Том 12 (XVI век, литература «обобщающих предприятий»)

О победе на новоградцы на Шелоне. Сами же воеводы поидоша к Демону граду. К ним же присла великий князь с Колма-езера, веля им ити за реку Шелоню сниматися со псковичи. А под Демоном стояти повеле князю Михаилу Андреевичю с сыном, князем Василемъ, и со всеми вои своими.[1162] Воеводы же великаго князя, яко приидоша к Шелоне-реце на брег, идеже брести ея, и тогда со другия страны реки тоя противу их прииде рать новоградская, многое множество, яко и ужаснутися полком великаго князя, понеже в мале бяху; прочая же, иже с ними воинства, не ведуще того, пленяху окрестная места Новаграда. А окаяннии изменницы новогородские — посадницы, и тысящские, и боляре, и купцы, и всякие ремесленицы, и весь народ гражан, совокупившеся всея их рати, якоже сами глаголют, четыредесят тысящ, и поидоша скоро многими силами на тех же воевод великаго князя на передовый полк — на князя Данила Голмскаго и на Федора Давыдовича. Воеводы же великаго князя, ихже в мале бяше, яко тысящ пять, супротивных же аще и многое множество видевше, не устрашишася, но надеющеся на Господа Бога и на Пречистую Его Матерь и на правду государя своего, поидоша скороустремително противу их, яко лви рыкающе, через реку ону великую, еяже сами новоградцы глаголют никогдаже тамо броду имущи, а сии не ищуще броду вси цели и здрави преидоша ея. Видев же сие новоградцы возмятошася и восколебашася, яко пьяни, а сии ускориша приити и стреляху их. И возмятошася под ними кони их и начаша бити их с себе. И тако вскоре побегоша, гоними гневом Божиим за свою их неправду и за отступление не токмо от великаго князя, но и от самого Господа Бога. Полцы же великаго князя погнаша по них яко 20 поприщ,

[1163] колюще и секуще их. А инии бежаще и сами друг друга убивающе, кто кого можаше. Избиено же бысть их тогда по сказанию их яко 12 тысящ, живых же, изыманых руками, боле двою тысящ.

Изымании же посадницы их сии: Василий Казимир, Дмитрий Исаков Борецкой, Козма Григорьевъ, Яков Федоров, Матфей да Василей Селезневы, два сестричича Казимировы, Павел Телятев, Козма Грузов и прочих множество, на нихже збыстся пророческое слово, реченное, яко «пять поженет сто, а сто подвигнета тмы».[1164]

Бежащим же им надолзе, и кони их под ними одхошася и метахуся с коней своих в воды и в болота и в лесы: ослепи бо их Господь, яко и земли своея не познаша, ниже пути ко граду своему ведуще, от негоже приидоша. Но блудяху по лесом, и идеже выходящим им из леса, и тако имаху их ратнии. А инии, ранении, по лесом блудяще, изомроша; а инии в водах истопоша. А котории с коней не сметашася, тех кони их ко граду принесоша, яко пьяных или яко спящих. А инии в оторопе град свой пробегоша, мняще, яко взят уже град их.

Воеводы же, князь Данило и Феодор, сождавшеся с воинством своим и ставше на костех, вострубиша, благодарение Богу и Пречистой его Матери приносяще, яко видеша вся воя своя здравы. И начаша воеводы глаголати поиманым у них новогородцем: «Что ради вы с толиким множеством вой своих нимало не постоясте, а наше мало воинство видяще?» Чюдо. Они же рекоша к ним: «Мы убо видехом вас бесчисленное множество грядуще на нас; еще же и иныя полки ведехом в тыл по нас прешедших; знамена же имут желты и болшие стяги, скипетры, и говор людский многъ и топот конский страшен. И тако ужас нападе на ны, и страх обят ны, и трепет вниде в сердца наша».

Бысть же сие месяца июля 14, в день неделный по рану, на памят святаго апостола Акилы.[1165] И по преславной той победе то же воинство великаго князя повоеваша много посад новогородский и многия власти и до немецково рубежа по реку по Неву.

И послаша к великому князю въ Яжолобицы, возвещающе такову преславну свыше от Бога дарованную им победу и вся подробну вышеписанныя мужества и храбрьства богохранимаго воинства его. О таковых писание глаголет: «Воин на брани за благочестие аще убиет, то не убийство вменяется».[1166]

От святых отецъ, великаго Афонасия, якоже великий Афонасий ко Аммону-мниху в послании глаголет: «Чествований великих достойни суть, иже во брани храбръствовавшеи, и образы подобия их поставляти лепо есть, проповедающих храбръство их, яко убивают противныя им за целомудрие и за благоверие».[1167] Егда же сия слыша благочестивый великий князь Иванъ Василевич всеа Русии, возрадовася зело, хвалу воздая всесилному Богу и Пречистой его Матере, Пресвятей Богородице, и всем святым. У него же бяху тогда царевич Даняр и братия его, князи Георгий, Андрей, Борис Василевичи, и боляре их, и все воинство их. И бысть радость велия во всех. И тогда великий князь обещася поставити на Москве церковь во имя святаго апостола Акилы, еже и бысть, воеводы же, князь Данило и Феодор, — другую церковь, во имя Христова Воскресения.[1168] Из Нова же града тогда бяше у великого князя Лука Клементиев о опасе. Великий же князь дал им опас и отпусти его[1169] с Селищъ против Демона.