Том 12 (XVI век, литература «обобщающих предприятий»)

Князю же Михаилу Ондреевичю Верейскому и сыну его, князю Василю, стоящу тогда у Великаго Новаграда, им же воеводы новогородские и иже в Новеграде во осаде седящии сами с великим молением и поклонением предашася, не радяше ни о чем, но токмо единаго живота себе просяще, всего своего имения уступающеся; гражане же даша ему со града окупу сто рублев[1170] новоградскую. И тогда же к великому князю в Ыгнатичи прииде от пскович посадник Никита с Козмою с Корбьиным и сказаша, яко псковичи со всею землею своею изыдоша на его службу своего государя с воеводою со князем Василемъ Федоровичемъ и места новогородския пограбиша

[1171] и пожгоша и многих людей новогородских овых оружию предаша, овых же огню.

Титла 8.

Збытие пророчества преподобнаго Изосимы Соловецкаго.[1172] И того же месяца 24, на памятьсвятых мученикъ Бориса и Глеба, великий князь прииде в Русу и тамо посадников новогородских за их измену и отступление повелел казнити

[1173] главною казнию: Дмитрия Исакова Борецкаго, и Василия Селезенева, и Еремия Сухощекова, и Киприяна Арзубьева, о нихже преже сего прорече преподобный Зосима, началникъ Соловецкий, якоже в житии его пишет. Бысть бо некогда обедовавшу ему у них, и виде их седящих на трапезе их во время обеда, а глав на плещу их не виде. И сия зря преподобный плакашеся и не ядяше, и учеником своим извести, яко за гордыню их отсечени имут быти главы их, еже и збыстся. Инии же мнози на Москву послани быша в темницу. Прочии же, не от славных рода, к Новуграду отпущени быша. Василия же Казимира, и Козму Григорева, и Якова Федорова, и Матфея Селезенева, и Козму Грузова, и Федота Базина и инех посла великий князь на Коломну и оковы повеле обложити их. Сам же великий князь поиде оттуда ко Илмерю езеру и прииде на место, зовомое Межу Берег и Коростын, въ 27 день того же июля месяца.

О брани на Двине.[1174]

И в той день поможе Богъ воеводам великаго князя Василию Федоровичю Образцу да Борису Сдепцу, с нимиже быша устюженя и вятчане, всея же их рати токмо 4000 без тритцати человекъ, им же бой был на Двине со князем Василемъ Шуйским, с нимиже бысть рати 12 тысящ. Бысть же вышедшимъ имъ из суд, обои пеши, и начашася бити в третий час дни. Биша же ся и до захожения солнечнаго, и за руки емлюще сечахуся, и знамя у двинян выбиша, под нимже и триех знаменщиков убиша, и тако двиняне возмятошася. И бысть уже к вечеру, одолеша полки великаго князя и избиша множество двинян и заволочан, а инии истопоша. Князь же их ранен утече в ладицу и убежа на Колмогоры. Многих же живых руками яша, потом же и градки их поимаша. Великаго же князя рати убьено бысть ту 10 человекъ, прочии же вси Богом сохранени быша.

Титла 9. О нареченном владыце Феофиле и о новогородцех, како приходили к великому князю с челобитьемъ.[1175] В той же день приидоша из Новаграда на усть Шелони в судех езером Илмерем нареченный на архиепископьство Феофил с посадники и с тысящскими и с прочими градскими людми изо всех концовъ. И преже начаша бити челом боляром и воеводам великаго князя, да быша печаловалися братии великаго князя, а они бы печаловалися великому князю, с ними же бы вкупе и сами боляре печаловалися. Боляре же, шедше с ними, биша челом братии великаго князя. Братия же валикаго князя, князь Юри, и князь Андрей, и князь Борис, и князь Михаил Андреевич с сыном, и боляре их биша челом о них великому князю. Великий же князь прият моление их ради братии своея и боляр своих, умилосердися о них и повеле им приити к себе, очи свои видети. Они же, пришедше пред него, и ударяхуся о землю, молящеся и милости просяще о своем преступлении, яко безъ ума противишася ему, — да бы явил имъ милость свою, много пред нимъ согрешшим, и гнев бы свой возвратил от них, и да бы престал казнити их, не велел бы паче того грабити их и жещи и пленити. Благосердый же самодержец, великий князь, милосердова у них, показа им милость свою, прият моление их и утоли гнев свой, и в той часъ повеле престати жещи и пленити, и плен весь повеле собрати и отдати. Даша же тогда великому князю сребра 16 тысящ рублев новогородских числом, кроме братии великаго князя и князей и прочих боляръ и воевод всех. Земля же их вся пленена и пожжена и до моря, яко такова война не бе была на них от начала. Тогда же и Псковская вся земля от себе их же воевали. И посла великий князь по всех воевод своих, и по все воинство свое, и по пскович, идеже кто послан пленити земли новоградския, всем повеле к себе возвратитися. И мнози приидоша к нему на усть Шелони июля 30. И потом стоя ту на едином месте 11 день, управляя новогородцевъ; и дав им мир и любовь и милосердие и нареченнаго на архиепископьство Феофила почтив, отпусти во свой им град, с нимже и посадников, и тысящских, и прочих, иже с ним приходили. За ними же посла в Новград болярина своего Феодора Давыдовича привести весь Великий Новград к целованию от мала же и до велика и сребро на них имати. Он же, шед в Новград, сотвори тако, якоже повелено бысть ему.