Том 12 (XVI век, литература «обобщающих предприятий»)

Сей убо православный в державных, благодатно имя Иван, родися в лето 6948, месяца генваря 22. Во время же рожения его прорече о нем некто инъ святъ от велможска роду, именем Михаил, живый в Великом Новеграде в монастыри Клопском. И такова прозорлива дара сподобися от Бога, яко многажды прорицаше хотящая преди быти, и сия, яко настоящая, глаголаше. Такоже бысть егда родися сий великий князь Иван, — и тогда внезапу начат звонити в колоколы, и мнози людие снидошася. Он же яко уродствуя бяше и всем людем Великаго Новаграда и самому пастырю их, великому архиепископу Еффимию, явствено вопия и глаголаше сице: «Днесь во преславном граде Москве у великаго князя Василия Василевича родися сынъ, князь великий Тимофей, сущее же имя ему Иван, и той будет всему Российскому царствию наследник, и всем окрестным странам страшен будет, и сего вашего всего Великаго Новаграда обладает, и гордыню вашу упразднит, и во всю свою волю привлечет вас, и все ваше самовластие раздрушит, и самоволная ваша обычая изменит, и за ваше непокорство и супротивие многу победу и посечение и плен над вами сотворит, и богатество ваше и села ваша восприимет»,[1110] еже и бысть по летех четыридесятих, еже последи речется.

Тишина. В лета бо она отецъ его, великий князь Василий Василевич, по мнозех нестроениих и крамолах и по мнозех неудобственых бранех, не токмо со иноплеменными враги, но и со своими ближними ужиками, и по лишении очию, Божиею благодатию всем одоле[1111] и велие благоденство и тишину получи, якоже выше явлено есть, в четвертойнадесят степени книги сея. Брак. Сему же преславному самодерцу Ивану юну сущу, яко лет двоюнадесяти, ему же отецъ его взят в супружство у великаго князя Бориса Александровича Тверскаго дщер, великую княжну Марию.[1112] 1 сынъ. Ипо браце в седмое лето родися ему от нея сынъ единоименен ему великий князь Иван, рекомый Младый.[1113]

Лета же того благочестнодержавный отецъ его, великий князь Василий Василевич, Бога помощника имея, помысли расточенное отческое державство взыскати и приединити непокоривых ко своему достоянию. Вятка. И посла на Вятку князя Ивана Ряполовскаго и потом посла князя Ивана Юревича; он же шед и взя грады их Орлов и Котелнича.[1114] В Новград. По сих же сам великий князь Василий прииде в Великий Новград,[1115] с ним же дети его, князь Юри и князь Андрей; и оттуду посла во Псков сына своего князя Юря;[1116] сего же старейшаго сына своего, великаго князя Ивана, на Москве остави.[1117]

Сам же мир дав Новуграду, из негоже прииде на Москву и, два лета пребыв, с миром почи о Господе.

Глава 2. Начало государства, и о чюдотворцехъ Ярославских, и о митрополите Иерусалимском. Его же державы наследник бысть сий христолюбивый сынъ его, великий князь Иван. В первое же лето самодержавства его во граде Ярославли обретены быша чюдотворныя мощи князя Феодора и чад его Давыда и Костянтина,[1118] о нихже доволна есть повесть в десятой степени книги сея. По лете же едином Феодосий, митрополит всеа Русии, постави на Москве Иосифа в Кесарию Филипову во Иерусалим на митрополию, пришедша оттуду.[1119] И потом Феодосий остави митрополию, в него же место поставлен бысть добродетельный и блаженный Филип митрополит всеа Русии, в лето 6973.[1120]

И тогда безбожный царь Махамет поиде на Рускую землю со всею ордою. И бывшу ему на Дону, и ту прииде на него царь Ази-Гирей и победи его, и Орду его взя; и начаша воеватися межу собою.[1121] И тако всесилный Богъ своим милосердием избави Рускую землю от поганых в лето 6976.

Глава 3. О рати на Казань.[1122] И по сих великий князь посылал царевича Касыма, с ним же и воевод своих со многими людми, к Казани на царя Обреима. И не успеша ничтоже. Тоя же зимы и на черемису послал князя Симиона Романовича[1123]

со многим воинством. И много черемисы в плен взяша, прочих же посекоша, и всю землю повоеваша и достал пожгоша; за един день до Казани не доходиша, и по Волзе обе страны повоеваша, и вси приидоша к великому князю здравы. На весну же и судовую рат посла на Каму.[1124] В лете том июня 4 князь Иван Хрипун на Волзе многих татар двора царева победи,[1125] плененых князей на Москву приведе. И паки посла многое воинство изо всех градов земля своея, такоже изо всех градов братии своея судовую рать. И вси снидошася в Новград Нижней. Многие же воеводы и дворяне по своей воли избраша себе воеводою Ивана Руна,[1126] емуже хотяху вси в послушании быти. И приидоша к Казани маия 21, в неделю Пятдесятную, татар казанских многих посекоша, и полон русский и литовский вес отполониша, и посад пожгоша. И мнози татары, и з женами и з детми, не хотяше в руки предатися надо имением своим, згореша со всем имением. И рать отступи от града. Тогда же царица Касымова, иже бяше мати Обреимова,[1127] идый от великаго князя с Москвы, с честию отпущена, и пройде мимо воинство великаго князя, льстивыми словесы увещав их, да не ята будет от них.