Том 15 (XVII век)

Во едину же нощь загореся село то. И обьятъ огнь 4 двора средния, беша бо соломою крыты. И воста буря велия, и уже огню к церкви приближающуся. Азъ же едва возмогъ от зноя вскочити въ церковь и похвативъ перьсти[455] от гроба ея обема рукама. И явися в рукахъ моихъ аки вода, и вверьгохъ во огнь противъ ветра, такоже и съ другия страны пожара. И абие ветръ возвратися въспять и нача свиватися кругомъ, и две храмины, сущыя от края, угасихомъ. А по обе стране по 4 двора, такоже вкупе саломою покрыты, соблюде Богъ от огня невреждены молитвою святыя.

Соборныя церкви попа Михаила поподия лежа въ болезни 5 месецъ. И отпевъ молебенъ и понахиду, и воду святивъ, и пивъ, и отреся пескомъ от гроба святыя. И абие бысть здрава, аки не болевъ николиже.

Деревни Пансыревы человекъ именемъ Иосифъ разболеся, и боляше горло, и не можаше глаголати, но едва перстомъ указываше. И даша ему воды с мощей святыя Ульянии, и абие в той часъ здравъ бысть и нача глаголати ясно, яко николиже болевъ.

Села Лазарева христианка Фекла бесом одержима много время. И приведоша ю к раце святыя, и молебенъ певше. И бысть здрава и смыслена.

Деревни Гороховы некая жена слепа бе много время, не видя отнюдъ нимало. И приведена бысть к раце святыя, и пев молебенъ — в той часъ прозре, аки николиже болевъ, отиде в дом свой, славя Бога.

Деревни Коледина человекъ именемъ Климентъ боляше ногою: бысть язва, зовомая пострелъ, еюже мнози умирааху, бе бо в то время на скоты поветрие велико. И бысть недугъ той к смерти. Онъ же, слышавъ чюдеса преподобныя Ульянеи, отчаявся живота и повеле вести ко гробу ея. И молебная соверьшивъ, отре пескомъ и въскоре получи здравие, очистися от язвы.

Села Корочарова человекъ именемъ Селивестръ бысть разслабленъ[456]

три лета. И привезенъ бысть в село Лазарево, и, соверьшив молебная, отреся пескомъ, и вскоре исцеление получи, и отиде радуяся.

Деревни Подъболотья человекъ именемъ Андрей бе разслабленъ и горбатъ, не могъ въсклонитися два лета. И прииде к праведной Ульянеи и, соверьшивъ молебное, отреся пескомъ и святою водою окропися, — въскоре исцеление получивъ, прослави Бога.

Града Мурома с пасаду Матфея Черкасова[457] раба именемъ Мария бе слепа, не видя нимало. И приведъше ю к раце святыя Ульянеи, и соверьшивъ молебная и понахиду, и абие вскоре исцеление получи, отиде в домъ свой, радуяся о себе, и на пути начя ягоды и грибы брати, аки николи болев.

Некий отрокъ младъ, яко 10 лет, слепъ и разслабленъ, немощно и на другую страну обратитися ему; принесенъ бысть к церкви Архангела Михаила, и, соверьшивъ молебная, абие прозре и узре свеща горяща. И болезнь его облегчися, и по мале дний воста здравъ, прослави Бога и святую.

Села Лазарева церкви Архангела Михаила клирикъ именемъ Феодоръ, и лучися болезнь жене его Агафии: десная рука отъяся, и не може ею двигнути нимало. И явися ей во сне блаженная Ульянея, глагола: «Иди въ церковь Архангела Михаила и приложися ко иконе праведныя Ульянеи. И есть у тебе во ономъ месте две сребреници». И показа ей место, где лежатъ, и повеле ей дати попу, да приложитъ ко образу ея. Она же сотвори тако, и слушавъ молебна и понахиды, пивъ святую воду и отреся пескомъ, и абие въ той часъ исцеле, и прослави Бога и святую Ульянею, отиде радуяся.

Села Лазарева некая жена именем Фекла, Артемьева жена Мартьянова, боляше очима зело. И приведъше ю въ церковь, и соверьшивъ молебная, и омыся святою водою и вскоре, исцеление получивъ, прослави Бога и святую Ульянею.

Сынъ боярский именемъ Феодоръ, прорекломъ Пансыревъ, лежя в болезни боле года воднымъ трудомъ[458] и чревомъ, понос безпрестани афендрономъ[459]

идяше. И привезоша к нему песку от гроба святыя Улиянии и святыя воды. И егда испи святыя воды и треся пескомъ, абие в той часъ отокъ отпаде и поносъ закрепися.

Сынъ его именем Симеонъ ума изступи много время и, пришед, сверьши молебная, абие в свой умъ возвратися и бысть здравъ до сего дня.

Муромецъ дворенинъ Стефанъ Скрыпинъ, обе руце его больны беста, не владе ими много время. И приехавъ к мощемъ святыя Улиянии, и молебная соверьшивъ. И егда священникъ прочте Евангелие, онъ же приложився, получи исцеление, нача креститися и отиде здравъ, радуяся и славя Бога.

Московский дворянинъ Иосифъ Ковковъ[460] разболеся великою болезнию, яко живота отчаятися. И присла слугу своего Аникиа, и соверьшивъ молебная, и вземъ святые воды и песку, и пивъ ю, и омывся, и пескомъ отреся — абие здравъ бысть. И получивъ исцеление, прииде пешъ своима ногама, и приложи ризы поповския к церкви той, славя Бога.

154-го (1645), сентября въ 1-й день. Исцели Богъ Михаила Яковлева сына Мелникова, одержимъ бяше беснымъ недугомь[461]

155-го (1646), октября въ 19 день. Прикладныя копейки позлащеные тати покрали от образа и на улице изронили. Все целы, только не обьяви Богъ, кто кралъ.