Читаем Том 12 (XVI век, литература «обобщающих предприятий») полностью

Том 12 (XVI век, литература «обобщающих предприятий»)

Пагуба царем во Орде[1094] и прочим поганымъ. Во времена же она бысть во Орде велми силен мятеж, яко мнозии царие сами на ся брань воздвигнуша и едини от единех оружием падоша. В том же мятежи и царицы Тайдула убиена бысть, юже великий чюдотворец Алексей исцели,[1095] и мнози царевичи побиени быша, такоже и рядцы межю себе сами ссекошася. Хидыя же царь от своего ему сына Темир-Хози убиен бысть.[1096] Темник же его Мамай замяте всем царством его, а Темир-Хозя бегу ся ят за Волгу и тамо убиен бысть.

[1097] Мамай же прииде за Волгу на горнюю страну[1098] и вся Орда с ним. И вста иный царь, Килдибек,[1099] и многих поби, и самъ побиен бысть. В Сараи же тогда именовашеся царь Амурат.[1100]

Глава 3. Преставление великие княгини Александры.[1101] Тогда и боголюбивая великая княгиня Александра, святая мати сего достохвалнаго великаго князя Димитрия, последова благонравным стопам блаженнаго си супруга, великаго князя Ивана Ивановича. В шестое лето по отшествии его к Богу такоже потщася своим благим произволением во иноческий чин облещися, и претворено бысть имя ея во инокинях Мария. Совершено же и в самый великий образ святыя схимы пострижеся, и в таковом во истинном смиреномудрии трудолюбезно житие совершив, благодарствуя Бога, емуже и душу свою с миром в руце предаде. Честное же тело ея положено бысть в преименитом граде Москве в монастыри у Спаса, в приделе, идеже и ныне соборная церкви в царсвеном дому ихъ.

Брак державнаго Димитрия.[1102] По том же, по двою лету, христолюбивый сынъ ея, великий сей князь Дмитрей Иванович, помысли законному браку приобщитися, уже тогда ему сущу лет яко штинадесяти. И по благословению чюдотвориваго Христова архиерея Алексия, митрополита всеа Русии, и приведоша ему невесту от Суждалския земля, дщерь великаго князя Димитрия Костянтиновича, благородную великую княжну Евдокию,

[1103] еюже оженися во граде Коломне месяца генваря 18. И возрадовася вся земля о совокуплении брака его. По браце же целомудрено живяста, со умилением сматряста своего спасения, в чисте совести.

О том, како град Москва камен поставлен, и о митрополитех. Тогда же замысли преславный град Москву камен поставити,[1104] егоже соверши в лето 6875, в немже живый добрым подвигом подвизаяся и мудрствуя полезная о души и о всякой духовной совести. Ему же дарова Богъ благия советники и нелестнии собеседницы, богоносныя отцы и учители: великаго во святителех преосвященнаго митрополита и чюдотворца Алексия, и преподобнаго игумена Сергия, и Кирила Белозерскаго, и Димитрия, Прилуцкаго чюдотворца,[1105] и прочих многих тогда в чюдесех просиявших святых отецъ, ихже молитвами и благосоветиемъ и своимъ добронравием и благим произволением весь обоженъ бываше. И в сицевых исправлениих преспевая и крепостию разума предержа земное царство и к небесному выину присягая, плоти угодиемъ не отяхчашеся и, яко кормчия крепокъ, противу ветромъ волны минуя, направляем Вышняго промыслом. Якоже смотряй пророк на Божии стражи,[1106]

тако и сий смотряше своего царствия.

Въ лета же она великий чюдотворец, преосвященный митрополитъ Алексий проувиде свое к Богу отшествие, и призва к себе преподобнаго игумена и чюдотворца Сергия и много нудяше его восприяти престолъ Руския митрополия, и никакоже не може увещати его. И тако великий чюдотворец Алексий к желаемому Христу отиде, емуже угоди, от негоже многих чюдес дарованием обогатися; егоже престола приемникъ бысть премудрый митрополит Киприян, родом сербинъ, поставленъ бысть во Цариграде. Тако же поставленъ бысть в том же во Цариграде на Рускую митрополию Пимин,[1107] переяславский архимандрит. Яко преже сего, наипаче же по сих умножися слава имени боголюбиваго великаго князя Димитрия Ивановича, якоже великаго князя Владимера; и воскипе Земля руская в лета державства его многою благодатию, якоже обетованная земля Израилю. И страхом государства своего огради всю Землю рускую, и от востока и до запада хвално бысть имя его, от моря и до моря, от рек до конец вселенныя превознесеся честь его. (...)