Великий князь Юрий Всеволодович

Степень седмыи и два митрополиты: Кирил, Иосиф, и грань седмая, в нем же глав 16

<…>

Глава 4. О великом князе Георгии Всеволодичи. Победа на блъгары, и о бывшеи скръби в Руси, и яко не токмо милость от Бога мерится, но и гнев по мере за грехи наводит Бог

По великом князе Констянтине, сыне Всеволожи Георгиевичи Длъгорукаго, паки Владимирьскую дръжаву приат брат его, сии великии князь Георгии, юже преже вручи ему отець его Всеволод. Тогда же блъгары влъжьскиа и камьскиа неправдоваху ему и град Устюг лестию взяша. И сего ради великии князь Георгии посла на них брата своего Светослава. И Богу поспешествующю ему, с множеством воиньства своего взя многыя их грады и веси, и вся области их попленишя, и многое воиньство их победишя, и плену бесчислено взяшя, и приидошя здрави въсвояи.

<…>

Глава 9. О гневе Божии и о нахожении безбожнаго Батыя на Русьскую землю

Егда же не исправихомся и непотребни быхом, зависти же и гордости и неправды не лишихомся, и дръжавнии наши аще и благочестиви бяху, но обаче друг пред другом честь и начальство получити желаше, и един единаго от отеческаго достояниа изганяше, и кождо самочинне тщашеся самодръжьство въсхитити, и сам стареишиньствовати хотяше Русьским царствием, и брат на брата иноплеменныя языки поганых варвар наводяше, понеже самовльне не могохом отвратитися от злоб сих, и того ради усугубляше Бог праведныи гнев Свои и попусти на ны тяжчаишая напасти.

Великое пленение.

И яко бичем от вервии не наказахомся, и того ради пророческое слово на нас исполнися, яко же рече: «Палицею железною упасеши их» (ср. Пс. 2: 9). И тако жестоким пленением в запустение предаде тогда многыя грады и места Русьскаго царствиа, и таковым тяжчаишим наказанием прочее преблагыи Бог, хотя конечнаго запустениа свободити нас, тогда же мучителнеишаго варвара, кровояднаго царя Батыя, от въсточныя страны наведе на Русьскую землю, прьвие на Рязань, потом же на Коломну, и на Москву, и на Владимирь, и на иныя многиа грады, с многою злобою вся испровращая, яко же лютыи некии зверь вся поядая, останки же ноготми растерзая. Его же лютостию храбреиших русьских сынов многих мечь пояде, овии же плещи вдаша сопротивным. Скипетродръжатели же овы оружием падоша, овы же в чюжих кралевъствах укланяхуся гостяще, всякиа помощи отпадше. Ратникъ же грады разоряа, и гражаны овы в плен поплени, овы же оружию ядь полагая, и корысть многу стяжа, княжьска имениа изообрет. Велико зло от него сътворися множеству русьскаго языка. Матери обезчядствовашяся, и сосци их млечнии источники уставишя, вместо же тех слезныя струя от очи низвожахуся, видяще младенца своя на земли поврьжена и мягкая их удеса коньскими ногами стираеми. И кто может словом сказати болезни их утробныя и ины неисчетныя напасти? Чрьтожница повлачимы и всюду обводимы, девы растлеваемы, синклитьскиа жены, иже никогда же рукама своима работному делу касахуся, но рабом своим повелеваху преже, последи же сами повелеваеми варварьскими женами, работну игу выю прекланяюще, пристояху жерновам и горньцу руце придръжащи, огня възжигающи, с черпалом рыщюще, источники обходящи и воду носящи, трапезе предстоящи и храмину пометающи. Иногда бышя гръды, тогда же работою склячени, смиришяся. Иже иногда златыми монисты и свиляными одеждами красящеся, тогда же рубищи раздранны облъчены, боси же и алчны присно. Священныя девы нудими и обругаеми, мужие жен разлучаеми, чяда родителю лишаеми, юноша в плен ведоми, юныя же и старцы мечи пронзаеми, храбрыя же и князи оружием падающе, священници же в жрътвеницех закалаеми. Земля Русьская очервленися кровию, реками лиющися от телес, воды смешаеми с кровию. Умилен позор весь странно видети: мужие, яко снопие в день жатвы, поврьжены, телеса раздроблены смесишяся священных мужь и девиць, и не бе кто погребая их. Враном же и псом пища паче предлагаема. Воплеве в градех, рыданиа на улицах, плачеве в домех! Повсюду стонание, страх на распутиах! Вси ужасошяся и изнемогошя, ниже бегъством свое спасение кто можаше умыслити, истаявше печалми, яко сетию полячены. Всюду беды, яже ни слово может представити. Тогда же мнози мученическими венци от Бога увязошяся.

<…>

Глава 10. Плачь и страдание великаго князя Георгиа Всеволодича и прочих с ним