Великий князь Юрий Всеволодович

Великии же князьГеоргии Всеволодичь стояше с полки своими на реце на Сити, и ту прииде к нему вестник, яко же древле праведному Иову, поведая ему, яко град Владимирь взяша татарове: «Епископ же Митрофан, и великая твоя княгини с дщерию твоею, и съ снохами, и с внучаты, и прочая княгини, и множество бояр и людеи в соборнои церкви огнем скончашяся. Мнози же от них в то время иноческии образ въсприаша от епископа. Сына же твоего Владимира в граде Москве взяшя погани и по многом истомлении у града Владимиря показавше, и смръти предашя его. Воевода же Филипп на Москве за веру Христову мучением скончася. Два же стареишая твоя сына Всеволод и Мстислав в новом граде Владимири от тех же безбожных татар убиена быста, инии же людие мнози избиени бышя. Оставшии же людие к тебе грядут». Самодръжец же и прочии с ним, слышавше сиа, и въскричашя с плачем велиим о церковном разорении, о епископе же и о многом кровопролитии христианьском, бяше бо милостив. И въсхлипая из глубины сердца, моляся и вопиа, сице глаголаше:

Молитва. «О Владыко Господи Боже Вседръжителю! Сице ли угодно Твоему человеколюбию, яко врази наши многи грады разоришя, и попраша многи церковныя домы святыня Твоея, и множеству людем Твоим тогда злобну пагубу съдеяшя? И аз, подобно Иову, лишен бых не токмо супруга и чяд, но и множества Тобою дарованныя ми дръжавы. И не вем, что сътворити, понеже бес числа съгрешихом, и Ты прогневася и зело смирил ны еси. Яко праведен еси, Господи, и праведным судом Твоим множество пролитиа неповинныя крови раб Твоих многи новыя ныне мученики к Себе привел еси. И почто един аз остах смирен и посрамлен? Но, о премилостивыи Господи, Господи! Не остави милости Твоея от нас и мене, грешнаго и недостоинаго раба Твоего, сподоби пострадати с христоименитыми сими людми Твоими истинныя ради веры имени Твоего Святаго, Отца и Сына и Святаго Духа. И причти мене наследию вечных Твоих благ с новыми сими Твоими мученики, и о всех сих да будет воля Твоя святая, яко благословен еси в веки. Аминь».

И тако ему в велицеи печали молящюся, и по малу нача укреплятися, и всю печаль свою възверже на Бога. И абие с всеми плъки своими уготовися к сопостатным на брань. Погании же скоро приближишяся, и съступишяся плъци, и бысть брань велика, и сеча зла, и кровь многа яко вода пролиася. Богу же попустившю, побежени бышя русьстии князи и боляре и все воиньство от поганых татар, идеже великии князь Георгии венчася кровию, ею же взыде къ Христу, от Него же и мученическии венець приат, его же желаше, месяца февраля в 4 день.

Глава 11. О обретении телеси великого князя Георгиа, последи же и главу его обретошя

Егда же инамо уклонишяся погании татарове, и тогда блаженныи Кирил, епископ Ростовьскии, идыи з Белаезера, тамо бо избыв варварьского сверепьства, и прииде на место, идеже добропобедныи великии князь Георгии святую свою кровь пролиа от безбожных татар, подвизаяся по отеческом достоянии, и ту обрете честное тело его. Его же с многими слезами благоговеино взем и принесе в Ростов, и пев над ним обычная пениа съ всем освященным собором и с прочим причтом, плачю же велику бывшю от людеи всех, и положишя его в церкви Пресвятыя Богородица в Ростове. Главы же его не обрете тогда епископ въ множестве трупиа мртъвых, последи же обретошя и святую его главу, и принесошя в Ростов, и положиша ю в гроб к честному телеси его.

Глава 12. О пренесении честных его мощеи великаго князя Георгиа из Ростова въ Владимирь

Егда же брат его богохранимыи великии князь Ярослав Всеволодичь прииде из Новаграда в град Владимирь и очисти святыя церкви от трупиа мрътвых, оставшая же люди събрав, утеши. Потом же посла в Ростов и повеле принести въ Владимирь честное и страстотрьпческое тело святаго брата своего великаго князя Георгиа, его же вземше, с многою честию понесошя. И егда бысть близ града Владимиря, и срете его сам великии князь Ярослав с епископом Кирилом, и съ всем священным събором, и с детми своими, и с боляры, и с всенародным множеством гражан и окрестных с умилением и съ слезами и с рыданием, и положишя его в соборнеи церкви Пресвятыя Богородици в приделе южном с песньми надгробными. Всем же зрящим видети есть чюдо преславно и удивлению достоино, яко святая глава его тако съвокупно прилпе к честному телеси его, яко ни следа видети отсечениа на выи его, но вся съставы целы и неразлучны, иже и доныне тако в гробе бяху пребывающе, от всех людеи видимы и удивляеми и достоино почитаеми. Еще же и рука его десная выспрь бяше въздеяна видети, ею же, яко жив, показуя подвиг своего съврьшениа, яко въсприат от Бога вместо земнаго царствиа небесных и вечных благ наслажение вкупе с царственым си сопругом, и с трема благороднеишими сынъми, и с единою дщерию.