Doktoro Jivago (Libro 1)

Omno to esis ja konocata. La radikala nihilisti dicis tala kozi ja en antea yarcento, plu tarde kelka heroi da Dostoyevski e la intelektozi ek la rusa provinco, qui esis plu rapida kam la intelektozi en la rusa grand-urbi. La yuna viro naracis, ke il esis la nevulo di famoza revolucionisto, ma lua gepatri esus neplubonigebla reakteri. Li posedus en la proximeso dil fronto pasable granda domeno. Ibe il pasabis sua infanteso. Lua gepatri vivabis dum kelka tempo en enemikeso kun lua onklo, qua esis bonkordiala ed influanta viro, e qua konservis nun lua gepatri kontre omna posibla danjeri. Il havus la sama opinioni kam sua onklo, il esus en omna aferi maximalisto ed extremisto, en vivo, en la politiko, en la arto. To omno memorigis itere pri la figuri en la romano Demoni' da Dostoyevski. Nun venos la futuristi, pensis JIVAGO, e justa, il parolis pri la futuristi. E nun la sporto, profetis JIVAGO, ma la yuna viro parolis pri la chaso.

169

Il dicis, ke il chasabis en sua patriala regiono e ke il esus grandioza pafero, e se il ne havus korpala defekto, lore il divenus soldato en milito ed on gloriizus lua skopo- sekureso.

Il vidis la questionanta regardo di JIVAGO e vokis: „Ka quo? Ka vu ne remarkis mea defekto?" Il queris ek la posho du karteti. La unesma karteto esis vizit-karto. Lua nomo esis Maxim Aristarkovitsh Klinzov-Pogorevshik o simple nur Pogorevshik. Pogorevshik esis la nomo di lua onklo ed ica nomo esus anke la valida nomo por lu.

La altra karteto esis tabelo, sur qua esis diversa manuo- formi e fingro-formi. Esis la fingro-alfabeto dil surda- muti, e nun esis omno klara.

Pogorevshik esis la talentoza absolvanto ek la skolo di Hartmann od Ostrogradski, surda-muto, qua lernabis parolar perfekte per la preciza observado da boko e labii. Tale il povis komprenar la vorti dal instruktisto. JIVAGO probis komprenar la regiono ek qua venabis la yuna viro e questionis: „Pardonez mea direta questiono, ma vu ya ne devas respondar. Ka vu esis prezenta dum la konstitucio dal republiko Sybushino?" „Ka vu do savas... Permisez... Ka vu konocis do la muelisto Blasheyko? Yes, certe, me esis prezenta, naturale" Pagorevshik ridis kam dementulo e batis per sua manui sempre itere sua la genui. E senfriste venis anke itere fantastika historio.

Il dicis, ke Blasheyko e Sybushino esabis la motivo por realigar sua propra idei. JIVAGO povis preske ne sequar. La filozofio di yuna viro konsistis ek anarkiista tezi e pura chaso-slango. En ferma tono di oraklo il profetis por la proxima tempo fatala eventi.

170

JIVAGO aprobis interne pri la fatala eventi, ma il iracis pri la kalmeso en qua la desagreabla yunulo anuncis sua profetaji.

JIVAGO kontredicis: „Momento. Yes, to esas justa. Tala kozi povas eventar. Ma me kredas, ke nun ne esas tempo por tala riska probi en nia kaoso e disfalo, dum la enemiko stacas koram nia pordo. Nia lando bezonas tempo. Ol ne povas irar de revoluciono a nova, altra revoluciono, ol bezonas repozo, Ni bezonas, se anke forsan nur, relativa kalmeso ed ordino" „To esus naiva", dicis la yuna viro. „Quon vu nomizas disfalo esas tote normala aparajo kam vua amata e laudata ordino. Ica destrukto esas legala e provizora parto di plu granda kreado-koncepto. La socio esas ankore tro stabila. Ol devas disfalar tote. Lore la revolucionala forteso povas erektar ol sur tote altra fundamento."

JIVAGO hororis. Il iris al koridoro.

La treno vehis sempre plu rapida tra la sub-urbi di

Moskva.

La fenestri montris birkeyi kun laubi, streta stacioni sen tekti, plena de somero-gasti, qui posrestis en densa polvo-nubi, dum la treno siflis sempre itere aden la vakua foresto-eko.

Subite anke JIVAGO komprenis la unesma foyo en ica dii, ube il trovesis, en quala stando il esis e quon il povis expektar en la sequanta hori.

Tri yari kun transformadi, nesekureso, nervozeso, milito, revoluciono, shanceligi, pafi, destrukto e morto, ruinita ponti ed incendii - omno to divenis subite gigantala vakuo.

171

La unesma vera evento pos la longa pauzo esis la rapideso dil treno a sua domo, quan il amis avan omno, e qua esis ankore nelezita. To esis la vivo, to esis la interna ecito, la aventuro, to signifikis anke arto - la arivo en la familio, la retro-movo aden su ipsa, la rinovigo dil vivo.

La bosketi posrestis. La treno rapidis al libera regiono. Larja agro aparis ek precipiso en la foreso. La agro esis kovrita per longa rango di obskur-verda ter-pomi. An la bordo dil agro on vidis la fenestri di teplico. Dop la vehanta treno venis nigra, granda sturmoza zono. Ek ica zono aparis sun-radii kam ringo ad omna direcioni, qua transformis la fenestri en netolerebla brilo. Subite pafis ek la nubo hela, varma pluvo, pluvo, qua lasas kreskar la fungi. La guti dil pluvo konkursis kun la rapideso dil treno.

Dop kolino aparis la katedralo di redemto, e dum la sama momento on vidis kupoli, tekti, domi e kameni en la urbo.

Il eniris la vagon-fako e dicis: „Moskva. Ni devas esar pronta"