Том 6 (XIV - середина XV века, литература времени национального подъема)

И поиде в корабль на море, и проводиша его с великою честию; и поеха из Ригы месяца маиа въ 5, на память мученици Ирины рекою Двиною к морю. И на брезе у моря был день. И пошелъ в корабли по морю в среду 4 недели по Пасце, в Преполовление праздника.[874] И бывшу ему един день ветру добре веющу. И не по мнозех днехъ внезапу в полунощи нападе на нас буря не ветреным делом, ино корабль волнами покрывашеся, а градьцу верховнему в валех бывшу. Мы же вси живота своего отчаяхомся, глаголюще: «Увы! погыбаемь». Но не многу тому бывшу. Но не единова тацей бури бывши, и потом тма бысть на мори велика, а ветру не веюшу. И роптанию бывшю в немцех: «Не нас ради сиа быша, но христиан ради». И приидоша немци господину глаголюше: «Видиши ли толику беду нашу — тме бывши и ветру не веюшу; и ту бо островъ Свитскылих камены, преборы и разбои великиа; и мы того ради приидохом к тебе: помоли Бога, а мы поюще по своему». Господину призвавшу владыку Аврамиа и Фому, посла тверьскаго, и архимандрита Васиана, и все свои боляре, и нача глаголати: «Епископе, помоли Бога». И нача молебен святей Богородици Одигитрие по греческы и съ своими грекы; а владыка Аврамий по своему, по русскыи. И нача тма расходитись, и уже бысть при вечере, и ветру добре веющу; и оттоле зла ничтоже не видевше. И по многых днех брегъ увидевше, и доидохом пристанища по здорову.

А ис корабля пошелъ в понеделник, месяца майа в 19 на память святаго мученика Патрекиа, и дошедшу ему до пристанища, и сретоша его посадникы и ратманы. От славнаго града Любка моремъ тысяща верстъ, а брегом полторы тысящи. И привезоша 20 возов, и седохом на возы, и поидохом ко граду, и быхом близь града, и сретоша весь народ мног.

И видехом град велми чюденъ, и поля бяху, и горы невеликы, и садове красны, и полаты велми чюдны, позлащены връхы, и монастыри в нем велми чюдны и силни. И товара в нем всякаго полно. А воды приведены в него, текут по всемъ улицам, по трубам, а иные ис столповъ студены и сладкы. И ходящу ему на празник Възнесениа[875] по божницем;[876]

и видехом съсуды священныа златыя и серебреныя, и мощей святых множество. И ту приидоша мниси и начаша звати господина, чтобы их монастыря посмотрилъ. Он же поиде, и показаша ему съсудовъ священных множество неизчетенно и риз драгых златых множество с камением драгым и съ жемчюгом. И увидехом ту мудрость недоуменну и несказанну: просте, яко жива, стоить Пречистая и Спаса дръжит на руце младенечным образом; и зазвеняше колоколчик, и слетит аггел с верху, и снесет венець в руках, и положит на Пречистую; и поиде звезда, яко по небу; и на звезду зряху, идяху вълсви три, а пред ними человекъ с мечем, а за ними человекъ с топоромъ; и внесоша дары Христу, злато, и ливан, и измирну, и приидоша къ Христу и Богородици, и поклонишася; и Христос обратяся, и благослови их, и хотяше руками взяти дары, яко дитя, играя у Богородици на руках; они же поклонишася и отидоша; и аггелъ же възлетит горе, и венець взя.[877] И ведоша нас, идеже лежат их книгы, и видехом боле тысящи книг, и всякого добра неизреченнаго, и всякыа хитрости, и полаты чюдны велми. И въведоша нас в трапезу свою и, несоша вина различная, и сахары многы разныа, а ту даша господину честь велику. И ту видехом на реце устроено колесо, около его 100 сажен, воду емлет из рекы и пущает на все домы. И на том же вале колесо мало, тоже мелеть и сукна точет красные.[878]

Ту же видехом два зверя люты в полате, у окна прекованы железы.

А кони митрополичи гнали берегом от Риги къ Любку на Курскую землю, а поперек Жемотские земли 3 дни, и оттоле на Прускую, и оттоле на Баморьскую землю, и оттоле на Жунскую землю, и оттоле на Висмертьскую, и оттоле к Любку. И в Любок приехав един день господинъ в корабли, а с конми брегом, а поехали с конми из Ригы за 6 недель до поезда до митрополича.

И поеха из Любка на конех в пяток Троицины недели[879]

и ночевалъ за 4 мили[880] въ граде Мелне. И бе бо около града того езеро, а з другую страну приведена река боле 20 верст из великиа рекы Елевы. А от Мелна града 4 мили до рекы Елевы. А от Елевы рекы Мечь река,[881] а перевоза поперекъ ея три версты. А от тое рекы до Луньбрега града 2 мили.

От Любка до Луньбрега 8 миль. Той убо град величеством подобенъ есть Любку. И среди града того суть столпы устроены, в меди и позлащены, велми чюдно, трею саженъ и вышше; и у тех столпов у коегождо люди приряжены около тою же медию; и истекают ис тех людей изо всех воды сладкы и студены: у единого из уст, а у инаго изъ уха, а у другаго изъ ока, а у инаго из локти, а у инаго из ноздрию, истекают же велми прудко, яко из бочек; те бо люди видети просте, яко живи суть, и те бо люди напояют весь град той и скотъ; и все приведение вод тех велми хытро, истекание и несказанно.