Том 6 (XIV - середина XV века, литература времени национального подъема)

Той же славный град Флоренза велик зело, и такова не обретохом въ предписаных градех: божници в нем красны зело и велици, и полаты в нем устроены белым каменем, велми высокы и хитры. И посреди града того течет река велика и быстра велми, именем Рна; и устроен на реце той мостъ каменъ, широк велми, и съ обе страны моста устроены полаты. Есть же во граде том божница велика и есть в ней за тысящу кроватей, а и на последней кровати перины чюдны, одеяла драгы; то ж устроено Христа ради маломощным пришелцем и странным и иных земель; тех же боле кормят и одевают, и обувают, и омывают, и дръжат честно; а кто ся оможет, той ударя челом граду, пойдет хваля Бога; и посреди постель тех устроена служба, и поют на всяк день.[901] Есть ины монастырь, устроенъ белым камениемъ хитро и велми твердо, и врата железны; а божница велми чюдна, и есть в ней служеб 40; и мощей святых множество, и риз драгых множество с камением, и съ златом и съ жемчюгом. Старцев же в нем 40, житие же их неизходно из монастыря никогдаже, ни миряне к ним не ходят николиже; рукоделие же их таково: шиют златом и шолком на плащаницах[902] святые. В том же монастыре был господинъ, и нам ту же бывшим, и та вся видехом. А погребение же умерших тех старцевъ въ устроеных тех монастырехъ, и гробы их, новоумершаго старца въкладают, а ветхыа кости выимают, и кладутъ в костеръ, и на них смотрят, поминают час смертный. В том же граде делают камки[903]

и аксамиты съ златом.[904] Товара же всякого множество и садов масличных, и тех маслиц древяное масло. И есть в граде том икона чюдотворна, образ пречистыа Божиа Матере; и есть пред иконою тою в божнице исцелевъших людей за 6 тысяч доспеты вощаны, въ образ людей тех, аще кто застреленъ, или слепъ, или хром, или без рукъ, или велик человекъ на коне приехав, тако устроени, яко живи стоят, или старъ, или унъ, или жена, или девица, или отрочя, или какого портище на нем было, или недугъ каков в нем был, и како его простило, или какова язва, тако то и стоит доспет. И ту же сукна скорлатные[905] делают. Ту же видехом древие кедры и кипарисы; кедръ как руская сосна, много походило, и кипарис корою яко липа, а хвоею яко ель, но мала хвоя кудрява, мяхка, а шишки походили на сосновую. И есть во граде том божница устроена велика, камень моръморъ белъ, да чернъ; и у божницы тое устроен столпъ и колоколница, тако же белы камень моръморъ, а хитрости ея недоумеетъ умъ наш; и ходихом в столпъ той по лествице и сочтохом степеней 400 и 50.[906]

В томь же граде видехом лютых зверей 22.[907] А около града того стена 6 миль.

Шесты на 10 соборъ въ граде Флерензе месяца февраля 26. Седмый на 10 соборъ месяца марта въ 2. Осмый на 10 соборъ месяца того же въ 5. Девяты на 10 соборъ месяца того же въ 10. Двадесятый соборъ месяца того же въ 13. 21 соборъ месяца того же въ 14. 22 соборъ месяца того же в 17. 23 соборъ месяца того же в 21. 24 соборъ месяца того же въ 24. 25 соборъ месяца майа въ 2. Деспот, царевъ братъ, пойде от собора къ Царюграду изъ Флорензы месяца июня 25.

Месяца иулиа въ 5 собору бывшу велику, и тогда написаша грамоты събора их, како веровати въ Святую Троицю, и подписа папа Еугений и царь греческый Иоанъ, и вси гардиналове и митрополиты подписаша на грамотах коиждо своею рукою.[908]

В том же граде видехом черви шолковыя, да и то видехом, как шолкъ той емлють с нихъ.

Месяца того же въ 6 служил обедню папа Еугений опресноком[909] въ соборной божнице въ имя пречистыя Богоматере, а с ним гардиналовъ 12, а бискупов 93, опричь каплонов и диаконов. Царю же греческому Иоану, седящу ему на уготованном месте, зрящу службы их, и вси бояре его с ним; и митрополитом ту же седящим на уготованных местех въ всемь святительском сану, тако же и архимандриты, и хартофилакове,[910]

и попове, и диакони, оболчени кождо въ свой санъ, и калугерове[911] ту же седяще на уготованных местех, зряще еже служат; тако же и от грекъ и от руси миряне седяще; места же те высоци чрез люди зряще. Народу же толику ту сущи, что бы их пущали, то бы много задушенных людей было; но подвойские[912] папины хожаху в пансырех сребряных, и палици в руках дрежаще, и не дадуще наступати; а иные свещи виты дръжаще в руках зажьжены, и теми къ народом махаху, чтобы не наступали. И по службе нача молебен пети съ своими, и по молебне седе папа посреди собора того на уготованом ему высоце престоле позлащене, и близ его поставиша амбон. И взыде от латинъ гардинал именем Иулианъ,[913] а митрополит никейскый Висарион, и възнесоша грамоты съборныя; и нача чести Иулианъ латиньскую грамоту велегласно, и по том нача чести митрополит грамоту греческую. И по чтении грамот благословилъ папа народ. И потом начаша папины диакы пети хвалу папе, и потом начаша царевы диакы пети хвалу царю. И потом начаша пети весь соборъ латинскый и весь народ, и начаша радоватися, зане бяше прощение приали от грек.