Том 16 (XVII век, «смеховой мир»)

Прибегоша же послании в царствующии град Москву от царя Шихалея и приидоша в полату пред царя Ивана Васильевича. И, падше, поклонишася ему и поставиша пред него златый ларец. Царь же роспечатав ларец и отверзе его и пойде с ним в ложницу[40] свою з дядею своим Никитой Ивановичем Романовым. И изем образ писанный, его же Шихалей-царь прислав из Златые Орды, царевны Марии Теврюговны. И удивися доброте ея и лепоте лица ея. И рече дяде своему Никите Ивановичу: «Видиши ли лепоту и доброту сию пресветлую? В выборе у меня велможских детей — благообразных дев больше 100 было, а ни одна не судит[41]

половиною сицевыя красоты и доброты, никоторая из них не судит!»

Посем разогнув ширинку и виде в ней вещи зело мудры и дивны. И удивися зело сицевому премудрому делу царь и, на многия часы розмышляя, в недоумении велицем бе камению драгому и жемчугу крупному. И повеле изнести из сокровищ своих драгия своя вещи и камения многоценныя и повеле с ними сложити — и не обретеся не един противу присланных, еже царь Шихалей присла из Астракани[42].

И посем царю Ивану Васильевичу в похотение приде, еже пояти за себе великую государыню Марию Теврюговну. И посла по митрополита Филиппа всея Росии, да приидет к нему в полату. Митрополит же Филипп скоро прииде к нему. И советовав с ним царь много, и поведа хотение свое, рече: «Благослови мя, честный отче». Митрополит же повеле по воле его быти и благослови его честный крестом маия в 7 день в 3 час дни[43]

. Царь же митрополиту великии духовный праздник сотвори и угости, и дары великия даде, и с честию его проводи в патриархию его.

И скоро повеле воеводам своим и князем пред собою стати. И избра от них 12 и воинства 24 тысящи московских стрельцов[44] и девиц благообразных 24, и жен велможских 30, и княгинь, и вдов избра 50. Воеводам же даде одеяние злато и девицам, и вдовам, и женам летники[45]

златыя, и всему воинству одеяние цветное, и просто реши — всех наряди в золоте. И посла их к Шихалею, царю касимовскому, в Астракань в самый день аггела своего мая в 8 день на память святаго апостола Иоанна Феолога[46]. И твердо им заповеда, да в 6 недель от Москвы станут в Астракани. На Коломне же стругов взять повеле 120, уготованы бо быша повелением царевым.

И тако пойде сила от Коломны Окою-рекою и день, и нощь беспрестанно. И ехаша до Казани пять на десять дней. И тамо с луками казанских татар взяша 2000 человек, оружия в Свияжске взяли двести пушек, казны пороховые взяли шестьсот пуд. И тако пойде московская сила в Астракань Волгою-рекою повелением царя Ивана Васильевича. И ехаша 4 недели.

И приехаша в Астракань в 5 час нощи — тако царю повелевшу. И не доехав до Астракани 3 версты, весть послаша к царю Шихалею, яко «Сила идет московского царя, а с нею 12 воевод, силы же с ними 26 000 и жен, и дев сто четыре, по царицу Марию Теврюговну». Царь же Шихалей радостен зело бе о таковом велицем деле и повеле из оружия стреляти на мног час. Приехаша же в Астрахань послани от царя Ивана Василевича июня в 30 день на память святых апостолов 12. Наутрия же в 1 день июля воеводы с царем Шихалеем, девицы, вдовы и жены, вси в златом одеянии, с силою многою, болши 40 000, внидоша ва град Астарахань.

И по башням, и по воротам повеле царь Шихалей московской силе стати со всеоружеством своим, сами же поидоша в полаты царевы. Исходит мурза Теврюг Юнгич и спрашивает о цареве здравии. Воеводы же поведаша, яко «Здрав есть государь наш, грозный и силный царь Иван Васильевич, и царствует в радости велицей». И принесоша ему порфиру от царя и венец, и возложиша на главу ему, и поклонишася ему. Он же противу им поклонися, рече: «Многа лета государю царю Ивану Васильевичу и з градом сим, и со всею Златою Ордою. И аз после любезнейшия своея дщери Марии Теврюговны выду из града сего вон, за реку за Яик, и тамо себе жилище починю[47] до смерти своея, и улус починю на оной стране реки Яика».

Внидоша же послании в полаты Теврюговы и узреша дщерь его, великую государыню Марию Теврюговну, седящу на престоле превознесенне злате, и сама златотканными одеждами оболчена, и от драгих камени светится вся полата, от красоты ея. И, падше, поклонишася ей вси послании от царя Иоанна Васильевича и даша ей венец и перстень царев злат. Она же, восстав со престола своего и облобызав венец и перстень, и паки сяде на престоле своем. Брат же ея Мастрюк стоя подле ея на правой стране, мати же ея подле ея седяше, на ином престоле. И рекоша послании: «Госпоже царице! Время сотворити повеленное нам». Она же повеле им пребыти до заутрия и угостити любезно, и всех их выслать ис полаты своея.