Том 15 (XVII век)

Он же приехаша ко отцу своему и, падъ, поклонися ему. Отецъ же велми милостивно его приятъ и возрадовася, и во слезах едва слова изрекли: «О, чадо нашъ дражайший, откуда еси семо пришел и како, чадо наше, и где такое многое время пребых?» Он же имъ отвеща: «Аз же приехавъ, отче, с сродникоми своими в то царство, о которомъ они тебе возвещали, и, умедлихъ на час, купих товару на четыреста рублевъ, которой стоитъ десяти тысячь. У дядевъ своих стал денех просить, они же мне не даша, зна-де, что товар дешевъ купилъ. И оставиша меня в томъ царстве, а сами уехаша. Я же, отче, пришед на другую страну к пристанищу московъскому, и, пад, поклонися имъ. Они жъ меня вопрошаша, которого царства и какова чину». Он же имъ об отце поведал, и о царстве, и о роде. Они же сказаша, что «мы родителя твоего знаемъ и хлебъ-соль с нимъ водимъ». Я же у них попроси сто рублевъ на оной таваръ. Они же мне даша, и я с ними, отче, приехал, еже видиши мя». Отецъ же его вопроси: «Да где тот таваръ, который ты купил?» Он же отвеща: «Я, отче, оставих у нихъ, а послали меня к тебе, дабы сто рублевъ дал, а товаръ взялъ». Отец же его даде ему сто рублевъ, чая, что вправду товаръ принесетъ.

Он же взявъ сто рублевъ и поехавъ от отца, куды очи несутъ. И ехаша многа дней и много нощей, и плакаше горко и рыдая о разлучении родителей своихъ, такожде и от наследства.

И приеха к великому непроходимому лесу, чрез которой лежат две дороги: одна через лесъ, а другая кругомъ лесу. Онъ же размышляя, како ему ехать, и которою дорогою, и в которое царство. И плакашеся горко и размышляя в себе: «Аще бо кто мне ныне послужил, то бы я дорогою ценою поредил»[302]

. Внезапу виде в лесу на дороге стоит человекъ велми великъ, в руках держитъ клещи железныя. Онъ же велми ужасеся, чая, что стоит разбойникъ, не смея к нему ехати, измышляя: «Лутче мне зде одному умрети, нежели родителемъ моимъ велию скорбь привести». И поехал к нему прямо.

И приеха к нему, вопроси его, что за человекъ и которого града. Он же сказа ему все поряду: «А езжжу я по разным государствамъ для торгу и торговых извычаевъ[303] других государствъ». Купецъ же вопраси предстоящего: «А ты что за человекъ?» Он же ему поведа: «Аз есмь ищу господина, у кого бы нанятца служити». Купецъ же о сем велми возрадовался и рече: «Человече, поиди ко мне во служение, аз имамъ дати великую плату». Онъ же отвеща: «Готовъ тебе служити, токмо сотворим мы с тобою обет, чтобъ тебе мяня во всемъ слушатца. А ежели слушатца не будешь, то не иду к тебе во служение». Купецъ обещая ему тако сотворити.

И чрез тотъ лесъ лежаще две дороги: одна — чериз лес, а другая — кругомъ лесу. Онъ же вопроси его: «Сие дороги в которое царство лежатъ? В разныя царства или в одно царство?» Онъ же сказа ему, что сии две дороги лежат к одному царъству. Купецъ же рече: «Для чего две дороге и которая ближе?» Человек же рече: «Кругомъ лесу — тысяча верстъ, а чрезъ лесъ — пятьсотъ веръстъ. И кругомъ лесу ехать — никакой нетъ опасности, а чрезъ лесъ, хотя и ближе, точию по ней великой разбой, никому проезду нетъ». Купецъ же рече: «Лутче намъ ехать кругомъ лесу, здоровие будетъ». Слуга же отвеща: «Поедемъ прямою дорогою, чрезъ лесъ, ближе до царства». Купец рече: «Не хощу ехать». Слуга же рече: «Да ты меня слушатца обещалса». Он же не преступи слова своего.

Поехали чрезъ лесъ. И как быша среди лесу на поле, и тутъ стоит дворъ превеликой, в которомъ разбойники живутъ. Разбойники же, видя ихъ, что стоящы в думе, и все бежаша из храмины[304]

и спряташася во единъ анбаръ, хотя их сонныхъ погубити. Слуга же все то видя, а господинъ ево не виде ничего сего, спрошаше у него о дворе: «А сей двор чей?»[305] Слуга же отвеща: «Сей двор постоялой, тут намъ начевать». И стало на дворе смеркатца, слуга рече: «Господине, начуй здесь, а я поиду на двор к лошаде спать». Он же велми о томъ печаленъ бысть и не хотяше остатися во храмине и хотяще ити с нимъ на дворе спать, с слугою. Слуга же рече: «Да ты хотел, господине мой, во всемъ меня слушетца, а ныне ты меня преслушаешь!» Он же с великою печалию и со страхомъ остася начевать во храмине. Слуга же поиде и легъ спать в телеге.

И едва приде полночь, разбойницы же совещаша в онбаре промеж собою и хотяше ихъ погубити. Слуга же, слыша тот ихъ совет, воста и взя клещи, и стал у притолоки дверей. Разбойники же един по единому стали из онбаря выходити. Он же их клещами хваташе по единому за голову, и примаше их за шею, и дави их в руду[306]. Разбойники же видеша, что ихъ единъ человекъ подавляше, уже и не смеяша из анбаря вон выходить. Слуга же купцевъ вниде в онбаръ и передавиша всех до смерти, и покладе всех в онбаре, и запре их. Какъ свету светающу, поиде во храмину к господину своему. Господин же его не спит от страха, яко един начеваше, а того не ведаше, что слуга их, разбойниковъ, подави. И запрягши лошедь, и поехали до царства.