Том 12 (XVI век, литература «обобщающих предприятий»)

Первое иде Ярославъ во Орду.[1028] И тогда злоименитый Батый присла к нему посол свой, зовый его к себе во Орду. Ходившу же ему, и достойную честь прият от царя, и восприим старейшинство во всем рускомъ языце. Прииде в землю свою честно и славно и многи пришелца утеши и множество людий собра. Сами прихожаху к нему в Суждоскую землю от славныя реки Днепра и от всех стран Руския земли: галичане волынстии, кияне, черниговцы, переяславцы и славнии куряне, торопчане, меняне, мещижане, смолняне, полочане, муромцы, рязанцы; и вси подражаху храбрости его и обещевахуся ему живот свой полагати за избаву християнскую; и тако множахуся и всяким богатеством исполняхуся; и бысть

по обычной скорби радость велия християном, и благодарствоваху Бога, преспевающе во благочестии.

Второе иде Ярослав во Орду и преставися во иноплеменницех.[1029]

— Ненавидяй же добра диявол, искони спону творя человеческому роду, и паки лютейшую брань подвизаше на благочестие: наостри поганых татар творити християном великое насилие и безмерную тягость. И тако безбожнии содевающе; и паче того — злейшим коварствомъ тщахуся и веру християнскую в Рустей земли повредити, и святыя церкви разорити, и богомерския прелести персидския волшебное идолослужение надеяхуся, безаконнии, в Руси предложити.

Михаил Черниговский. Им же тогда возрази таковое коварство великий князь Михаил Черниговский, с нимже единоревнителный его болярин Феодор:[1030] от тех же поганых во Орде за веру Христову мучением скончашася, якоже последи о сих доволно изявленно бысть.

Самодержец Ярослав. Сий же великий князь Ярослав Всеволодич в то же время и лето паки бысть в той же великой Орде, в пагубной земли татарстей, и вся безаконных неправедная на благочестие умышления разуме; и сердцем разгарашеся и ревности божественныя исполняшеся, не терпя зрети людей земли своея погибающих душею и телом, за нихже умысли драгаго своего живота не пощадети истиннаго ради благочестия, паче же воспоминая началнейшее отческое благородие и Богом дарованное им скипетродержание, и како вси страны трепетаху именъ их, не токмо ближнии, но идалние земли, царства, и самии гречестие царие, и како повсюду бысть в Рустей земли православная вера християнская, идеже бысть всякия божественыя благодати исполнение и всего земнаго доброплодия изобилование, в нихже не бяше тогда поганина, уду же присягаху и повиновахуся многия страны и дань даяху от моря и до моря: угрове,[1031]

и чахи, и ляхи, и ятвяги, и литва, и немцы, и чюдь, и корела, и устюг, и обои болгары, и буртасы, и черкасы, и мордва, и черемиса; и самии половцы дань даяху и мосты мостяху, литва же тогда и из лесов бояхуся выницати; татари же тогда ни слухом не именовахуся.

Подвиг Ярославль.[1032] Во дни же его Божиимъ гневом грех ради наших от безбожных татар Рустей земли толико пленение бысть, не токмо телесное, но идушевное. Итого ради богоподражателный самодержец, храбный душею и телом великий князь Ярослав, второе прииде во Орду к безаконному царю Батыю, с ним же и братия его и сыновцы. Пришедже, не устыдеся царския его темныя власти, ни ужасеся безстудныя его ярости, добре подвизаяся о истинне глаголати за люди Божия Руския земли, обличая поганых безумное веление. Егоже ради Батый посла его х Кановичем.[1033] И тамо инемъ образом, инеми завистными винами оклеветан бысть от некоего Феодора Яруновича,[1034] тако именуема, и сице, егоже не начаяшеся — страдати, и сия доблествене со благодарением претерпе от безбожных татар; и многу истому восприят за всю братию свою и за множество христоименитаго достояния, иже в Рустей земли. И таковым своим страданием доблий подвижник сотвори многу и благу ползу и велику помощ и ослабу християнству от тягости и от злаго насилства татарска.