Том 12 (XVI век, литература «обобщающих предприятий»)

Он же вскоре разосла по всю братию свою, и по вся епископы земля своея, и по все князи, и по боляре, и по воводы, и по вся воя своя. И яко снидошася к нему вси, и тогда возвещает всем, яко новогородцы во всем измениша ему и на великое зло удаляются, хотяще от православия к латынскому королю присягнути. И того ради, Бога помощника имея, взем благословение от митрополита Филипа, и от всех святитель земля своея, и от всего освященнаго собора, и начат вооружатися на своих изменников; такоже и братия его, и вси князи, и боляре, и воеводы, и все воинство его. И посла в Великий Новград, возвещая, яко грядет смирити гордыню их. Во Тверь посла к великому князю, помощи прося на новоградцев. Такоже и во Псков посла, глаголя им сице: «Ведыи будите, яко отчина моя Великий Новград отступают от мене за литовскаго короля и архиепископа себе хотят поставити от его митрополита Григория, латынянина суща. И того ради азъ, на Бога возложив надежу, гряду на них с воинством своим; и вы вси, от великих идо малых, вся Земля псковская, отчина моя, поидите на них ратию с моим воеводою, со князем Феодором Юревичем Шуйским,[1150]

или с сыном его князем Василемъ».

И месяца маия 31 день великий же князь посла воевод своих на Двину и на Заволоцкую землю, Василия Федоровича Образца[1151]

с устьюжаны и с вятчаны и с вологжаны на пригороды новоградския и на вся их власти и на погосты. Месяца июня 6 послал великий княз с Москвы преди себе князя Данила Дмитреевича Холмскаго да Федора Давыдовича со многим воинством к Русе[1152]

за Илмень езеро, иже есть противу Новаграда. И того же месяца июня 13 отпустил великий князь князя Ивана Василевича Стригу со многими вои, с ним же князей царевичевых Данояровых со многими татары, и велел им итти на Волочек да по Мсте.[1153]

Сам же благочестивый государь великий князь начат обходити вся соборныя церкви и монастыря и повсюду и идеже чюдотворный образ Пречистыя Богоматере и целбоносныя мощи великих святителей и чюдотворцев Петра и Алексия и прочих, и идеже мощи почиваху прародителей его, — от великаго князя Ивана Даниловича и до отца его, великаго князя Василя, — и везде молебная совершая и милостыню доволну раздая, жалости исполняяся и моляся в себе, глаголя. Молитва: «Господи Владыко пресвятый, превечьный Царю! Ты веси тайная сердецъ человеческих, яко не своим хотением, ниже своею волею на сие дерзаю аз, еже бы пролиятися мнозей крови християнстей на земли, но дерзаю о истиннем твоем божественом законе».

И тако благочестия делател повсюду моляся Господу Богу и Пречистой Богородицы, призывая к себе на помощ непобедимую силу честнаго и животворящаго креста Господня, и великаго заступника и скорого християном помощника на бранех преславного небесных силъ воеводу архистратига Михаила, и святаго великого Ивана Предотечю, и соборы пророкъ, и апостолъ, и святителей, и святых добропобедных мученикъ, и преподобных, и праведных, и всех святых, и своих святых православных прародителей, великих князей: равноапостольнаго Владимера и сынов его праведных страстотерпецъ Бориса и Глеба, и всех святых своих сродник, моля их и глаголя: «О, святии мои родители и прародители и сродницы! Аще и телом отсюду отшли есте и души ваши в руце Богу предасте, к нему же и дерзновение имуще молитвою на отступающих православныя державы нашея».

Таже паки приходит ко отцу своему Филиппу, митрополиту всеа Русии, прося благословения и прощения от него. Святитель же огражает его крестом и молитвою вооружает и благословляет его и вся воя его на противныя ему. И тако, приимъ благослование от митрополита и от всех святителей земля своея и от всего освященнаго собора, и поиде с Москвы того же месяца июня 20; с ним же и братия его: князь Юри, и князь Андрей, и князь Борис Василевич, и князь Михаил Андреевич с сыном своим со князем Василем, и царевичь Даняр,[1154] и князи и боляре мнози, и вси воеводы со многою силою, вооружився на противных на своих отступников. Всегда бо изменяху, крестное целованье преступающе. Пятсот лет и четыре лета во святом крещении быша владоми великими князми рускими православными, ныне же последьнее время за 20 лет до скончания седмыя тысящи, начаша беситися, еже отступити от истиннаго православия в богомерское латынство. И тако великий князь, уповая на Бога, воополчився, поиде на них со всеми силами за их гордость и непокорство, не яко на християн, но яко на язычники и на отступников от православия.