Том 2 (XI-XII века, переводная литература)

По сих же вьсехъ Богъ милостивыи, «иже хощеть, да бы вьсякъ человекъ спасенъ былъ и въ разумъ истиньныи пришьлъ»,[204] въ наша лета языка ради нашего, о немьже ся не бе никътоже николиже попеклъ, на добрыи чинъ въздвиже нашего учителя, блаженаго учителя Мефодия, егоже вься добрыя детели и подвигы прилагающе, сихъ угодьницехъ по единому не постыдимъся, овемъ бо равьнъ бе, овехъ же малы мьнии, а другыихъ болии, словесьныя детелью преспевъ, а детельныя словъмь. Всемъ бо ся уподобль, вьсехъ образъ на себе являше: страхъ Божии, заповедьная хранения, плътьскою чистотою, прилежьны молитвы и святыня, слово сильное и кротъкое, сильно на противьныя, а кротъкое на приемлющая казание, ярость, тихость, милость, любъвь, страсть и тьрьпение, вьсе о вьсячьскыихъ бывая, да бы вься приобрелъ.

Бе же рода не худа от обоюду, нъ вельми добра и чьстьна, знаема пьрвее Богъмь и цьсарьмь и вьсею Селуньскою страною, якоже и телесныи его образъ являаше ся. По тому же и пьрьци, любяще и издетьска, чьстьныя беседы деяху, дондеже цьсарь, уведевъ быстрость его, княжение ему дасть дьржати словеньско, реку же азъ, яко прозьря, како и хотяше

Богъ учителя словенемъ посълати и пьрьваго архиепископа, да бы проучилъся вьсемъ обычаемъ словеньскыимъ и обыклъ я помалу.

Сътворь же въ томь княжии лета многа, и узьре многы мълвы бе-щиньны въ житии семь, преложи земьныя тьмы волю на небесьныя мысли, не хотяше бо чьстьныя душа оръпътити непребывающими въ векы. И обретъ время, избысть княжения и, шьдъ въ Алимбь,[205] идеже живуть святии отьци. Постригъ ся, облече въ чьрны ризы, и бе повинуяся покоръмь. И съвьрьшая вьсь испълнь мьнишьскыи чинъ, а книгахъ прилежа.

Приключьшю же ся времени такому, и посъла цьсарь по философа, брата его, въ козары,[206] да поятъ и съ собою на помощь. Бяаху бо тамо жидове крьстияньскую веру вельми хуляще. Онъ же рече, яко «Готовъ есмь за крьстияньскую веру умрети». И не ослушася, нъ, шьдъ, служи яко рабъ мьньшу брату, повинуяся ему. Сь же молитвою, а философъ словесы преможеть я, и посрамисте. Видевъ же цьсарь и патриархъ подвигъ его, добръ на Божии путь, бедиша и, да быша и святили архиепископа на чьстьное место, идеже есть потреба такого мужа. Не рачьшю же, унудиша и и поставиша и игумена въ манастыри, иже нарицяеться Полихронъ,[207]

емуже есть съмера 20 и 4 спудове[208] злата, а отьць обиле 70 въ немь есть.

Прилучи же ся въ ты дни Ростиславъ, князь словеньскъ, съ Святопълкъмь[209] посъласта из Моравы къ цьсарю Михаилу, глаголюща тако: «Яко Божиею милостию съдрави есмъ, и суть въ ны въшьли учителе мнози, крьстияни из влахъ и из грькъ и из немьць, учаще ны различь, а мы словени проста чадь и не имамъ, иже бы ны наставилъ на истину и разумъ съказалъ. То, добреи владыко, посъли такъ мужь, иже ны исправить вьсяку правьду».[210] Тъгда цьсарь Михаилъ рече къ философу Костянтину: «Слышиши ли, философе, речь сию? Инъ сего да не можеть сътворити разве тебе. Те на ти дари мнози, и, поимъ братъ свой игуменъ Мефедии, иди же. Вы бо еста селунянина, да селуняне вьси чисто словеньскы беседують».

Тъгда не съмяста ся отрещи ни Бога, ни цьсаря, по словеси Святаго апостола Петра, якоже рече: «Бога боитеся, цьсаря чьтете».[211] Нъ велику слышавъша речь, на молитву ся наложиста и съ инеми, иже бяаху тогоже духа, егоже и си. Да ту яви Богъ философу словеньскы книгы. И абие устроивъ письмена и беседу съставль, пути ся ятъ моравьскаго, поимъ Мефедия. Начатъ же, пакы съ покоръмь повинуя ся, служити философу и учити съ нимь. И трьмъ летомъ ишьдъшемъ, възвратистася из Моравы, ученикы научьша.

Уведевъ же такова мужа, апостоликъ Никола[212] посъла по ня, желая видети я яко аньгела Божия. Святи учение ею, положь словеньское Евангелие на олтари Святаго Петра[213]

апостола, святи же на поповьство блаженаго Мефедия.

Бяаху же етера многа чадь, яже гужаху словеньскыя книгы, глаголюще, яко не достоить никоторомуже языку имети буковь своихъ, разве евреи и грькъ и латинъ, по Пилатову писанию,[214] еже на крьсте Господьни написа. Еже апостоликъ, пилатъны и трьязычьникы нареклъ, проклятъ. И повеле единому епископу,[215] иже бе тоюже язею больнъ, и святи от ученикъ словеньскъ три попы и 2 анагноста.[216]

По деньхъ же мнозехъ философъ, на Судъ грядыи, рече къ Мефодию, брату своему: «Се, брате, ве супруга бяхове, едину бразду тяжаща, и азъ на лесе падаю, свои дьнь съконьчавъ. А ты любиши гору[217] вельми, то не мози горы ради оставити учения своего, паче бо можеши кымь спасенъ быти».