Том 6 (XIV - середина XV века, литература времени национального подъема)

Воспоминаимъ, господине, надежду будущаго века и царство небесное, радость святых и веселие съ аггелы, надо всеми же зрение пресладкаго лица Божиа: То бо воистинну доброта неизреченная, весь сладость и желание и любовь несытая всемъ любящим Его и творящим пречистую волю Его.

Да слышал есми, господине князь великий, что смущение велико межу тобою и сродники твои, княжми Суждалскими: ты, господине, свою правду сказываешъ, а они свою. А в том, господине, меж васъ християном кровопролитие велико чинится. Ино, господине, посмотри того истинно: в чем будет их правда пред тобою, и ты, господине, смирением своимъ поступи на себе. А в чемъ будет твоя правда пред ними, и ты, господине, за собя стой по правде. А почнут ти, господине, бити челом, и ты бы, господине, Бога ради пожаловал их по их вере, занеже, господине, такъ слышалъ есмь, что доселе были у тебе в нужи, да отътого ся, господине, и возбранили. И ты господине, Бога ради покажи к ним свою любовь и жалование, чтобы не погибли в заблужении в Татарских странах, да тамо бы не скончалися.

Занеже, господине, ни царство, ни княжение, ни иная кая власть не может нас избавити отъ нелицемернаго суда Божия. А еже, господине, возлюбити ближняго яко себе и утешити душа скорбящая и озлобленыя много поможет на страшнемъ суде Христове, понеже пишетъ апостолъ Павел, ученикъ Христовъ: «Аще имам веру горы преставляти, аще имамъ раздати все имение мое, любве же не имамъ, ничтоже полза ми есть».[802] Возлюбленный же пишет Иоан Богословъ: «Аще кто речет: “Бога люблю, а брата своего ненавижу”, — ложь есть».[803] Темже и ты, господине, возлюби Бога от всея душа своея, тако возлюби и братию свою и вся христиане. И так, господине, вера твоя к Богу, милостыня твоя к нищим богоприятна будетъ.

А милость Божия и Пречистыя Богородицы на тебе, на моем господине, на великом князе Василье, да будет, и на твоей великой княгине, и на ваших детках, и мое благословение и молитва и моей братии. Аминь.

ТОГОЖЕ ЧЮДОТВОРЦА КИРИЛА ПОСЛАНИЕ КО КНЯЗЮ ЮРЕЮ ДМИТРЕЕВИЧЮ[804]

Господину благоверному князю Георгию Дмитреевичю — Кирилище, чернечище грешный, со своею братицею. На твоей, господине, на частой еже къ намъ, нищымъ, милостыне много челомъ бием. Радуемся, господине, видя и слыша твое доброе произволение, — что от всея душа уповаеш на Бога и на Пречистую Его Матерь и от нас, воистину недостойных и грешных, посланное к тебе слово твориши приятно.

А что, господине, скорбишъ о своей княгине, что въ недузе лежит, ино господине, воистинну вемы, яко нечто смотрение Божие и человеколюбие Его бысть на вас, — чтобы есте исправились к Нему. И вы, господине, посмотрите себе, покайтеся от всея душа своея, и отъ того бы престати. Занеже, господине, аще кто и милостыню творит, аще и молити Бога за себя велит, а сам не отстанетъ неподобных дел своих, ничтоже ползует себе, ниже Богъ благоволит от таковых приношения. И вы, господине, посмотрите себе, исправитеся къ Богу невозвратно. И аще, господине, сице обратитеся к Богу, и аз грешный поручаюсь, яко проститъ вамъ благодатию Своею вся согрешения ваша и избавитъ вас от всякия скорби и беды, а княгиню твою здраву сотворит.

Мы, господине, грешнии отъ всея душа своея ради Бога молити о ней, чтобы ея помиловал и облехчил от болезни тоя тяжкия. И аще ли, господине, тако пребудет в недузе том, то воистинну, господине, веждь, яко нечто добродетели ея хощетъ Богъ упокоити ю отъ маловременныя сея и болезненыя жизни ко оному нестареющемуся блаженству.

Ты же, господине, не скорби о сем, видя сию идущу в безконечный покой, в светлость святых, в неизреченную славу Божию, и тамо зрети пресладкаго лица Его и со Христомъ быти и, обретъ Его, радоватися во стране живущих, идеже глас веселящихся. Но надеемся, господине, на милость Божию, яко не оскорбитъ Господь, но благодатию Своею помилуетъ и утеши тя.

И Пречистая госпожа Богородица и Царица наша поможет ти, что нас, господине, нищих ея, не забываешъ, в пустом семъ месте собравшихся во обитель ея, но часто призираеши доволными милостынми своими. О всех же сих, господине, мы грешнии ничтоже можемъ воздати тебе, но Пречистая Богородица воздастъ ти множае в сий векъ и в будущий. А язъ, господине, грешный со своею братицею ради Бога молити и Пречистую Матерь о твоемъ здравии и спасении, и твоей княгине, и о твоихъ детках, и о всех християнех, порученных тебе.

А что еси, господине князь Юрье, писал ко мне грешному, яко: «Издавна жадаю видетися с тобою», — ино, господине, Бога ради не мози того учинити, что ти к нам ехати, занеже, господине, вемъ, яко нечто моихъ ради греховъ то искушение приидет на мя, аще поедешь ко мне. Занеже, господине, известую ти: не мочно ти нас видети. Покиня, господине, и монастырь, да ступлю прочь, куды Богъ наставитъ. Понеже, господине, вы чаете мене здесе, что яз добръ и святъ, ано, господине, въистинну всех есми человекъ окаяннее и грешнее и всяго студа исполненъ.