Том 6 (XIV - середина XV века, литература времени национального подъема)

2-й соборъ месяца того же 13. Третий съборъ месяца того же 16. Четвертый съборъ месяца того же 20. Пятый собор месяца того же 25. Шестый соборъ месяца ноября 1. Седмый соборъ того же месяца въ 4. Осмый соборъ месяца того же 8. Девятый съборъ месяца того же въ 11. Десятый съборъ месяца того же въ 18. Первый на десять соборъ месяца того же въ 26. Вторый на 10 соборъ месяца декамбря въ 4. Третий на 10 соборъ месяца того же 8. Четвертый на 10 соборъ месяца того же 13.

В том же граде Фераре на папине дворе възведен столпъ каменъ высокъ и велик, над торгом. И на том столпе устроены часы, колокол великъ; и коли ударит, на весь град слышати; и у того столпа отведено крыльцо, и двои двери; и коли приспеет час и ударит в колокол, и выдет из столпа на крилце аггел, просте видети, яко жив, и потрубит въ трубу, и въходит другыми дверцами въ столпъ; а людем, всем видящим аггела и трубу и глас его слышати; и потом в той же великый колоколъ въсходяще на всяк час аггелъ и ударяше.

И в том же граде ясти купихом: яловица 20 золотых, боров пять золотых, а золотой по 30 грошей; а боран два золотых; гусь 3 гроши, куря 3 гроши, хлеба 9 проскуръ[896]

на грошь, сыръ по золотому.

Пятый на 10 соборъ месяца генваря въ 10, в зборной божнице во имя святаго Юриа. Папе же оболчену сущу въ святительскый сан и в рогате клобуце[897] седяшу ему на высоце месте, а с ним гардиналовъ и бискуповъ 44, такоже облачены въ святительскый санъ и в рогатых клобуцех. А патриарху и митрополитом седящу в монатиах. И тогда четшим им грамоты по латынскыи и по греческыи, и что им ити ис Ферары къ Флоренску граду.

И поеха папа месяца генваря 16. И поеха патриархъ ис Ферары месяца того же въ 26 рекою Повою, в судех на низ; а митрополит рускый поиде месяца того же въ 27 рекою тою же въ судех. От Ферары до града Рженти 25 миль. От Рженти до града Обатши[898] 7 миль. А от Обатши до града Селжи 7 же миль. И ту поиде господинъ из судна на кони. А от града Селжи до града Алугы 7 миль. А от Лугы до града Фензы 10 миль. От Фензы до града Бряги 28 миль. От Бряги до града Берена[899]

13 миль; а река под ним Ирнець[900] быстра вельми, чрез ее мостъ камен; и садовъ множество масличных, и место красно меж горъ. И от Берена до града славнаго и прекраснаго Флорензы 50 миль. А все горы камены, высоци, а путь тесенъ и тяжекъ велми, занеже возы не ходят, но на въюкехъ возять. И вино родится в горах тех велми добро и сладко и красно. И приехал господинъ въ славный град Флорензу месяца февраля въ 4. А патриарх въехал месяца того же 17, а царь того же дни.