Том 15 (XVII век)

Потом опочинув Брунцвик от томнаго пути, и поиде меж великие горы и лесы, з горы на гору ходити. Тако опять блудил полные три лета на тех высоких пустых горах. Лев, всегда ходячи за ним, пищу ему добывал. Случися ему взойти на едину от гор тех высоку, и вшед на высокое древо и начат оттоле смотрити, дабы узрел где град[1222] или место

[1223] какое. И увиде на мори городок велми далеко, и тако сошед з горы и пад на колене свои и проси у Бога милости, дабы ему помощник был в напастех и в бедах его в том блужении. Не виде бо нигде ничего, токмо где бы очи его видели и мысли, тамо и ходил.

Восхоте пойти к тому городку и поиде из лесу, и тако иде 15 дней, и выде ис тех высоких гор и пустых лесов, и приде к морю пустому и, став над морем, начат мыслити, како мощно к тому городку дойти. И в недоумении великом бысть, начат мечем колье сечи и прутье рубити, а лев начат громаду волочити. И сплел собе плот ис того лесу нарочит[1224]

, возложил его на воду, а сам на него сел. А лев в то время добывал пищу себе и ему и, гоняючи, замешкал тамо неколико время. Тогда Брунцвик, хотя избыти лва, отпихнулся от брега на море. А лев в то время добыл вепря диково и принесе его на брег во устех своих, и узри Брунцвика уже в мори пловуща. Лев же розбегшися и скочи в море за Брунцвиком, держа вепря диково во устех своих. И едва доплы ево, приняся предними ногами за плот, а задними плове долго время, держася крепко за плот. Видячи же то Брунцвик, что лев его не останет, никогда бо не хощет разлучитися с ним, и нача ему помогати с великою силою, поможе ему на плот взойти. И ту опять Брунцвик велми печален бысть, понеже едва удержася на плоте том, едва не упаде в море.

И плыша бо в мори том со лвом, иногда по горло, а иногда до пояса на плоте том седеша, и тако в той воде 18 дней плавали, с одного конца Брунцвик, а з другаго лев седел, и тако друг другу утонути не даша. 9 дней и 9 ночей море с ними играло, а другую 9 дней и 9 ночей плыли в великой темности меж горами. И егда же приплыша в той темности ко единой горе, издалека бо узре, бе бо светла яко огонь. И добывши меч, и едва подплыша под нея, и удари в нея силно, и сшибе тем ударом великий кус, а спаде к ним на плот, яко голова человеческая. Тая гора бе славна, именуема Карванкулос[1225], камень самоцветный, а от нея ломают. Гора же та велми чиста и велми светла, светило бо им от тое светлости, от горы велми далеко и толь долго, иже доколе выехали ис тех гор, из мест темных.

И егда же приехаша, к тому граду приближишася, и начат дивитися на розные чюдеса морские. Многия бо бяху узорочия[1226] морские около града того. Град же той велми бе красен, на нем же бе множество красования морского, всякие чюдеса и узорочия всякия. И рече Брунцвик, сам в себе мысля: «Аще ли будет добро или зло, а яз побуду на сем граде. Аще что ни прилучится ми зде во граде сем, терпети имам».

И егда же быша во граде том, тут его объял великий страх, бе бо узрил короля места того Отлибриуса[1227]

. Сей бо король волот[1228] бе, очи же имать напреди и назади, и перстов имеет на всякой нозе по 18, а на руках по столку же. Около его бе многое множество различных людей. Увидев се их и убояся, бяху инии о едином глазе, а инии о единой ноги, а инии мнози имеют роги над очима, а инии о дву головах, а у иных песье главы, а инии половина седа, а другая бела, а инии горбаты, яко велблуди[1229], а инии яко лисицы красны. Тогда почат Брунцвика страх объуимати, бе бо крик и звукъ и шум великий, бяху бо инии выют, а друзии ворчат, бе бо такова королю от них служба, такову бо честь воздают королю своему. И начат Брунцвикъ назад отступати, хотя итти со града того.