Том 2 (XI-XII века, переводная литература)

Толк. Якоже бо онъ тело видить, тако и сь закона ради како бысть? Темь не «лице» рече токмо, нъ «лице рождениа». Уведехомь бо, сыны нас сътвори духовный законъ, родивь банею пакы порождениа.[293] Таче же и не пребывающе въ такомь видении деяний ради, и благодати дара забываем. Ибо деяниемь себе лукавомъ отдавъ, благодеяниа от Бога не поминает, ни поминает же, яко съвыше родися, и оправдися, и освятися, и въ сыны въменися Божиа, и въ дела ся преда отметающих благодать.

19. Сущее

Аще кто мнит ся веренъ быти въ васъ, не въстязая языка своего, нъ льстя сердце свое, сего суетна вера. Вера чиста и нескверньна от Бога и Отца си есть[294]...

Толк. Златоуста. «Аще кто, — веща, — мнит ся», нъ не истиною быти, аще бо всяко ни самого языка не въхласть, но научи и своего тъщеверия, сердцу поруга. Темь и рече: «Мняи ся стояти» и прочяя. Ибо истинне стоящаго падение видевъ, съведетельствова и по писание веры правы.

20. Сущее

...посещати сиротъ и вдовиць въ скорбех ихь, нескверьна себе блюсти от всего мира.[295]

Толк. Златоуста. Миловати и щедрьствити, аще ли сего не имамъ, всего лишени есмы. Не рече бо: «Аще поститеся, подобни есте Отцу вашему». Нъ что рече? «Будете щедри, якоже Отець вашь небесный».[296] То бо есть дело Божие. Аще сего не имаши, ничтоже имаши. «Милости хощу, — рече, — а не жертве».[297]

О любвии, сущии къ комуждо нелицемерне по закону 21. Сущее

Братие моа, не на лица зряще имейте веру Господи нашему Исус Христу славе.

Толк. Златоуста. Что ради ты велемудруеши, веща, и что ради пакы инъ тебе уничьжаеть? Не тело ли едино есмь вси,[298] и велиции, и малии? Аще бо въ начале съединяемся и другъ другу уди, почто раскалаеши самь себе? Что срамляеши брата? Якоже бо онъ твой удъ, тако и ты оного. И много о семь единочьстие.

22. Сущее

Аще бо внидетъ въ сънмище[299]

ваше мужь, златъ перстень нося, въ ризе светле, внидеть же и нищь въ ризе скверньне, и възрите на носящаго светлу ризу, и речете ему: «Ты седи сде добре». А нищему речете: «Ти стани тамо или седи сде въ подножие ми». И не расмотристе въ себе, и бысте судиа помышлениемь злымь?

Толк. То же о друзех смысляще: придеть убогый, буди по том мыслию, не болша положи чьсти богатства ради. Несть нища, ни богата о Христе. Не срамляйся внешнею одежею, нъ приими внутрьняя ради веры.

23. Сущее

Слышите, братие моа възлюбленая! Не Богъ ли изъбра нищая всего мира богати въ веру и наследници Царствию,[300] егоже обеща любящимъ его Богъ? Вы же укористе нищаго.

Толк. Златоуста. Мы же, яко повелику преобидими, тако просящая уничьжаем, досаждающе, отвращаемся, не дадуще, что печалуеши? «Утешайте, — рече Павелъ, — яко братию, а не досаждайте, яко врагомъ».[301] Утешаяй же брата своего не пред человекы се створи,[302] нъ особь, и съ многом вниманием, и болезнию устрекаем, и слезами, и рыданиемь, братьскы от сердца подавающе, братьскы утешающе изволениемь, не боляще о подании, боляще же о ономь преступлении приобретения ради. Аще бо о подании досадиши, погубляеши даръ. Аще ли же и не давъ, поносиши, како не съделаль еси зла страстному оному окаяному? Приде бо помилованъ быти тобою, приимъ же язву отъиде. Паче же и прослези, нудимь бо есть скудости ради просити, и того ради досаждаеши ему. Виждь, колика мука досаждьшему убогому, раздражаеть бо сътворшаго и. Рече бо: «Еда самъ ся сътвори нищь? Нъ тебе ради, да ты спасешися имь».[303] И тебе ради нища бывша уничьжаеши? Колико неразумие и колико неблагодарение дела сего!

24. Сущее

Не богатии ли обладають вами и ти влекуть вы на судища? Не ти же ли хулять доброе имя, нареченое на васъ?

Толк. Претерпевайте доблестне лихоимьство, лихоимьци бо себе погубляють, а не нас. Насъ бо лишають имений, а себе обнажают промысла Божиа и помощи его. Еяже обнажьшеся, аще и всея вселеныя съберуть богатство, всех суть убожейше.[304]

25. Сущее

Аще убо Законъ кончаваете царскъ,[305] по Книгам,[306] възлюбиши искрьняго твоего, яко и сам себе, добре творите. Аще ли на лица зрите, грех творите, обличающеся от Закона, яко преступници.

Толк. Аполинариево.[307]

Якоже паче ты хощеши помиловати ближняго си, праведне и человеколюбне, тако и тъ творить къ единочадну ти и самому сущу Богу. Естьственый помыслъ, в немьже всех Спасъ в начяли глаголя: «Аще хощете, да творять вам человеци, якоже и вы творите имь, тако бо есть Законъ и Пророци».[308]

26. Сущее

Иже бо весь Законъ съблюдет, съгрешить же въ единомъ, бысть всемъ повиненъ.

Толк. Еже съвершену имети любовь, то есть глава всемъ добромъ. Аще ли главу отвержеши, излиха прочее тела есть.

27. Сущее

...рекый бо: «Не прелюбы сътвори», си рече и «Не убий». Да аще не любы твориши, убиваеши же, бысть преступникь Закону.[309]