Том 15 (XVII век)

И приехаша во царство и ста на постояломъ дворе. Егда же сташа, купецъ же по обычею поиде по царству и применяяся ко всякимъ товаромъ. И егда будет среди торжища, встрете его того царства сенатор, которой ближе при царе, и удивляяся на красоту его. Самъ же поиде за ним вослед, куда он поидет и коего царства. Купецъ же приде на постоялой дворъ, а сенаторъ смотрелъ и поехал до царя.

Во утрий же день приехаша в то царство из ыные земли гости корябленики и придоша к царю з дарами. Царь же дары у них принял и унелъ[307] их у себя обедать. Сенатор же вошедъ к царю и рече: «Пресветлейший царю! Есть в нашемъ царстве иностранной купецъ, которой велми прекрасен, а на обеде зде его нетъ, не вижу». Царь же рече: «Да где тот купецъ стоит?» Он же сказа: «Аз, царю, видех его, где онъ стоит». Царь же посла по него. Сенаторъ же приде х купцу и просиша его, дабы к царю шел на обед. Купецъ же обещася и купи дары царю. Слуга же купцевъ рече: «Господине! Ты идешъ к царю на обед, возми и меня с собою!» Купец же отвеща ему: «Да како я могу тебе взяти с собою?»[308]

Слуга же рече: «Да ты хотел меня во всем слушатца!» Купецъ же взя его с собою. А слуга же рече: «Когда ты, господине, придешь к царю в полаты, и царь увидит тебя, и востанет с своево места, и возметъ тебя за руку, и посадит подле себя, и станет потчивать лутче всех, аз же, господине, стану у дверей, и царь взглянет на меня и спросит тебя: „Что за человекъ?", и ты скажи, что слуга. И он велит меня выслать вон. И ты ему поведай: „Царю, сей слуга лутче мне отца родного!" И он велит мне сесть тут же, посадит за столомъ».

И пришел купецъ к царю, и увиде его, и ста и своего места, и взя его за руку, и посади подле себя, и стал его потчивать лутче всехъ. Слуга же купцевъ стоя у дверей. Царь же увиде его и вопроси и о семъ, что за человекъ. Купец же рече: «Рабъ мне». Царь же рече: «Аще ли рабъ, посли ево в другую полату, где люди[309] сидятъ». Купецъ же отвеща к царю: «Сей мне слуга лутче отца родного!» Царь же повеле и слуге сести за стол и посадил через человека от купца.

По окончанию же обеда царь взялъ купца за руку и веде его во особливую полату, и ста ему глаголати: «Аз тебе, купче, глаголю, не почитаю тебя за купца, почитаю тебя за сына и за зятя. Есть у меня единая дщерь, даю тебе в жену и будеши царству моему держатель, понеже не имел по обычаю себе зятя выбрать никого, и ныне един ты мне угоденъ». И выведе дщерь свою и показа ему. Купецъ же, пад, поклонися ему. Царь же обеща за нею приданые дати треть царства и заповеда ему, дабы сие никому не поведал: «Аще ли поведаеши, то злою смертию умреши. А токмо будем ведать ты да я, да невеста твоя, попъ да друшка». И удариша по рукамъ, и отпустиша его, а самъ наказа: «Жди дня уреченаго, когда аз пришлю к тебе оного же сенатора». Купецъ же поклонися и поиде да квортеры своея.

И како идоша дорогою, слуга же купцевъ поздравляше ему: «Здравствуй, господине, на царской дщере зговорившись и треть царства взявши!» Купецъ же удивися сему, како он про сие сведа, никто не был в полате, кроме царя и невесты, а онъ про сие сведа. И приидоша до квартеры своей.

Уреченный же день приде. В полунощи прислал царь к нему того сенаторя, дабы ехал к венчанию. Купецъ же сорежаетца для сочетования законного брака. Слуга же рече: «Господине, возми меня с собою!» Он же сказа ему: «Да како могу тебя взяти с собою? Царь не велел никому о семъ поведати. А тебя взять — он меня злою смертию казнит!» Слуга же рече: «Да ты хотел меня слушатца!» Купецъ же чрез великую мочь[310] взял ево с собою и поехаша до царя к венчанию.

И какъ приехаша на царский дворъ, царь же повеле ихъ вести в церковь и обвенчать свещенику. По венчанию же ихъ посади за стол, потомъ повеле ихъ вести на ложу спать. Слуга же купцевъ кликнуша его к себе: «Господине, поиди ко мне до слова!» Царь же то услыша и рече: «Како еси смел сотворити сие, слуге поведати? Ведаешь, что смертию да умрешь!» Он же рече: «Царю, но не могу сего сотворити, что его ослушатися, понеже под великою клятвою», и выйде к слуге своему. Он же рече: «Господине, аще поидешь спать на ложу с царевною, возми меня с собою!» Он же ему сказа: «Да како магу тебя взяти с собою?» Слуга же рече: «Да ты меня слушатца хотелъ!» Купец же рече: «Да како магу тебе пустити, понеже нас запрутъ двоих? Да како же ей, девичье дело, како ей раздетца при тебе?» Слуга же отвеща: «Ты сего не моги! Токмо повели, хотя и двоих запрутъ, а я уже тамо буду. А коли она станетъ стыдитися, и ты ей скажи: „Чего тебе стыдитися, сей слуга всегда при нас будетъ". И станетъ она с табою играть, и захочетъ спать, ты же не спи и сматри на лице ея. Аще же ана здрогнетъ, ты еще смотри. Ежели же в другой раз вздрогнетъ, то ты соиди с постели и стань на мое место, а я возлягу на одре с нею».