Том 12 (XVI век, литература «обобщающих предприятий»)

Сий же преосвященный митрополит, чюдотворивый Петръ, первый положен во граде Москве во основанней от него церкви соборней Пречистыя Богородицы. Двема же летом минувшим по честнем его преставлении, совершена бысть соборная та церкви и освящена Прохором епископом Ростовским.[1080] И тогда пресвященным патриархомъ Исаиеиъ во Цариграде поставленъ бысть митрополит Феогностъ гречинъ Киеву

[1081] и всей Руской земли, и прииде на Москву; о немже последи речется.

Богохранимому же великому князю Ивану Даниловичю по Бозе благоденствено державствующу и вся, яко Господеви годе, добре управляя, и Великим Новым Градом и Псковом обладая,[1082] злодейственых же разбойников и хищников и татбу содевающих упраздни от земля своея. Во дни же его бысть тишина велия християном по всей Рустей земли на многа лета.[1083]

Тогда и татарове престаша воевати Руския земля. Повелением же его поставлена бысть на Москве церковь камена во имя преподобнаго Ивана списателя Лествицы, и церковь камена же Поклонение вериг верховнаго апостола Петра,[1084] иже ныне у соборныя церкви пределана бысть. Еще же помысли во славу Божию монастырь поставиты во граде Москве, еже и бысть: по благословению отца своего пресвященнаго Феогнаста, митрополита всеа Русии, близ двора своего состави манастырь дивен и зело честенъ, и созда в нем церковь камену чюдну во имя Преображения Господа Бога и Спаса нашего Исуса Христа,[1085] и украси ю святыми честными иконами, и святыми книгами, и священными сосуды, и возложенми, и всякими узорочьи; и приведе тамо перваго архимарита именем Ивана,

[1086] мужа сановита, и словесна, и любомудра, и учителна Божественых Писаний, и добродетелна, иже за премногую его добродетел последи поставлен бысть Ростову епископомъ и тамо добре упас Богом порученное ему стадо и во старости глубоце к Господу отиде.

Сия же архимарития, якоже пишет в летописаниих, преже бяше у святаго Данила за Москвою-рекою,[1087] идеже великий князь Данил Александрович во свое ему имя церковь постави и архимандритию устроил, идеже до конца яко солнцесиятелныя благодати насыщашеся. Последи же боголюбивый сынъ его, сий великий князь Иван Калита, приведе оттуду сию обител во град Москву и собра иноков множество и воздвиже и устрои таковую обител близ себе, яко некое Божественное сокровище, юже хотяше всегда видети и радоватися. И возлюби монастырь той паче инех монастырей и часто в онь прихожаше молитвы ради со многим смирением и благоговением, яко всем дивитися смирению и благоговению: бяше бо по премногу боголюбив сый, наипаче же рещи и мнихолюбив зело и страннолюбив, и велми теплъ сый верою, и истиннаго любомудрия рачител сый, еще же и иноческаго жития ревнител, ихже ни в день, ни въ нощ ни во един час не хотяше отлучитися, и многу милостыню и вся потребная подаваше тамо живущим иноком: ясти же, и пити, и одежи, и оброки, и всяко требование неоскудно всем сотвори и лготу многу и заборонь велику отвсюду творяше им, еже необидижым быти им никимже. И сице богомолию учини себе же и роду своему и всему миру, и приобрете себе мзду многу и благочестну, наипаче же — честь и славу славну же и богоугодну, по писаному: «благую часть избра, яже не отимется от него».[1088]

Да якоже он, благочестивъ и христолюбив сый, благоизволи христолюбивое начало и основание положити, сице и дети его, и внуцы его, и правнуцы его, по тому же ходяще и тако же творяще, тую же мзду и славу приемлют и пребывание в роды и роды яко залог от Бога и Пречистыя Его Матери и великаго святителя и чюдотворца Петра, егоже проречением и молитвами и доныне не пременено есть благородие их: благаго бо корени и отрасли благородни суще и неизронни. Сего же великаго князя Ивана Даниловича сынове бяху три: Семион, Иван, Андрей,[1089] ихже во страсе Божии воспиташа.

О великой княгине. Христолюбивая же великая его княгини Елена[1090] возложи на ся иноческий образ и святую схиму и к Богу отиде. И положена бысть в новосозданием ихъ монастыри в церкви Преображения Господа Бога и Спаса нашего Исуса Христа. И по сем во второе лето великий князь Иван Данилович заложи соборную церковь камену во имя святаго архистратига Михаила внутри града Москвы на площади;[1091] того же лета совершена и освященна бысть преосвященным Феогнастом, митрополитом всеа Русии, месяца сентября 20 день; в той же церкви и положитися завеща, еже и бысть.

По сих же единому лету минувшю, в шестоенадесят лето по проречении и по преставлении великаго чюдотворца Петра, во едину от нощий почивающу ему на ложи своем, и внезапу поторжеся чеп у двери ложница его и глас слышася: «Се старец прииде». И не виде никогоже глаголющаго. И уразуме великий князь, яко збысться ему проречение великаго чюдотворца Петра. И скоро востав, и нимало не закосне, оставляет вся и в монастырь отходит Преображения Господня, егоже сам устроил близ двора своего, в немже и мнишескаго великаго образа сподобися восприяти и с миром к Богу отиде, егоже измлада возлюби, в лето 6849 месяца марта 31.