Том 2 (XI-XII века, переводная литература)

Яко дьрзый и бе-щинень языкь умрьщвяеть имущаго и егоже держати потреба на похвалу и на славу Божию.

Въ нейже о блазе житии и несварливе къ себе, от славохотия суща от премудрости человечьскы.

О Божии премудрости.

Яко от уныниа и сластолюбиа реть и неустроение и вражда на Бога бываеть.

О покаании на спасение и не осуждати искрьняго.

Яко не о человеце, нъ о Бозе ступаниа мужу управляются.

Въ нейже о лихоимании богатых, и нищихъ, яже въ мире, и о праведне суде Божии.

О долготерпении, и о претерпении страсти, и о истине.

Поучениа комуждо до подобнасуща съ верою.

Яко послужити подобаеть спасению искрьняго.

<Толкование>. Якоже бо се мирьстии человеци въ списаниихь жизньных именъ своими санъми наменятися любять, тако и апостоли въ начятцех съписаний своихъ раби Бога Исус Христа наменятися любять. Разумети бы, яко друзии чюжу творять епистолию сию Иаковлю, якоже рече Евсевий[244] въ «Церковней повести».[245]

КНИГИ ОБЩА, ПУЩЕНЫ ИЯКОВОМЬ КЪ ВЕРОВАВШИМЪ ЖИДОМЪ[246] 1. Сущее

Иаковь, Богу и Господу Исус Христу рабъ, обеманадесяте коленома, иже въ расеянии, — радоватися.[247]

Толк. Кыиждо апостоль, посылая подобное посланиа, честь себе сътваряеть, еже есть сподобитися нарещи рабом Христовомь, рекше обрезания сый апостоль,[248] сущиим от двоюнадесяте колену посылает веровавьшимъ.

Дидимъ.[249] Якоже бо мира сего человеци въ списании житейскых вещех, яже о нихь санове повелевають быти, тако и апостоли в начяле съписаниа ихь раби Божии и Христови нарещи сподобляются.

2. Сущее

Всяку радость имейте, братие моа, егда в напасти[250] въпадаете различны, ведуще, яко искушение вере вашей съдееть терпение,[251] а терпение дело съвершено[252]

да имать, да будете съвершени отинудь и исполнени и ни единого лишени суще.

Толк. Златоуст.[253] Уза бо есть печаль непретъргома, любви въздрастение, умилению и говению начяло. Слыши бо рекша: «Аще приступаеши работати Христу, приготовай си душу к напастемъ».[254] И Христос же пакы глаголаше: «Въ мире печаль имате, нъ дерзайте».[255] И пакы: «Тесный и скорбный путь».[256] Видиши ли всюду печали похваляемы, всюду приемлему, яко изрядну сущу нам, ибо внешними подвигы никтоже бес тоя венца прииметь,[257] аще не труды, и алканиемь, и бдениемь, и тьмами етерыми таковыми себе оградить».[258]

3.

Аще ли кто от вас лишенъ есть премудрости,[259] да просить просто у Бога, дающаго всем обилно, и не понашающу, и дасться ему. Да просить же верою, ничтоже сумняся.[260]

(Толк). Господь и Богъ нашь како молитися своа учить ученикы? И еже в разуме сластий искуса молитися повелевает, и «не въведи нас въ искусъ»,[261]

сластных являя и разумных и волных искусъ не оставленом быти искусъ прияти, се же ведуще, яко искушение вашея веры съделоваеть терпение. Терпение же дело съвръшено да имать, да съвръшени и всенаследни явитеся, ни въ чемже недостаточьствующе.[262]

4. Сущее

Сумьняй бо ся[263] подобенъ есть волнению морьску, от ветра възмещающася и раздевающася.

Толк. Вину нам кажет съвръшена делесе, се бо есть мудрость горняя,[264] еже силу вземлюще, чресь естьство можемъ сътворити благодати.

Хулникъ бо исповедомо расмотряя и. Аще бо веры не имеши, яко свое прошение[265] сконьчаеши, то отинудь не приходи, да не ся обрящеши на Тъ глаголя, еже все можеть, на двое душею и не хотя. Нъ подобает тако стыдкыя отрицатися язя.[266]

5. Сущее

Мужь дводушенъ[267] нестроинъ въ вся пути своа. Да хвалить же ся брат смерениемь въ высоту свою, а богатый въ смерении своем,[268]

зане яко цвет травный мимоидеть.[269] Въсия бо сльнеце с варом[270] и иссуши траву, и цвет ея отпаде, и красота лица ея погыбе. Тако богатый въ хожении своем увяжеть.[271]

Толк. Отъими от себе дводушие и отинудь не дводушьствуй, прося от Бога, и глаголяй въ себе, яко: «Како могу просити что от Господа и прияти, съгрешивъ толико к нему?» Не помышляй таковаго, нъ от всего сердца своего обратися къ Господу и проси у него, не сумняся, и разумей многое милосердие его, яко не оставить тебе, нъ прошение душа твоея исполнить. Несть бо Богъ, яко человеци, злопомняще другъ другу, нъ То непамятникъ злу есть, и милосердъ есть на свою тварь.

6. Сущее

Блажень мужь, иже претерпить напасти, яко искушенъ бывъ, прииметь венець животный,[272] иже уготова Богъ любящимь и.

Толк. Доволне повелевает противустати искусом с радостию. Да будет искушено дело и терпение свершено. Съврьшают же ся си сама о себе, а не инеми сдеваема. И етеру учению покарятися поручи исправлятися предлежащая, обещаниа ради блажену быти, глаголя: «Иже искусъ претерпить, искусенъ мужь всеми облаженъ».[273]И тако явльшуся от печали, дасться венець жизни, уготованый от Бога любящимъ его. Таковый нерадивый и о самой той смерти венець вечныя тоя жизни въсприиметь, иже величьства ради Божиа зраку и слуху не подлежить, ни на высокый разумъ человеку не възиде.[274]

В нейже о ражчьжении сущих въ нас и страстехъ, яже от него, яко не от Бога вина, аще бо что благо нам — от него

7. Апостоль