Том 12 (XVI век, литература «обобщающих предприятий»)

Поучение к народом. И многу народу собрану бывшу, к ним же много поучение простирашеся от пресвященнейшаго митрополита, такоже и от епископовъ и от презвитер; наипаче же и сам равноапостольный Владимир многих смиреномудрено и любезно, не яко властелски и запрещая, но учителски, моля всех и наказуя, разумно же и богоразсудително извести им истинную Христову веру, ясно являя благодать Божию, еюже самъ сподобися просвещен быти. Множество же народа, слышавше от дивнаго самодержца словеса Божия, вси единомудрено внимаху с верою глаголемымъ, и никтоже противно не глагола ничтоже благочестивому его повелению, но вси, благодатию Святаго Духа осияваеми, люботщателно обратишася веровати истинному Богу; вси радостными сердцы, вкупе же и усты, единомыслено обещашася креститися, единогласно глаголюще: «Аще сия вера не бы истинна была, то не бы восприял ю сам великомудреный самодержець нашь и премудрии боляре его. Якоже они лучшую веру избраша, юже и мы достойно восприяти имамы». И бысть радость велия во всем граде.

Проповедь святому крещению. Блаженный же Владимир посла проповедники по всему граду, по данней ему благодати всем людем со властию заповедь предлагая, и нарек имъ день, глаголя: «Аще кто не обрящется на реце, богат или нищ, или свободь или работникъ, мужеска полу и женска, от мала и до велика, креститися во единого Бога Отца и Сына и Святаго Духа, и той яве противен будет Христу Богу и нашей державе, и не имат сей пощаден быти от нас». Сия же слышавше людие с радостию отвсюду течаху креститися, исповедающе грехи своя и оглашени бывше. Дни же нареченному приспевшу святаго просвещения всем людемъ, и тогда со заутрия пресвященный митрополит Михаил, с нимъ же епископи, и презвитеры, и дияконы, и прочии причетницы, облекшеся во все священное благолепное одеяние, изыдоша на Днепръ реку[901] со кресты, и со иконами, и евангелии, и с кандилы благовонными и со свещами. Вкупе же подвижеся с ними приити ту и самъ и равноапостолный Владимир и со своими новопросвещенными чады, и со князми, и з боляры, и с прочими сановники и чиновники.

Крещение всенародное в Киеве. Снидоша же ся креститися многое множество людей мужеска полу и женска, от мала и до велика, и с сущими млеко младенцы. И вси людие внидоша в реку, и стояху овии до шии, а друзии до персей, младенцов же на руках в воде держаще, совершеннии же бродяху. Святителие же и презвитеры, стояще на брегу, молитвы глаголаху святаго крещения и елеом святым помазаху их; и тако крестишася все множество народа русскаго во имя Отца и Сына и Святаго Духа; и священным миром помазающе их, и словеса утешения глаголавше к ним и благословивше, отпустиша я.

Радость и благодарение крестившихся. И тако вси изыдоша от воды, просвещени душею и телом, радующеся и славяще и хваляще Христа Бога, яко спасе их, якоже древле Израиля от работы рукою Моисеовою,[902] тако и ныне новаго Израиля, руския люди, рукою Владимировою, равноапостолнаго самодеръжца. И бе видети радость велию и неизреченную не токмо на земли человеком, но и на небеси ангелом; и арханггели возвеселишася, и святыхъ дуси взыграшася о толице душь спасаемых. Сам бо рече Господь: «Велика бывает радость на небесех о едином грешнице кающемся»,

[903] колми паче — о толице бесчисленых душах во всей Земли руской, приведеных к Богу святым крещением. И тако бяху ликовствующе и красовахуся Божии людие вси, в нихже бе веселие непрестанно, и торжество пресветло, и шум празднующих, уму непостижим. Смирением к Богу возвышающеся и верою приближающеся, вси, в любви преспевающе утешением Святаго Духа, растяху и множахуся, ублажающе самодержца Владимира, яко повелением его просветишася, и время похваляюще, в неже Бога познаша, и день благословея

нарицающе, в онже крестишася. И тако, во благодушии и в пространствии сердца, идоша в домы своя, радующеся и благодаряще Бога.

На месте же, идеже снидошася киевстии людие, крестишася, и ту поставлена бысть церковь во имя святаго мученика Турова,[904] и оттоле наречеся место оно святое. По истине же свято место, идеже много множество людий, сшедшеся, диявола отрекошася и святымъ крещением просветишася и осветишася. В лепоту же и самый град той преименитый Киев наречеся мати всем градовом руским.[905] Не туне бо тако наречеся, но яко в нем Руская земля обновися благочестием от блаженныя и равноапостольныя великия княгини Олги, и паки благородный внук ея, сий богоблаженный и равноапостолный Владимир, в том же граде первее вся люди своя въ богоразумие приведе, и от того же града проповеданием благочестия во всей Рустей земли дияволя прелесть упразднися, вера же християнская расплодися и непоколеблемо утвердися и всюду яко неугасимая свеща светяшеся.