Том 6 (XIV - середина XV века, литература времени национального подъема)

А от Луньбрега до Бруньзвига града 16 миль. И той град величеством вышьши тех градовъ прежних, и полаты в нем видети чюдны, верхы их устроены; а покровение их велми подобно удивлению: есть бо крыто дъсками синего камени хитро и хороше, яко и лемешем,[882] и утверживано гвоздиемь, яко не мощно рушитися во много лет. И еще суть реки великы приведены по всему граду тому, береги их и дна морованы камением; а иные воды въ столъпы приведены, якоже и в предписанных градехъ. И все здание града того видети твердо есть, и подивитися о сем.

А от Бруньзвига до Батмера града 11 миль. Той бо град величеством Любку подобен. И под весь град той улици морованы и полаты, а воды к нему приведены от Аламаньские земли.[883]

И от того града есть град именем Липесъ велми велик. А от того же града есть град именем Афрат, велик и чюденъ, и имениемъ многым и хитрым рукоделиемъ преумножен; и таковаго товара и хитра рукоделиа ни в коемъ граде въ предписанных не видехом.

А от того града есть град Бемибъверегъ великъ же и чюденъ. И ту празновахом праздникъ святых апостолъ Петра и Павла,[884] и ту видехом: ходили съ кресты по граду 300 попов.

Да того же дни господинъ выехал изъ того града милю, и облегохом въ граде именем Понтъ,[885] а река под нимъ зовома Тискъ, и того ради зовется той град Понтенскъ. И той убо град окааннаго Пилата. В том бо граде вотчина его и рожение, и по граде зовется Понтийскый Пилатъ.

И от того града есть град Нурбехъ, велми велик и крепок. И людий в нем много, и товара; и полаты в нем деланы белым каменем, велми чюдны и хитры; такоже и рекы приведены къ граду тому великими силами хитро; а иные воды во столпы приведены хитрее всех предписанных градов, и сказати о сем убо не мощно и недомыслено отнудь. От Любка до Нурбеха 100 миль.

И тьи Нурбех град стоит среди Аламанские земли. Аламанская земля, то есть не инаа вера, ни ины язык, но есть едина вера латиньская, а языкъ немецкий же, но разно, яко и русь с сербы, тако и оне с немьци.

И от того града 17 миль есть град во имя Августа царя, его же из начала тъй царь Иустиниянъ нача и създа на славной реце Дунаи, и того ради зоветса град той Августъ, а по немецки же Авспрокъ.[886] И величьством превъзыде всех предписанных градовъ. И полаты в немъ, и воды, и иная вся строениа велми чюдна. И божници в нем устроены, и с надвориа писано велми хитро, а внутри якоже и иные божници подписаны; и ту написан царь Иустиниан, началный здатель града того, да и иные цари римьские писаны, то же и угорское и аламаньское.

А от того града до Полониных гор 10 миль. А от Полониных горъ до князя, зовомаго дукы,[887] 15 миль, и городок дръжит Жунбрюкъ невеликъ. А от того града къ Полониным горам до града Фреанды 24 мили. И оттоле въ Фряжскую землю[888] до града Павды 15 миль. И всех Полониных горъ 60 миль. Горы же те не ту суть, но от Чернаго моря пошли даждь и до Белаго моря,

[889] яко зовутся поясъ земный, камены. Толико жо высоци суть, облаци вполь их ходят, и облаци от них ся взимают. Снези же лежат на них от сотворениа горъ техъ; лете же варъ и зной велик в них, но снег же не тааше. Павда же град велик велми и крепок. И оттоле до Ферары града 10 миль. И ту есмя приехали по Госпожине дни на 3 день.[890]

И ту есмя наехали папу римьскаго Еугениа,[891]

от Рима за 50 миль. Ту же и святаго царя греческаго Иоанна,[892] и святаго патриарха Иосифа[893] вселеньскаго, и святый вселеньскый соборъ. А въ зборе бысть с патриархом митрополитов 22: первый — раклийскый Антоней, 2 — ефесскый Марко, 3 — русскый Исидоръ, 4 — манавасийскый Досифей, 5 — трапизонскы Дорофей, 6 — кизитьскый Митрофанъ, 7 — никейскый Висарионъ, 8 — никомидейскый Марко, 9 — лакедомонийскый Мефодий, 10 — тръновскый Игнатей, 11 — амасийскый Иасафъ, 12 — малъдовъскый, рекше влашки, Демианъ, 13 — ставропольскый Исайа, 14 — родовьскый Нафанаилъ, 15 — митулиньскый Дорофей, 16 — драмасиньскый Дорофей, 17 — мелетинскый Матфей, 18 — тристриасийскый Калистъ, 19 — каланьскый Генадей, 20 — ахелоньский Генадей, 21 — иверьскый Иоанъ, 22 — сардакийскы Дионисий,[894] тъи на том святемъ съборе къ Господу отьиде.

1-ый соборъ бысть месяца октября въ 8 день, въ граде Фераре в Фрязех. На соборе же седе римьскый папа Еугений, а с ним 12 гардиналовъ, и арцибискупы, и бискупы, и капланы, и мнихы. Православные же веры на съборе седевшу греческому царю Иоану и брату его деспоту Дмитрею,[895] и вселенскому патриарху Иосифу, а с ним митрополитовъ 22, и епископовъ русскых — Авраамий Суздальскый, и архимандриты, и попы, и диакони, и черньци, и послов 4, трапизоньскый, иверьский, и тверьскый Фома, и волошьскый Микула. Въ вопросех бывшим тремъ митрополитом, въ ответех ефесскый Марко, русскый Исидоръ, никейскый Висарионъ.