Том 15 (XVII век)

И потом послал по отца ей, дабы к нему приехал, и приказал собе 30 коней оседлати, и поехал до розличных стран и земель имени для, и славы добрыя добываючи. И тако далече ездел, иже и проводники дале того не могли ведати, куда ехати. Егда же приехаша на море, и начат по брегу ездити, в себе мысля, что бы мог учинити. И нашел собе корабль и поехал с своими людми на море. И егда же бысть им четверть лета ездячи по морю, и бысть бо им единое ночи, воста ветръ и буря велия, и взыгрылося море, и восташа волны великия. Бысть бо и кораблю, яко пометаему, на волнах, и егда же дважды под водою быша на три локти, Брунцвикъ в великой печали бысть. Пишет бо ся о нем, когда бо бысть в великом волнении, были голка[1189] и звук морский велий с великим ветром, и великим тем ветром вверхъ кораблем далеко метало.

И егда же уже к горе Якштенови приближися в мори, коли же то узриша и тут начаша плакати, и бысть от них плач и звук, крик великий. И начаша меж собою говорити: «Теперь бо нас уже несчастие поткало[1190], уже бо не по счастию, но по грехом стася

[1191] над нами». И егда же быша в пятинадесят милех от тое горы, и поразил их великий дух и волна силная[1192], зрящи новые горы, иже в мегновении ока притянула их к собе всех с кораблем. Тая бо гора имея тую силу, иже в 50 милех со всех стран в мегновении ока к собе притянет, будь то ту[1193]

люди, птицы и рыбы, древа и твари морские. А которые тут заедут, тому бо не мочно уже живу быти, иже остатися на той горе Якштыну. А иного тут нет ничего, токмо един остров велми красен, а словет Желатор, яко бы кто рекл ми радостный или милостивый, который аки увидели Брунцвик с своими людми, велми начали тосковати в великом смятении.

И тут узриша на том острове много гнилых кораблев и тех людцких костей и иных мертвых громады великие. Видячи то, Брунцвик почал тосковати велми, а иное веселитися, рекучи: «Хто дома седит, тот злаго времене не боится и морского волнения». И тако ни о чем нихто молвити не смеяше[1194], токмо о том друг ко другу глаголаху, что им случилося. И доколе имеяху запасы, что ясти, дотоле и весели быша. И егда же им запасов начат не ставати, тогда начаша велми тосковати.

И тако начаша велми покушатися[1195] всякими хитростми, да быша како могли какими мерами оттоле отехати. И тое их мастерство нимало не пособило, никакие ползы от него не прияша, едва возмогоша пол мили отплыти. Скоро в мегновении ока назад, и в том же острове увидилися, и не ведаючи, что сотворити, какую помощь собе. Уже бо им начат запасу не ставати, и начаша свои кони ясти, и всегда ждучи Божия милости.

Некогда же единаго часу случися ему поити по горе, ездити и смотрети, где что обрящет. И узрел женскую главу и руце[1196], а иное все рыба, а нарицается Еуропа. И начат к ней глаголати, рекучи: «Злое ли еси или доброе? Молви со мною!» И она к нему рече: «Брунцвиче! Аз есми такова, как мене видиш, а ни злое, ни доброе». Рече Брунцвик: «Могу ли с тобою какое потешение имети?» Она же рече ему: «Часом можеш, а часом и не можеш». И слышачи то Брунцвик, и принялся за нее и пребыл с нею, и толикое толко утешение было ему.

Потом же не стало коней, и почали сами ести ся, а все ждучи Божия милости. И уже три лета прошло в том их безгодии[1197], Брунцвик же толко остася с одным старым рыцарем, именем Былаадом. И рече Брунцвику Былаод: «Пане милый! Сей беды твоей не ведает твоя милая пани, а и нихто в твоей земли, что нам ныне прилучися». Слышавши то Брунцвик, тосковати начат. Рече Былаад: «Не тоскуй, милый мой пане! Естли же хощеш мене послушати, хощу тебе такову думу придумати, иже отсюду выедеш, но не ведаю, близко ли, далеко ли выедеш». Убояшеся старый, да некако тут един останет, и рече: «Токмо ты приедеш, помяни меня, когда тобя Бог вынесет, воспомяни верную мою службу». Брунцвик рече: «Верный мой рыцарю! Какими то мерами могу то так сотворити, иже отселе моглъ бы выйти? Аз слыхал, как хто к Якштынове горе приедет, тот тут и останется, не может выехати».

Рече к нему Былаад: «Есть один птах, сииречь птица, а словет ног.[1198]

Имеет обычай, иже сюда на всякий год однова прилетает. И што коли мертвый стерва обрящет, то в мегновении ока похватит и летит прочь». А тую годину он знает, в кое время прилетит. «Тот тя отсюду вынесет, будет похочеш, а далеко ли, близко ли, того не ведаю, сколь далеко отнесет». И рече Брунцвик: «Верный мой Былааде! Велми добра твоя дума. Аще бы моглъ тем везением отсюду избыти, не жаль бы мне было умрети, а любо мог бы нечто счастия себе найти, дабы мог к своей власте[1199] приити». Тогда Былаад, конскую кожю измазавши кровию велми горазно[1200], и всадил в нее Брунцвика, и меч к нему вложил, и зашил его ременем горазно, и положил его на той горе.