Том 12 (XVI век, литература «обобщающих предприятий»)

Аще же тогда царство Московское не толико бысть многовластно, якоже ныне Божиею благодатию всюду обладая, но обаче и тогда сий блаженный великий князь Данил ни от кого же ратуем не бываше. Егда же некогда и случашеся во братии его и в сродницех межюусобной брани близ державы его воздвигнутися, он же боголюбиваго желания муж, аще возрастом и храбростию преуспевая и мужеством смысла преудобрен бысть, но обаче смиреномудрия рачител всегда тщашеся готов быти и на враждующая державству его мужествене вооружашеся, и с воинством своим противу бранем исхожаше, и Богом дарованною ему мудростию бес кровопролития брань утоляше и мир составляше. И во все время господства своего мирно поживе; и от всякия брани и крамолы, хотящая на нь быти, всегда десница Господня бяше защищая его; и во вся дни живота его ничимже ни от когоже неврежена бысть держава его. Такоже и сам чюжия части похищением наследити не желаше, доволно имея со благодарением уреченный ему жребий во благословение наследие Богом дарованныя ему державы преславнаго града Москвы. Старейшая же братия его державствоваху коиждо во своем жребии: великий князь Дмитрий — в Переяславли,[1050] иже на езери, при нем же бысть в Переяславли преосвященный митрополит Кирил[1051], — идеже и преставися к Богу, тело же его везоша в Киев и положиша в церкви святыя София, — в негоже место бысть митрополит Максим гречин.[1052]

Сий же митрополит Максим, не терпя насилия от татар, иде ис Киева во град Владимер со всем клиросом месяца априля 18 день, епископу же владимерскому Семиону поручи Ростовскую епископью.[1053]

О побежении татар на Рязани.[1054] Уже бо тогда честь и слава великаго княжения восхожаше на боголюбивый град Москву, в немже хотяше Богъ сугубо прославити святое свое имя, идеже первосвятительство и боговенчанное царство утвердити благоизволи. Богоснабдимый же великий князь Данил Александрович некогда слыша, яко у града Рязани множество безбожных татар сбирахуся, и тамо шествова с воинством своим возбранити устремление варварьское, дондеже не приидут озлобити отечество его; и у града Переяславля Рязанскаго множество татар победи и князя рязанского Костянтина изымав на Москву приведе.[1055]

Глава 2. О восприятии града Переяславля и о получении начальства державы. Прежде же того брату его, великому князю Дмитрию, к Богу отшедшю; потом же другий брат его, великий князь Андрей,[1056] во Орду поиде; по сих и братанич его, великий князь Иван Дмитреевич Переяславский, преставися[1057]

к Богу, державу же свою, Великий град Переяславль, по завещанию своему поручи стрыю своему, сему блаженному великому князю Данилу. И тако по Бозе первоначалие Рускаго скипетровластия бес крамолы прикладашеся ему. Он же, смиреномудрия рачител сый, пророческое слово во уме имея, якоже пишет: «Богатство аще течет, не прилагайте сердца»,[1058] — тако и сей державный нимало не вознесеся мыслию, еже бы желати началства державы; аще и прикладашеся ему, но кротостию нрава утвержашеся и о державном первоначалстве не услажашеся, но паче страхом Божиим огражашеся и братолюбием преспеваше и славохотия укланяшеся. И сего ради благодать Божия умножашеся на нем и держава его упространяшеся. И не рачаша сам преходити от места на место, во град же Переяславль посла наместники своя, — брата же его, великаго князя Андрея, наместницы отбегоша ис Переяславля; и тако без крамолы державу имея.

Глава 3. О начале Даниловского монастыря[1059]

и о пострижении и о преставлении блаженнаго Данила. Сам же великий князь Данило на Москве богоугодно господьствуя, идеже и монастырь честенъ вогради, иже зовется Даниловский, тогда же в нем и церковь постави во имя преподобнаго Данила Столпника,[1060] в том же монастыри и архимандрита первого устрои. И тако теплейшимъ к Богу желанием в той же честной обители и сам сподобися пострижен быти во святый анггельский образ богоподражателнаго иноческаго жития. И тако в последнем смиреномудрии к желаемому Христу отиде, в лето 6811 месяца марта 4 день. (...)

ПЕРЕВОД

ДЕВЯТАЯ СТУПЕНЬ, ОДИН МИТРОПОЛИТ МАКСИМ, И ГРАНЬ ДЕВЯТАЯ, В КОТОРОЙ 21 ГЛАВА О БОГОМ ХРАНИМОМ ВЕЛИКОМ КНЯЗЕ ДАНИИЛЕ АЛЕКСАНДРОВИЧЕ МОСКОВСКОМ

Глава 1.