Том 2 (XI-XII века, переводная литература)

Сь Богъ съвьрьшь вьсю тварь, яко глаголеть Давидъ: «Словъмь Гос-подьньмь небеса утвьрдишася, и духъмь устъ его вься сила ихъ. Яко тъ рече — и быша, тъ повеле — и съзьдашася»,[200] преже вьсехъ сътвори человека, пьрьсть от земля приемля, от себе душю въдъхнувъ животьныимь дъхновениемь и словесьныи съмыслъ и самовласть, да въведеть въ раи, заповедь заповедавъ ему искусьну: да аще съхранить ю, и пребудеть бесъмьртьнъ, аще ли преступить, съмьртию умьреть от своея воля, а не от Божия веления.

Узьревъ же дияволъ человека тако почьтена и устима на то место, съ негоже тъ своею гьрдынею съпаде, и сътвори преступити заповедь и из-д-рая изгьна человека, и съмьртию осужь. И оттоле устити начатъ неприязнь, блазнити многами къзньми человечьскыи родъ. Нъ не остави Богъ великою милостию и любъвью до коньца человекъ, нъ на коежьдо лето и время избьра мужа и яви людьмъ дела ихъ и подвигъ, да ся темь подобяще, вьси на доброе устили.

Якоже бе Еносъ, иже упова пьрвыи нарицяти имя Господьне. Енохъ же потомь, угожь Богу, преставленъ бысть. Нои правьдьнъ ся обрете въ роде своемь, потопа избысть въ ковьчезе, да ся бы пакы земля напълнила твари Божия и украсила. Авраамъ по разделении языкъ, заблужьшемъ же вьсемъ, Бога позна и другъ ся ему нарече и обетование приятъ, яко: «Въ семени твоемь благословлени будуть вьси языци».[201] Исакъ по образу Христову на гору въ жьртву възведенъ бысть. Ияковъ идолы тьстьня погуби и лествицю виде от земля до небесе, ангелы же Божия въсходяща и съходяща по неи, и въ благословлениихъ сыновъ своихъ о Христе пророчьствова. Иосифъ въ Егупте люди препите, Божии ся явль. Иова Авьситидиискааго правьдьна, истиньна и непорочьна Книгы съказають: искушение приимъ, претьрпевъ же, благостьнъ бысть Богомь. Моиси съ Аронъмь въ иереихъ Божиихъ Богъ фараосовъ наречеся и мучи Егуптъ, Божия люди изведе — въ дьне облакъмь светьлъмь, а въ нощи стълпъмь огньнъмь, и море проби, и проиду по суху, а егуптяны потопи, и в пустыни безводьне люди напои воды и хлеба ангельскаго насыти и пътиць; и глаголавъ съ Богъмь лицьмь къ лицю, якоже несть възможьно человеку съ Богъмь глаголати, законъ людьмъ дасть, Божиемъ пьрстъмь написанъ.

Исусъ Навьгинъ людьмъ Божиемъ землю раздели, противьникы воевавъ. Судия такоже многы победы сътвориша. Божию милость приимъ же, Самоилъ цьсаря помаза и постави Господьнъмь словъмь. Давидъ кротостию люди распасе и песньмъ Божиямъ научи. Соломонъ, мудрость от Бога приимъ паче вьсехъ человекъ, многа казания добра сътвори съ притъчами, аще и самъ не доконьча. Илия, зълобу людьску обличь гладъмь и мьртва отрока въскрешь и огнь съ небесе словъмь сънесъ, попаль многы, и жьртвы съжьже дивьнъмь огньмь, мьрзъкыя же иерея избивъ, възиде на небо на колесници огньнеи и конихъ, ученику давъ сугубь духъ. Елисеи, милоть приимъ,[202] сугуба чюдеса сътвори. Прочни пророци, къжьдо въ свое время, о дивьныхъ вещьхъ хотящихъ быти пророчьствоваша. Иоанъ великыи по сихъ, ходатаи межю Ветъхымь законъмь и Новымь,

крьститель Христовъ и съведетель и проповедетель живыимъ же и мьртвыимъ бысть.

Святии апостоли Петръ и Павьлъ съ прочими ученикы Христовы, яко мълния, вьсь миръ прошьдъша, осветиша вьсю землю. По сихъ мученици кръвьми своими омыша сквьрну, а настольници святыихъ апостолъ, цьсаря крьщьше, многъмь подвигъмь и трудъмь поганьство раздрушиша. Сельвестръ, чьстьно трьми съты и 18 отьць, великаго цьсаря Костянтина на помощь приимъ, съньмъ пьрвыи събьравъ въ Никеи, Ария победи и проклятъ и и ересь его, юже въздвизаше на Святую Троицю, якоже бе Авраамъ инъгда съ трьми съты и 18-те отрокъ цьсаря избилъ и от Мелхиседека, цьсаря Салимьска, благословление приятъ и хлебъ и вино, бе бо иереи Бога вышьняаго. Дамасъ

же и феологъ Григории съ сътъмь и пятию десятъ отьць и съ великыимь цьсарьмь Феодосиемь въ Цьсариграде потвьрдиша святый сумболъ, еже есть: «Верую въ единъ Богъ», а Македония, отсекъше, прокляша и и хулу его, юже глаголаше на Святыи Духъ. Келестинъ и Курилъ съ дъвема сътома отьць и съ другыимь цьсарьмь[203] въ Ефесе Нестория раздрушиша съ вьсею блядию, юже глаголаше на Христа. Львъ и Анатоль съ правоверьныимь цьсарьмь Маркианъмь и съ 6-ю сътъ и трьми десятьми отьць въ Халькидоне Евьтухово безумие и блядение прокляша. Въгилий съ богоугодьныимь Иустинъмь и съ сътъмь и 60 и 5-тью отьць, 5 съньмъ съставльше, изискавъше, прокляша. Агафонъ, апостольскыи папежь, съ дъвема сътома и 70 отьць съ чьстьныимь Костянтинъмь цьсарьмь на шестемь съньме многы мятежа въсколоша, изгънавъше, прокляша съ вьсеми съньмникы теми. Реку же, Феодора Фараньскааго, Севгира же и Пирона, Кура Александрьскаго, Енория Римьскаго, Макария Антиохийскаго и прочая пос-пешьникы ихъ, а крьстияньскую веру, на истине поставльше, утвьрдиша.