Том 12 (XVI век, литература «обобщающих предприятий»)

Глава 2. О начале соборныя церкви на Москве, и благословение и пророчество чюдотворца Петра великому князю, и о иных церквах, и о пострижении и о преставлении великаго князя Иоанна. Божий же человекъ, пресвященный митрополит, великий чюдотворець Петръ, прохожаше грады и веси, — якоже обычай имяше поучати Богом порученное ему стадо, — в преславном же граде Москве начат пребывати болши инех градов,

[1075] видяше бо в нем благочестия держателя, сего боголюбиваго великаго князя Ивана Даниловича, православием сияюща и богоугодно живуща, и всякими добрыми делы украшена, и милостива до нищих, и честь велию подавающа служителем святых Божиих церквей и тех учению внимающа; егоже зело от душа возлюби великий чюдотворец Петръ, с нимже часто беседуя и мудрьствуя о всех благих и полезных, душевных же и телесных. Еще же, совет благопотребен предлагая ему и пророчествуя, глаголаше: «О, боголюбезнейший великий княже! Аще совета моего, сыну, послушаеши и во граде своем Москве соборную церковь камену поставиши во имя Пречистыя Богоматери, и тебе самого имат Богъ благословити и прославити паче инех князей и распространити град сей паче инех градов, и имя Его святое сугубо прославится в нем, и не оскудеют державнии от семени твоего, обладая и царствуя местом сим в роды и роды и во веки, и взыдут руки их на плещю враг их; еще же святители поживут в немъ, паче же и моя кости зде имут положени быти».

Сия убо словеса великий князь от учителя с радостию великою приимъ и честь велию воздавая отцу своему. И бяше всегда посреди обоих веселие духовное, и вся потребная ко церковному зданию готовляху.

К сим же еще чюдно сказание мнози в повестех обносят, сице глаголюще: яко бысть некогда сему христолюбивому великому князю Ивану Даниловичю, по некоему прилучению яздящю ему на конех близ реки Неглинны, — идеже ныне есть монастырь, именуемый Высокий, в немже и церковь во имя чюдотворца Петра,[1076] — внезапу зрит великий князь на том месте гору высоку и превелику, и верхъ горы тоя бяше велми снежен. Сие же видение зря и дивяся и сущим с ним вельможам своим рукою показуя: и вси недоумевахуся о необычной горе. И абие видяху: снег, иже верху горы, вскоре невидим бысть, потом же, надолзе сматряющем имъ, и гора высокая и превеликая невидима бысть. Вся же сия возвещена бысть от великаго князя Божия святителю Петру. Святый же, паки пророчествуя, глаголаше: «Разумно да будет ти, о чадо, яко гора высокая и превеликая, юже видел еси, подобие образует твоего благородия высочайших добродетелей исправление и Богом дарованнаго ти отеческаго скипетродержания крестоносныя хоругви, Рускаго царствия величества. Горы же оноя снежный верхъ близ являет моего жития скончание: якоже снег, иже на горе, скоро сокрыся от очию твоею, надолзе же сих сматрящу ти, и гора невидима бысть, таковым образованием мне прежде тебе жития сего отити есть, потом же и ты, яко гора высокая превелика, богоугодно и доволно царствовав и, яко доброплодная маслина, благородная чада породив и в добре наказании воспитав, и по том, егда услышиши старца к тебе пришедша, и тогда уразумееши и ты добраго ти жития совершение течения и к Богу отшествие». Великий же князь Иоаннъ Даниловичь внимаше умом словеса сия и сугубо умиление стяжа и всегда необычна старца пришествия ожидаше. Вся бо, яже глаголаше святый, Богъ же деломъ исполняя, и до ныне проречения его збывахуся по милосердию Божию предстателством Пречистыя Богородицы и молитвами и благословением великаго святителя и чюдотворца Петра.

Церкви основанне бывши,[1077] и начат день от дни спеяти и воздвизатися, и самому святому Петру прилежати на всяк день и спешити. И яко убо начат церков совершатися, и тогда Божиим откровением проувиде смерть свою. И божественную службу свершив и поучив народ, призвав же к себе старейшину града именем Протасия,[1078]

и глагола ему: «Се аз отхожю жития сего, оставляю же возлюбленному своему сынови, великому князю Ивану, милость, мир и благословение от Бога и семени его до века. Елико же сынъ мой и мене упокоил, да воздасть ему Господь сторицею в мире сем, и живот вечный да наследит, и да не оскудеет от семени его, обладая местом его и до века, и память его да упространится». По сих же всем вкупе мир дав, и вечерней молитве еще сущи в устех его, душа его к Богу отиде.

Въ то же время великому князю не сущу во граде, и с великою скоростию приспе, велми тужаше о лишении отца и учителя, и сам с велможами своими святого тело на одре к церкви Пресвятыя Богородица принесе.[1079] И положен бысть во гробе, егоже сам себе уготовал, в лето 6834 месяца декабря 21 день, идеже и до нынечюдеса различная истачая приходящим верою. Прочее же его чюдотворное рожение и житие богоугодное и святительство преизящное и по преставлении многая чюдеса в торжественом его Словеси всем явна бяше в сей же десятой степени, в третией главе.