Маёнтак Рыбы

у сьвеце ног удвая болей, чым людзей. у сьвеце існуе цэлы клан ног.

у сьвеце існуе культ ног.

у сьвеце ёсьць мужчыны, якія пакланяюцца нагам.

у сьвеце ёсьць жанчыны, якія пакланяюцца нагам.

у сьвеце ёсьць прыўкрасныя ногі Букоўскі, і гэта, вядома, толькі паводле ягоных слоў.

у сьвеце ёсьць ногі, якія ніколі ня мыліся.

у сьвеце ёсьць ногі, якія лёгка абгоняць гепарда, і гэта каштоўныя ногі.

ёсьць ногі, якія кормяць літаральна, і ёсьць ногі, якія ня здольныя нават з ложка ўстаць.

ёсьць ногі падарожнікі і ёсьць ногі, якія ўдзельнічаюць у сэксуальных гульнях.

у сьвеце шмат дзіцячых ног, пазногці на каторых не падразаюцца.

у сьвеце жывуць вельмі маленькія ногі, якія яшчэ не краналіся падлогі.

у сьвеце ёсьць суполка самотных ног, разьведзеных ног таксама багата.

ёсьць ногі спартсмэна і ёсьць ногі праграміста, якія зусім па-рознаму жывуць і разьвіваюцца.

ёсьць вельмі валасатыя ногі і ёсьць ногі, на якіх ніколі не было расьліннасьці.

ёсьць ногі, суцэльна пакрытыя татуіроўкамі, і ёсьць ногі, якія часта ўкленчваюць на малітву.

ёсьць пругкія ногі і ёсьць ногі азызлыя, пасьля доўгага сядзеньня.

і ёсьць ногі, якія заўсёды аднолькава прывабныя й усьцешныя, і ёсьць вусны, якія кожны дзень цалуюць іх, пачынаючы зь вялікага пальца, і, лёгка кранаючыся скуры, падарожнічаюць да сьцёгнаў і ўглыб, і зваротна, і ўніз, пакуль без пацалунка не застанецца толькі юрлівы мезенец.

to be

быць заўсёды на мяжы звар’яцець не прымаць чужых меркаваньняў марыць зруйнаваць усё, што было да цябе ганьбіць уладу ганьбіць выкладчыкаў ганьбіць тых, хто ганьбіць файных выкладчыкаў ня мець часу, каб выспацца ня мець дастаткова часу, каб выгуляцца ня мець дастаткова моцы й трываньня, каб вывучыць спадзявацца толькі на выпадковасьць і «як пашчасьціць»

піць усё, што гарыць піць усё, што мае любы мінімальны працэнт алькаголю піць безалькагольнае толькі дзеля таго, каб запіць есьці хутка і ніколі не гатаваць быць залежным ад пазыкаў сьпісваць, як майстра, які выконвае ёгу дваццатай ступені займацца сэксам у пад’ездах займацца сэксам у дварах займацца сэксам на дахах дамоў займацца сэксам у парках займацца сэксам, калі ў пакоі яшчэ шэсьць дзяўчат і шэсьць сяброў дзяўчат а потым курыць і моўчкі марыць а потым апранаць старыя джынсы й сыходзіць, бо хутка зачыняць інтэрнат альбо сыходзіць, таму што ёй трэба прыбрацца, пакуль не вярнуліся бацькі сыходзіць, бо трэба шукаць у каго пазычыць грошы на піва сыходзіць у пошуку алькаголю сыходзіць і марыць, і ехаць кудысьці, слухаючы ў плэеры Плэйсіба і назіраць, як увесь сьвет раптам сумуе разам з табою быць, існаваць, быць юнаком, быць шчасьлівым, быць студэнтам другога курса і ні аб чым ня думаць

разам

яны вырашылі жыць разам і яна абхапіла яго шыю рукамі нагамі абахапіла талію целам як мага шчыльней наблізілася да яго і яны пачалі жыць разам спалі разам разам елі за адным сталом і з адной талеркі разам глядзелі кіно ў кінатэатры і дзялілі адно месца яны разам спалі на адной падушцы разам стаялі пад адным душам у прыбіральню хадзілі разам, бо былі шчырымі ва ўсім яны разам сустракаліся з сябрамі і трымаліся заўсёды за рукі і калі яна плакала, ён яе суцяшаў, цалуючы кожную сьлязінку асобна і калі яму было сумна, яна яго гладзіла па галаве і разам яны жылі, і дыхалі адным паветрам і рухаліся аднолькава ня толькі ў хвіліны жарсьцяў і дзяліліся адно з адным таямніцамі і рознае ў іх было толькі адзеньне, колер скуры й вачэй

клоўн

Васіль працуе клоўнам, так у яго склалася яшчэ са школы: спачатку ладзіў клаўнады на перапынках за так, потым корчыў рожы ў каледжы, а потым трапіў на курсы ў цырк… і цяпер, пачынаючы ад дваццаці пяці, ён усе выходныя заняты. і ў Васіля звычайна такое ж самае жыцьцё, як і ў любога іншага клоўна… Васіль – мім, Васіль – звычайны клоўн-з-балёнікамі, Васіль – Рональд Макдональд, Васіль у парку раздае цукеркі. і яго нішто не вылучае сярод іншых клоўнаў. ён, як і іншыя, ня любіць людзей, і асабліва дзяцей. і гэта не вылучае яго сярод іншых клоўнаў. ён шмат п’е – і гэта таксама не выключэньне ў вялікім штаце клоўнаў. ён – самотны, і гэта звычайнасьць. дома ў яго жывуць котка й сабачка – ну і што? жыве ён ня тое каб, без раскошы, але неяк шэра й звычайна…

Васіль, як і ўсе клоўны, ня любіць туманныя дні, сьмех, марозіва, дурныя камэдыі, птушак, тэатар і віно… але наш клоўн вылучаецца тым, што мае алергію на кветкі і старых бабуль і зьбірае дома нацыянальную бібліятэку з бабруйскіх запалак, хоча трапіць у кнігу рэкордаў…

твар