вселенною и единоначальствующаго на земли во время перваго пришествия на землю Господа Бога и Спаса нашего Исуса Христа, иже егда нашего ради спасения изволи родитися от безневестныя и Пречистыя Приснодевы Мария. Сий кесар Август разреди вселенную братии своей и сродником. Прус. Емуже бяше присный брат именемъ Прус; и сему Прусу тогда поручено бысть властодержство в березех Вислы реки, град Мадборок, и Торун, и Хвойница, и пресловый Гданескъ, и ины многи грады по реку глаголемую Немон, впадшую в море, иже и до ныне зовется Пруская земля.[876] От сего же Пруса семени бяше вышереченный Рюрик и братия его; и егда еще живяху за моремъ, и тогда варяги именовахуся и из-за мория имаху дань на чюди, и на словенех, и на кривичех.[877]

Глава 3. Начало в Руси Рюрикова самодержства в Новеграде. В лета греческаго царя Михаила, царствующаго во Цареграде, и матери его Феодоры, сотворших правоверие о святых иконах,[878] еже и доныне церкви Божия празднует в первую неделю святаго и Великаго поста,

[879] ходиша русь на Царьград воевати.[880] В та же лета новгородцы и меря[881]

и кривичи изгнаша варяг за море и дани не начаша давати, и сами начаша владети собою. И бысть в них нестроение велие и межуусобное убийство. И паки, в лето 6370, послаша русь к варягом, зовуще их к себе, державьствовати Рускою землею.[882] И избрася вышереченный Рюрик, с ним же два брата его, Трувор и Синеус,[883] и приидоша из-за мория на Русь и с роды своими. И седе Рюрик в Новегороде, а Синеус на Белеозере, а Трувор во Изборце. И по двою лету Синеус умре, по том же и Трувор; и бысть Рюрик единодержец надо всею Рускою землею; державствова 17 лет. Новогородцы же, видевше Рюриково доброродство и мужественое его остроумие, и яко пророчествоваху, глаголюще к себе: «Разумейте, братие, яко непременно имамы быти под единем игом державно обладаеми от сего Рюрика и от роду его; и не токмо упразднится ими самовластие наше, но и рабы им будем». Тогда бо Рюрик уби некоего храбра новогородца именемъ Вадима и иных многих новогородец, советников его.[884] Аще тогда и нечестиви бяху новогородцы, но обаче по проречению их, паче же благоволением Божиим, и доныне непременно царствуют ими от Рюрикова семени благородное изращение: якоже преже в нечестии повиновахуся им и до сего блаженнаго Владимира, наипаче же егда от святаго сего Владимира сподобишася познати сущаго Бога и просвещени быша святым крещением, и сияху благочестием, и неподвижно и неотступно веру Христову держаще, и непременно обладаеми Владимировыми благодарными чады и внучаты и в роды и роды.