Том 6 (XIV - середина XV века, литература времени национального подъема)

И поеха царь от збора из Флорензы месяца августа 26. И проводиша его с честию гардиналове вси и бискупы, и весь народ града того, с трубами и свирельми; и несоша над ним небо наряжено[914] 12 человекъ; а коня под ним ведоша пеши два ратмана болшие града того.

Месяца септевря 24 папа служил въ церкви святаго Иоанна Предтечи. И по службе гардиналове и арцыбискупы и бискупы изволоклися в ризы, множество их. И ту седяше рускый Исидоръ да греческых 12 въ тех же манатияхъ, а папа седяше на престоле злате въ святительском сану. И взыде на высоко место бискупъ, именемъ Андрей, и нача чести грамоту неблагословеную, и прокля съборъ Базмейскый Аламанские земли, занеже не пришли на соборъ к папе, а учинили себе соборъ, не хотя повинутися папе; и того деля их прокля.[915]

И того же дни Сидоръ и Аврамий, владыка русский, благословилися у папы на Русь, и поиде из Флорензы на Русь месяца септября въ 6.

От Флорензы до града Корпиа 13 миль, От Корпиа до града Флоренца 12 миль. От Флоренца до града Кравениа 17 миль. А от Кравена до града Болоньи 23 миль; той же град велик. От того града поиде господинъ рекою Фарою, а кони берегом. К Фаре от Болоньи 40 миль. От Фары поиде рекою Повою, да и кони провадили тою же рекою в судехъ. От Фары до града Кезы 80 миль,[916] той град у Белого моря на брезе, ту родится соль крупна.[917]

От Кезы до града Венеции 25 миль, а шли морем. А той град стоит на мори, а суха пути к нему нетъ, а от берега 13 миль стоит в море. Среди его проходят корабли и катарги, а по всем улицам воды, ездят в барках.[918]

Но велми град той великъ, и полаты в нем чюдны, а иные позлачены. И товару в нем всякого полно, занеже корабли приходят изо всех земель, от Иерусалима и от Царяграда, и от Азова, и ис Турьские земли, и ис Срачинъ,[919] и из Немець.[920] Есть в граде том цръковь камена святый Марко Еуангелистъ, и столпы в ней морованы, имущи мрамор всякъ цветом; а иконы в ней чюдны, гречин писал мусиею, и до верху видети велми чюдно; а внутри резаны святые на мраморе велми хитро; а сама велика церковь. А надъ предними дверми изнутри поставлены 4 кони медяны, позлащены, велики, видети яко живи, и повешены два змия великы убиты. Ту и сам святый Марко лежит; а мощей святыхъ много, иманы изъ Царяграда. И монастырей много около града того по островом на море близь, и иных церквей въ граде том.

Въеха господинъ въ град той месяца септевря 15. Видехом в том же граде, в монастыре святаго пророка Захарии за престолом, в раце камене отца Иоанова Предтечи и святаго Григориа и Федора во единой раце, и ту черньцевъ 63. В том же граде, в монастыре святые Варвары, мощи ее в теле лежать, трупъ без главы.

И поиде господинъ из Венеции в корабле месяца декамбря 22. И приста корабль к острову. И ту монастырь святаго Николы, и ту сам святый Никола лежит. И видехом гробъ его въ церкви на четырехъ столпех, учинено по лествице 6 степени, и знаменахомся у гроба святаго, самого не видехом, замурован бе лежит; с ним дядя его, да Федоръ в едином гробе. И въпрошахом игумена монастыря того, откуды мощи святаго Николы взяты; они же поведаша: «От Бара града слали венетяне 100 катаргъ, да 3 корабли с житом, и взяли мощи». И стоя корабль нашь два дни, зане ветръ противенъ. И поидохомъ на море в корабли на Рожество Христово.

И поидохом от Венети до града Печери 110 миль. От Печери до града Полы 30 миль; ту бо родится соль на море месяца иуля и августа. И ту стоя наш корабль 10 дней, зане ветръ противенъ. Ис того града поиде господинъ на конех сам-третей, а 15 человекъ пеших с ним, а владыка кораблем, а господиновы боере с ним. А от Полы до града Осоры 8 миль. И ту стоя корабль 10 дней, зане ветръ; и ту родится соль тако же. До града Сени 60 миль; той град стоить у Белово моря межи горъ; ту бо выидохом ис корабля месяца генваря 17.

От Сени до града Брыни 15 миль, а путь лесомъ на горы; и в тех градех живут хавратяне, языкъ с руси, а вера латыньская.

От Мудруши до града Возоля[921] 20 миль; той град древянъ, а река под ним Коленъ. А от Возоля до града Ястреболска 15 миль. От Стреболска до града Окичи 5 миль. От Окичи до града Грева 20 миль; той град великъ и красенъ, а дрьжава угорьскаго царя. И в сем граде видехомъ серпьскаго цесаря деспода съ царицею его и съ детми, запленено бысть црьство его Серпьское от турьскаго царя Амурата.[922] И в том же граде видехомъ во церкви на престоле в раце младенецъ в теле весь цел, от Ирода избиенных во Христово рожество, то же видехом месяца февраля в 7 день.

От Загреба до Раковца 4 мили. А от Раковца до Крижца 3 мили. От Крижица до Копрыницы 3 мили. От Копрыници до рекы Даравы миля. Та убо река у рубежа Словеньской земли с Угорскою землею.[923]