Том 6 (XIV - середина XV века, литература времени национального подъема)

И ты, господине князь Юрьи, не подиви на нас о семъ, понеже, господине, слышу, что божественное Писание самъ вконец разумееши и чтеши. Ведаешъ сам, каковъ намъ вред приходит от похвалы человечьския, наипаче же надстрастнымъ. Аще, господине, и кто воистинну святъ и чистъ сердцемъ, но и темъ повреждение бываетъ от тоя тяготы. А намъ, господине, всякой страсти повинным, велика спона души от того.

Еще, господине, сам сего поразсуди: понеже твоея вотчины в сей стране нет, и толко ты, господине, поедешь семо, ино вси человецы начнут глаголати: «Кирила деля токмо поехалъ».

Былъ, господине, здесе брат твой, князь Ондрей;[805] ино, господине: — его отчина, и намъ пришла нужа: нелзе намъ ему, своему господину, челом не ударити. А ты, господине, Бога ради не учини того, что ти к нам ехати.

Аз, господине, аще и грешен есмь, а рад Бога молити и Пречистую Его Матерь со своею братиицею о тебе, о нашемъ господине, и о твоей княгине, и о твоих детках, и о всех християнехъ, иже под властию твоею, якоже ти, господине, и преже сего писах. А Пречистая Богородица, Владычица наша, помилует тя, и покрыетъ тя ризою своею честною, и наставитъ тя въ разумъ истинный, и управит тя во царствии Сына своего за молитвъ святых. Аминь.

ПОСЛАНИЕ КИРИЛА ЧЮДОТВОРЦА КО КНЯЗЮ АНДРЕЮ ДМИТРЕЕВИЧУ[806]

Господину благоверному князю Андрею Дмитреевичу — Кирил, чернечище грешный и непотребный, со своею братиицею.

Много челом бьем и Бога молим о вашем здравии, господей наших, поминая, господине, твою любовь, что имееши к Пречистой Богородицы, и к нашей нищете поминая, господине, твою великую любовь и доволную милостыню, нашего господина.

Да что ми еси писал о преславном чюдеси Пречистыя Богородицы, паче слова и смысла преславная чюдеса, — слава Тебе, Боже! слава Тебе, Крепкий! слава Тебе, Безсмертный, хвалимый в Троици всеми небесными силами и родомъ человеческимъ! Молитвами пречистыа Матери Своея, такову излия милость в последний сей род, услыша моление Матере Своея о роду християньском.

Слыши, господине князь Ондрей, Ветхое Писание: егда восхощет Богъ кою землю показнити за нечестие, посылает преже проповедники, дабы обратилися. И аще обратятся, отводит Господь от них Свой гнев, мимоводит скорбь, и прелагаетъ печаль на радость, и показуетъ на них Свою милость.

Господине князь Андрей! Намъ ныне, видевше Пречистыя госпожа Богородица преславная ея и великая чюдеса, и о томъ, господине, радоватися сердцем и душею устрашитися на всякъ часъ, что сподобил насъ Богъ Пречистою Своею Материю в последний сей родъ таковыми знаменми и чюдесы избавити християнский род от нашествия иноплеменных враг. И намъ, господине, ныне, видевши на насъ Божию милость и Пречистыя Богородицы помощь, поминати бы грехи своя и о том бы плакатися и просити у Бога милости и у Пречистые Его Матери помощи на благая дела. И аще видить нас милосердый Господь в сокрушении и сетовании ходяща, не презритъ насъ, якоже Ниневитяны, но обычнымъ си человеколюбием помилуетъ.

Благаго и преблагаго Бога благодарити должни есмы, Того бо есмы создание и раби, честною Его кровию искуплени есмы. И ты, господине князь Андрей, видя челоеколюбие и милосердие Господа нашего Исуса Христа, что гневъ Свой от нас отвелъ, а милость Свою явил народу християнскому, молитвами Пречистыя госпожа Матере Своея, и ты, господине, смотри того: властель еси во отчине отъ Бога поставленъ, — люди, господине, свои смиряй отъ лихово обычая. Судъ бы, господине, судили праведно, какъ предъ Богомъ право. Поклепом бы, господине, не было. И подметом бы, господине, не было же. Судьи бы посулов не имали, доволни бы были уроки своими, понеже сице глаголеть Господь: «Да не оправдиши нечестиваго мъзды ради,[807] ни силна, ни богата устыдися на суде, ни брата свойства ради, ни друга любве ради, ни нища нищеты ради. Ни сотвориши неправду на суде,[808] яко судъ истиненъ есть; проклят всякъ неправо судя». Пророкъ рече: «Ярость Господня на них неизцелна до века, и огнь поястъ нечестивыя» — мзды ради, иже неправдою взимают. Судяи праведно, без мзды, спасени будут и царство небесное наследуют.

И ты, господине, внимай себе, чтобы корчмы в твоей отчине не было, занеже, господине, толика погуба душам: християне ся, господине, пропиваютъ, а души гибнут.

Такоже, господине, и мытов бы у тобя не было, понеже, господине, куны неправедныя. А где перевоз, тут, господине, пригоже дати труда ради.

Такоже, господине, и разбоя бы и татбы во твоей отчине не было. И аще не уймутся своего злаго дела, и ты их вели наказывати своимъ наказанием, — чему будут достойни.

Такоже, господине, уймай под собою люди отъ скверных слов и от лаяния, понеже то все прогневает Бога. И аще, господине, не подщишися всего того управити, все то на тебе взыщетъ, понеже властель еси своимъ людемъ от Бога поставлен.

А християномъ, господине, не ленися управы давати самъ: то, господине, выше тебе от Бога вменится и молитвы и поста.