Том 16 (XVII век, «смеховой мир»)

Воеводы же принесоша дары, якоже повеле им царь. И, приемши у них, повеле им от питей своих покой дать великий[63]. Святителю же Гурию даде много злата и сребра на соделание честным сосудом, камок же и бархатов даде на священныя ризы. И, прием благословение от него, рече: «Отче великий архиерею Гурии! Моли за мя Бога, грешную». Святитель же отпусти с нею чудотворныя образы, устроены златом и с камением светлым. И повеле вести ея к Москве, царю же Шихалею повеле твердо и опасно имети о ней попечение, якоже царь повеле.

Шихалей повеле воинству остатися в Казани 20 000, в Свияжске 20 000 же, с собою же повеле итти до Касимова 20 000. И тако, Богу им поспешествующу, вскоре приидоша во царствующий град Москву месяца августа в 15 день на праздник Пресвятыя Богородицы, честнаго ея Успения. Крещена бысть великая государыня в Казани Гурием-архиепископом месяца июля в 22 день на память святыя Марии Магдалыни в 19 лето возраста своего.

Вестники же к царю Ивану Васильевичу приидоша и поведаша ему пришествие великия царицы Марии. Он же радостен бысть зело и повеле всем бояром своим и князем, и воинству своему изыти во сретение ея, и корету свою царскую извести и привести ея скоро.

Привезоша же послании без всякого медления великую царицу и введоша ю во светлую полату. И держаху ея жены велможския под руце ея. Царь же седя на престоле своем. Царица же повеле подсолнешник сняти с себе и поклонися пред образом всех Бога трижды, и паки паде пред царем и поклонися ему дважды. Царь же зря на нея и во изумлении велицем бе, дивяся красоте лица ея и доброте тела ея. И рече: «Блаженна сия красота, яко в велицей радости веселитися имаши». Ем ю за руку ея и посади на престоле своем подле себя. И любезно облобызася. И всем велможам повеле поклонитися ей. Они же падоша на землю пред нею. Посем повеле царь нянькам своим вести в светлицу ея и нарядити в порфиру и венец, сам же нарядися во одеяние светло и венец возложи на главу свою.

И посла по митрополита Филиппа. И вскоре митрополит прииде. И рече ему царь: «Отче честный! Совокупи мене законным браком с любезнейшею моею»[64]

. И повеле извести пред митрополита. Изведоша же ея, она же поклонися ему. Митрополит же благослови ея честным крестом, рече царю Иоанну: «Радуйся, царю великодержавный и честный самодержче, яко обрел еси сожителницу себе подобну величеству твоему, обрел еси сокровище себе, полно камений драгих и чудных! Величайся с сею красотою во многолетном здравии вовеки». И поклонися царю и царице до земли, и повеле итти царю с царицею в соборную церковь Пресвятыя Богородицы честнаго ея Успения.

Митрополит же повеле всему собору облещися во священнический чин, сам же во всю священную одежду облечеся. И нача священная по чину действовать, якоже правила повелевают: сотвори прежде обручание, потом венчание и повеле начати священником божественную литоргию. И прияша царь и царица святое причащение от руку его. И по отпусте проводи их митрополит с чудотворными иконы в царские его полаты и, молебная совершив, возвратися в митрополию свою. Царь же многи дары митрополита одари и весь священный собор.

И нача с царицею своею царь и великий князь Иван Васильевич, с великою княгинею Мариею Теврюговною, царствовать любезно; сокровища же ея, их же из Астракани привезе, повеле с великим утвержением и снабдением пред себя поставить. И тако град Астракань покорена бысть сим делом, якоже о ней зде писано есть. Царя же Шихалея многими одарив дарми: даде ему град Казань в снабдение его и в веселие и Астраканью ему же повеле, Шихалею, владети и попечение о нем творити.

И тако поживе царь Иван Васильевич с царицею своею Марьею год и месяц 6[65]. И окормлена бысть от изменников отравою[66], от столника Василья Хомутова[67]

с товарищи, их же царь Иван Васильевич злой смерти предаде: в котле свари[68]. А род их весь перевешал, и з женами и детми.

ПОВЕСТЬ О ЦАРЕ ИВАНЕ И СТАРЦЕ{2}