Том 12 (XVI век, литература «обобщающих предприятий»)

Глава 3. Начало Владимерскаго самодержства. И уже тогда киевстии велицыи князи подручни бяху владимерскимъ самодерьжцем. Во гради бо Владимери тогда началство утвержашеся пришествием чюдотворнаго образа Богоматери,[1012] с нимже прииде из Вышеграда великий князь Андрей Георгиевич и державствова.

Глава 4. О пребывании во Цариграде триех Георгиевичев и с материю.[1013] И той, аще многу добродетел стяжав к Богу, но, обаче, побеждашеся властолюбием, единодержател быти желаше всему оттеческому наследию в Рустей земли. И не токмо присную свою братию изгнати начинаше, но и дву Ростиславичев, сынов своих и прежних мужей отца своего изгна. И тоя ради вины и иных ради многих мятеж и нестроения уклонишася Георгиевичи, Мстислав и Василко, отеческия державы и от всего своего сродствия, изыдоша в чюжие земли царствие. Пояша же с собою и сего богохранимаго великаго князя Всеволода, детска суща, яко лет четырех, и с материю своею великою княгинею. И приидоша в Царьград и тамо от греческаго царя радостно приемлемы бывают и любочестно учрежаеми; и четыре грады, иже по Дунаю, и прочая власти во одержание приемлют, идеже доволству своему всяку потребу исполняху. И тамо неколико время пребываше, паки возвратишася в земьлю свою.

По Андрее же Боголюбьском приемник бысть державы его брат его Михалко Георгиевич, пришедъ ис преславнаго града Москвы, и отмсти кров брата своего Андрея.[1014]

Сам же лето едино державствова и к Богу отиде.

Глава 5. Самодержавство великого князя Всеволода[1015] Георгиевича во граде Владимере. Тогда же великий богохранимый князь Всеволод Георгиевичь господьствуя в Переславли,

[1016] отнюду же владимерстии людие многим желанием призваша его Владимер; и достодолжным любочестием сретоша его. И тако надо всеми владомыми в Рустей земли бысть един всеми любим самодержец. Такоже и сам всех любя, токмо единех злодеев, дерзнувших пролияти неповинную кров брата его, великаго князя Андрея, и сих всех изыска и сугубой казни предаде, и всех обещников их. Самех же безумных Кучкович[1017] ухващая и в коробы пошивая, въ езере истопити повеле.

Глава 6. О явлении на воздусе церкви Владимерския и всего града. Князь же Мстислав Ростиславич Юрьевича[1018]

прииде из Великаго Новаграда, послушав ростовлян, и совокупи воинство, скоро грядый ко Владимерю, завистию властолюбия подвизаемъ на стрыя своего, сего богохранимаго самодержца Всеволода. Всеволод же изыде противу ему. Егда же бысть за Суждалем, и ту узре Всеволод и вси полцы его церковь Пречистыя Богоматери Владимерскую и весь град до основания яко на воздусе стоящ. Тако яви Богъ преславное знамение таковым чюдесным явлениемъ, хотящую свыше быти помощ и заступление самодержцу Всеволоду, понеже благосердъ сый и не хотяше брани, но многажды посылаше братаничю своему Мстиславу глаголя: «Вем, яко ростовляне подвигоша тя на мя. То довлеет ти Ростов во одержание, мне же — Владимеръ, идеже зван есмь. Суждаль буди обоим нам во общину до времени». Мстислав же нимало не внимаше о сих, отринув мирный завет, на брань устремляшеся. Глаголаху ему ростовляне, нелепая глаголюще: «Аще ты мируеши, мы же не тако».

Всеволод же прииде ко Юрьеву, и ту приспеша к нему переяславляне, и вси вкупе сущии с ним глаголаху ему: «Послушай словеси раб твоих, правдивый самодержателю! Се бо брату твоему Михалку еще несть десятаго дни, отнележе к Богу отиде, сыновец же ваш на кровопролитие готовится, — противу же благодеяния твоего главу твою улавляет. И сего ради дерзай, яко правды ради твоея явися тебе Пречистая Богородица за Суждалем». Богохранимый же Всеволод призва Бога на помощ и все упование возложи на Пречистую Богородицу, поиде противу ему. И сразившеся близ Юрева, и одоле Всеволод и прииде во град Владимер с великою победою, воздая велие благодарение Богу и Пречистой Богородицы. (...)

ПЕРЕВОД

ШЕСТАЯ СТУПЕНЬ, И ЧЕТЫРЕ МИТРОПОЛИТА, ФЕОДОР, ИВАН, НИКИФОР, МАТФЕЙ. И ГРАНЬ ШЕСТАЯ, В КОТОРОЙ ГЛАВ 19 О ПРЕСЛАВНОМ ВЕЛИКОМ КНЯЗЕ ВЛАДИМИРСКОМ И ВСЕЯ РУСИ ВСЕВОЛОДЕ ГЕОРГИЕВИЧЕ, НАРЕЧЕННОМ В СВЯТОМ КРЕЩЕНИИ ДМИТРИЕМ

Глава первая.