Том 2 (XI-XII века, переводная литература)

Никтоже въ напасть въпадая да глаголеть, яко: «От Бога напасть ми есть». Богъ бо несть напастьникъ злымъ, не напастить же тъ ни единого.[275]

Толк. Ориген.[276] Егдаже Богъ искушает, на ползу искушает, а не зло сътворити. Темь и рече ся, яко «Богъ не искусенъ есть злу», нъ того ради искушает, да улучать благаа, и да изменятся злых. Темь и рече: «Претерпевый искусы доблестьне венчается». Ино же есть о диаволе — онъ бо искушаеть, да не покаряющаяся ему умрътвить. Нъ онъ не ведый будущих.

Богъ же ведый будущее, дая человекомь делати, еже хотять, яко сущемь самоволномь.

8. Сущее

Нъ комуждо напасть от своея похоти[277] влекомь и прельщенъ бывая.

Толк. Севирово.[278] Неции бо предлежащее ветийскы тако искусиша быти, рекше самую ту похоть безаконию матерь прозывати Давиду,[279] яже бе-щиннаго ради похотениа заченши и рождьши, греха раждаеть. Темь посылая, Иаковъ рече, единъ от мудрых Христовыхъ ученикъ: «Кождо искушается от своея похоти влеком и прельщаем. Таче похоть заченши ражает грех, грехъ же скончанъ раждает смерть». От таковыя похоти родити и зачятися грешныих матере, якоже веща Давидъ.

9. Сущее

Потом же похоть, непраздна бывши, раждаеть грех, а грехь скончанъ раждаеть смерть.

Толк. Златоуст. Единаче бо есть творити грех, от сласти упивающеся, и тако не чюем. А егдаже родится и прииметь конець, тогда паче сласти угасши всяцей, горкое разума находить жало. Противное раждающимь женамъ: нъ о тех убо преже рождения многа болезнь растерзающи бо кыих, по рождьстве же ослаба, младенцу болезни ищьдъшю.[280] О насъ же не тако. Нъ донележе болим и зачинаем тленныя разумы, веселимся и радуемся, а егдаже родимь лукавый детищь грехь, тогда, студъ рождьшагося видевше, болим и растерзаем ся раждающих женъ горее. Темь молю вы не приимати изначала похоти. Аще ли же и приимемъ, удавимъ внутрь семена. Аще ли же и уныемъ до изития въ дело греху, убиимы и пакы исповеданиемь, съ слезами осуждающе себе сами. Ничтоже бо тако погубляеть грехы, яко осуждение в разуме.

Исихия.[281] Болезни смерти грешных похоти суть.

10. Сущее

Не прельщайтеся, братие моа възлюбленая: всяко дание благо и всякь даръ свершенъ свыше есть, съходяй от Отца светиломъ[282]...

Толк. Не прельщайтеся, мняще от Бога быти искусом. Или словесныя силы светила именова ти или просвещеныя Духомь Святымь.

11. Сущее

...от негоже несть изменениа ни различиа въ осенении.

Толк. Севирово. Глаголюща бо есть слышати Бога: «Аз есмь, азъ есмь и не изменяюся»,[283] и само то есть в себе огустеваяи, а не разливаем по сущьству. По Благовествованию же живущим и по деянью заповеди прелагающимъ от вышняго дара и сущьства, неизменное въ сущихъ житию начинание предложению бывает и не сложение временем. Темь и Павелъ послушьствует глаголя: «Не преобразуйтеся въ веце семь, нъ преобразуйте обновление разума вашего искушающе, что есть воля Божиа, благо и угодно и съвръшено».[284]

12. Сущее

Въсхотевъ роди ны словомь истины...

Толк. О сыне убо истинне глаголеть рождьство, о твари же по благостыни. О ономь бо истины ради и о единосущьстве — о семь же чьсти ради сыновлениа. Въсхотевь бо, веща, роди ти ны словом истины.[285]

13. Апостоль

...быти намъ въ начятокь[286] некый тварем его.

Толк. Первейше, веща, и чьстнейше. Твари же видимую тварь нарече, еяже чьстнейша человека яви. И сама бо тварь чаеть нашеа свободы, да с нами свободится.[287]

О кротости и чистоте и дателне блазе подателне на блаженьство и о художьствии и мере словеси 14. Сущее

Темже, братие моа възлюбленая, да будеть всякь человекь скоръ услышати, медленъ глаголати,[288] медленъ въ гневь. Гнев бо мужу правды Божиа не съдеваеть. Темже отвергъше всяку скверну и избытокь злобенъ[289]...

Толк. Еже есть грех, оскверняющь человека, яко избыточенъ сущь въ насъ, не бо по естьству нам зломь быти, нъ извону бываеть нам от неродства, и в то нас быстрящем бесомь, и внутрьнимь нашимь от неразумнаго изволениа имущемь.

15. Сущее

...въ кротости приимете истое[290]

слово, могущее спасти душа ваша. Будете же творци слову, а не токмо послушьници.

Толк. Рекше «истиненъ». Исповъданиемь же явлено, яко нетленьном намъ быти устраяюще, понеже и Богъ изначяла създа человека на нетьление.

16. Сущее

...помышляюще въ себе.

Толк. ...замышляющн сами о себе и не радяще о своемь спасении.

17. (Иак. 1, 23).

Яко иже есть послушникь слову, а не творець...

Толк. Аще кто, веща, будеть слову токмо послушатель, а не известить делы послушаниа, абие и слово погубить.

18. Сущее

...се подобенъ есть мужу, разумевающу лице твари[291] своея въ зрьцале. Разуме бо ся, и отъиде, и абие забы, како бе. А приникый въ Законъ съвръшенъ и свободенъ,[292] и пребывь не послушникь незабытливь, нъ творець делу. Сь блаженъ въ твари своей есть.