Том 2 (XI-XII века, переводная литература)

Посълавъ же Коцель[218] къ апостолику проси Мефодия, блаженаго учителя нашего, да бы и ему отпустилъ. И рече апостоликъ: «Не тебе единому тъкъмо, нъ и вьсемъ странамъ темъ словеньскыимъ сълю и учитель от Бога и от святаго апостола Петра, пьрваго настольника и ключедьржьця цьсарьствию небесьному». И посъла и, написавъ епистолию сию: «Андрианъ, епископъ и рабъ Божии, къ Ростиславу и Святопълку и Коцьлю. Слава въ вышьнихъ Богу и на земли миръ, въ человецехъ благоволение,[219] яко о васъ духовьная слышахомъ, на няже жадахомъ съ желаниемь и молитвою вашего ради съпасения, како есть въздвиглъ Господь сьрдьца ваша искати его и показалъ вамъ, яко не тъкъмо верою, нъ и благыими делы достоить служити Богу, „вера бо без делъ мьртва есть",[220]

и отпадають ти, иже „ся мнять Бога знающе, а делы ся его отъметають".[221] Не тъкъмо бо у сего святительскаго стола просисте учителя, нъ и у благоверьнаго цьсаря Михаила, да посъла вамъ блаженаго философа Костянтина и съ братъмь, дондеже мы не доспехомъ. Она же, уведевъша апостольскаго стола достающа ваша страны, кроме канона не створисте ничьсоже, нъ къ намъ придосте, и святаго Климента мощи несуще.[222] Мы же, трьгубу радость приимъше, умыслихомъ, испытавъше, посълати Мефодия, свящьше и съ ученикы, сыну же нашего на страны ваша, мужа же съвьршена разумъмь и правоверьна, да вы учить, якоже есте просили, съказая кънигы въ языкъ вашь по вьсему цьркъвьному чину испълнь, и съ святою мъшею, рекъше съ службою, и крьщениемь, якоже есть философъ началъ Костянтинъ Божиею благодатью из молитвы святаго Климента. Такоже же аще инъ къто възможеть достоино и правоверьно съказати, свято и благостьно Богъмь и нами и вьсею кафоликиею и апостольскою Цьркъвью буди, да бысте удобь заповеди Божия навыкли. Сь же единъ хранити обычаи, да на мъши пьрвее чьтуть Апостолъ и Евангелие римьскы, таче словеньскы. Да ся испълнить Книжьное слово, яко „въсхвалять Господа вьси языци",[223] и другоиде: „Вьси възглаголять языкы различьны величья Божия, якоже дасть имъ Святый Духъ отвещавати".[224]

Аще же къто от събьраныихъ вамъ учитель и чешющихъ слухы и от истины отвращающихъ на бляди начьнеть, дьрзнувъ, инако развращати вы, гадя книгы языка вашего, да будеть отълученъ не тъкъмо въсуда, нъ и Цьркъве, донде ся исправить. Ти бо суть вълци, а не овьця,[225] яже достоить от плодъ ихъ знати

и хранити ся ихъ.

Вы же, чада възлюбленая, послушаите учения Божия и не отринете казания цьркъвьнаго, да ся обрящете истиньнии поклонителе Божии, отьцю нашему небесьному, съ вьсеми святыими. Аминь».

Приятъ же и Коцьлъ съ великою чьстью и пакы посъла и къ апостолику и 20 мужь чьстьны чади, да и ему святить на епископьство въ Панонии, на столъ святаго Андроника от 70,[226] еже и бысть.

По семь же старыи врагъ, завидьливыи добру и противьникъ истине, въздвиже сьрдьце врагу моравьскаго короля[227] на нь съ вьсеми епископы, яко „на нашеи области

учиши". Онъ же отвеща: «И азъ аще быхъ веделъ, яко ваша есть, кроме быхъ ходилъ. Нъ святаго Петра есть. Да правьдою аще ли вы рьвьния ради и лакомьства на старыя пределы поступаете черосъ каноны, възбраняюще учения Божия, блюдетеся, еда како хотяще железну гору костянъмь теменьмь пробити, мозгъ вашь излеете». Реша ему яро, глаголюще: «Зла добудеши». Отвеща онъ: «Истину глаголю предъ цьсари и не стыжюся,[228] а вы творите волю вашю на мне, несмь бо лучии техъ, иже суть, правьду глаголюще, многами муками и жития сего избыли». Многамъ же речьмъ прогоненамъ и не могущемъ противу ему отвещавати, рече король изниця: «Не тружаите моего Мефодия, уже бо ся есть, яко и при пещи употилъ». Рече онъ: «Еи, владыко. Философа потьна инъгда съретъше, людие реша ему: „Чьто ся потиши?" Дееть онъ: „Съ грубою ся чадью пьрехъ"». О томьже словеси съпьревъше, ся разидоша, а оного, засълавъше въ Съвабы, дьрьжаша полъ третья лета.

Доиде къ апостолику. И уведевъ, посъла клятву на ня, да не поють мъша, рекъше служьбы, вьси королеви епископи, донде и дьрьжать. И тако и пустиша, рекъше Коцьлу: «Аще сего имаши у себе, не избудеши нас добре». Нъ они не избыша святаго Петрова суда, 4 бо от нихь епископи умьроша.

Приключи же ся тьгда моравляне, очющьше немьчьскыя попы, иже живяаху въ нихъ не прияюще имъ, нъ ковъ кующе на ня, изгънаша вься,[229] а къ апостолику посълаша: «Яко и пьрвее отьци наши от святаго Петра крьщение прияли, то дажь намъ Мефодия архиепископа и учителя». Абие же посъла и апостоликъ. И приимы и Святопълкъ князь съ вьсеми моравляны и поручи ему вься цьркъви и стрижьникы въ вьсехъ градехъ. От того же дьне вельми начатъ расти учение Божие и стрижьници множитися въ вьсехъ градехъ от тогоже начатъ расти и множитися и погании веровати въ истиньныи Богъ, своихъ блядии отметающеся. Тольми паче и Моравьска область пространити начатъ вься страны и врагы своя побежати и съ непогрешениемь, яко и сами поведають присно.

Бе же пророчьска благодать въ немь, яко ся суть събывала многа прорицания его. От нихъже ли едино ли дъве съкажемъ.