Том 6 (XIV - середина XV века, литература времени национального подъема)

Сия же имена многа изглагола, им же несть числа и списати не мощно. Глаголюще же к нему, слезам текущим от очию его, яко же быстринам, яко всем сущимъ ту дивитись таковому смирению и умилению. И плакахуся вси, смотряюще его. По сем же князь Дмитрей пир великъ сотвори на великого князя и на великою княгиню, и на детей его. Бяху же ту и вси епископи земли Руские, и боляре многих, и детей боярских. И честь великою учини великому князю и дары ему многи подавал и великой княгине и детемъ их. Да и вотчину дал великому князю Вологду со всемъ, и отпустил великого князя, и со княгинею, и з детми тамо.

Князь же великий пришед на Вологду и пожил немного, и поиде со всеми своими в Кириловъ монастырь, творяся тамо сущую братию накормити и милостину дати; несть бо лзе таковому государю в такой дальней пустыни заточено быти. Слышав же то, боляре великого князя и дети болярские, людие вси побегоша от князя Дмитрея и Ивана к великому князю. Побыв же князь великий на Белеозере, поиде прочь, а люди к нему туто мнози пребыли.

Князь же великий не возвратися к Вологде, но поиде ко Твери, сослася с великимъ княземъ тверскимъ з Борисомъ Александравичем.[987] Пришедшу же ему во Тверь, и князь великий тверский дал ему у себя опочинути и честь велику воздасть ему и дары многи. Князь великий Василей Васильевич обручал тогда за болшаго сына своего за князя Ивана дщерь у великого князя Бориса Марью.[988] Мнози же боляре со многими людьми приидоша к великому князю во Тверь.

А коли князь Дмитрей выпущал еще великого князя, а князь Василей Ярославич в Литве будя, а того не ведая, здумал с боляры великого князя, что, оставивъ жены и дети в Литовской земли, поити искати великого князя, как его выняти изо Углеча, и учиниша себе срок всем снятись в Литовской земли волости в Пацине.[989]

И еще не вышедшим из Литовской земли, князь Василей Ярославич иде во Мстиславль, а с ним Ряполовские три да и князь Иванъ Стрига, да Ощера, и иные многи дети боярские с ними, а в Дебрянце князь Семен Оболенской да Басенокъ да многие же дети боярские с ними, и в то время прииде весть князю Василию во Мстиславль, что князь велики выпущенъ, а дана ему Вологда, и пригонил Данило Башмак.[990] А в Дебряньскъ пригонилъ къ князю Семиону некто киянинъ Полтинкою зовут, а лежалъ тотъ на Москве от княгини Настасьи Олелковы[991] на вестехъ про великого же князя да из Дебряньска погонилъ к Киеву, а сказал имъ ту же весть, с чемъ и Башъмакъ пригонилъ. Князь же Василей Ярославичь со всеми людьми и с бояры, и женами, и с детми поидоша изо Мьстиславля, а изъ Дебряньска князь Семенъ да Басенок, такоже съ всемъ, и снидошась в Пацине.

И пригонилъ къ нимъ туто Дмитрей Ондреевъ, что уже князь великий пошол с Вологды къ Белуозеру, да оттоле и къ Твири. Они же оттоле поидоша вси вместе со многими людьми. Пришедшимь же имъ в Елну, и сретошась с ними татарове, и начаша межи собе стрелятися. По сем же татарове начаша Руси кликати: «Вы хто есть?» Они же отвещаша: «Москвичи, а идемъ со княземъ с Васильемъ Ярославичемъ искати своего государя великого князя Василья Васильевича, сказывають его выпущена. А вы кто есте?» Татарове же рекоша: «А мы пришли из черкас съ двема царевичи Махметевыми детми, и с Касымом да съ Ягупомъ».[992] Слышели бо про великого князя, что братья над нимъ зраду учнили и они пошли искати князя великаго за передьнее его добро и за его хлебъ: «Много бо добра его до нас было». И тако сшедшеся и укрепившеся межю себе, поидоша вкупе, ищущи великого князя, како бы ему помощи.

А князь Дмитрей Шемяка и князь Иванъ Можайской еще стояли тогда на Волоце.[993] А князь великий послалъ в ту пору к Москве изгоном боярина своего Михаила Борисовича Плещеева[994]

с малыми зело людми, какъ мощно бы имъ проити мимо рать княжу Дмитрееву. И тако проидоша мимо всю рать, никим же видимы, и приидоша к Москве в нощи противу Рожества Христова, в самую же завтреню приидоша к Никольскимъ воротомъ. А в ту пору въ град въехала к завтрени княгини Ульяна княжа Васильева Володимерича[995] къ празднику, и вратом отвореным бывшимъ. Они же часа того внидоша въ град. Намесьтник же княж Дмитреевъ Федоръ Галичский[996] Пречистые от завтрени убеже. А княжа Иванова наместника Василья Чешиху, бежаща из града на кони, изнимал истобничишко великие княгини, Ростопчею звали, и приведе его к воеводамъ, и оковаша его; а прочих детей боярьских, княжихъ Дмитреевых и княжихъ Ивановых, имающе, грабяху и коваху. А гражанъ приведоша к целованию за великово князя за Василья, а град начаша крепити.