Том 12 (XVI век, литература «обобщающих предприятий»)

Святый же самодержец Владимир велми оскорбися о разлучении отца, бяху бо в духовной любви и во благих советех всегда пребывающе, о исправлении благочестия подвизающеся. Епископи же Фотия патриарха многа словеса утешителна от Божественых Писаний на ползу предлагаху, еже утолити скорбь самодержца; такоже и князи и боляре и вси велможи его, благоразумно разсуждающе, утешаху его, и едва увещаваем бываше.

Глава 49. О митрополите Леонтии.

[910] Блаженный же и равноапостольный великий князь Владимир, не терпя видети вдовствующаго престола великия руския митрополия, и немедлено посылает в Царствующий град ко вселенскому патриарху кир Николе Охрисовергису,[911] любезно прошаше себе и всей державе своей всея Земли руския люботрудна духовному учению преосвященна митрополита вместо преставльшагося. И абие назнаменанием Святаго Духа избран бывает Леонтъ, поставлен на русскую митрополию, и вскоре отпущен на Русь, в лета 6499. Пришедшу же ему в Киев, его же боголюбивый князь Владимир и вси людие прияша честне; и бысть радость велия в людех.

Глава 50.

Святый Владимир раздели грады сыновом своим.[912] Благоволением же Божиим помысли по сих преблаженный Владимир совет благ совещати со отцем своим, пресвященным митрополитом Леонтом всеа Руси, еже бы разделити ему землю Руския его державы в наследие сыновом своим и устроити во градех епископы во исполнение благочестия. И нача разделяти грады сыновом своим: Вышеславу — Великий Новград, Изяславу — Полотескъ, Светополку — Туров, Ярославу — Ростов. Умершу же Вышеславу, и даде Ярославу Новград, Борису — Ростов, Глебу — Муром, Светославу — Деревы, Всеволоду — Владимир, Мстиславу — Тмуторокань, Станиславу — Смоленескъ, Судиславу — Псков. Поучение. Посылая же их в тыя грады господьствовати, благословение дая имъ и любочадное о Христе целование, вкупе же наказуя и поучая их, прежде же всего заповеда им страх Божий имети и веру православную непорочно держати, злославныя же догматы до конца отвращати, болши же всего на всех царя и Бога вседушно имети надежу и тому единому покланятися, и того славити, и того ведети творца и содетеля всей твари; и ина многа такова. О всем же повеле им и со епископы советовати: дабы како и поганые на благочестие обращати, и требища идолския разоряти, и всякое нечестие истребляти, и церкви Божия воздвизати, самем же им от всякия нечистоты и от всякого лукавства и неправды удалятися, и от всякого насилия и от лихоимства огребатися, и ко всякому малому и великому судъ нелицемерен предлагати, и о всем рассужати люди Божия в правду, и межу собою братолюбие и единомышление и мир имети, и ко всем людем, не токмо к любовным, но и ко врагом смиряющемся, милость и любов простирати, и во всем по воли Божии жити, надежи ради вечныя жизни.

Глава 51. Поставление епископовъ по градомъ. Пресвященный же митрополит Леонтъ по данней ему благодати от Пресвятаго и Животворящаго Духа избрание сотворяет, якоже есть обычай, и поставляет епископы и посылает их в кииждо град Руския митрополия, коегождо на свой ему Богом порученный жребий, паствити Христово стадо словесных овецъ и имети попечение о тех единородных бесмертных душах, и душах же, запустевших неверием, всеяти семя благоверия и возрастити и умножити плод спасения, и церковь Божию всяческим благолепием благочинне украсити, и исправити слово истинное. В Новград. Первое же посла в Великий Новград епископа Иоакима Корсунянина.

[913] Он же, пришед в Новград, и досталная требища бесовская разори и идолы сокруши, а благочестие утверди. В Чернигов. Потом же митрополит Леонтъ посла во град Чернигов епископа Неофита.[914] Таже посла во град Ростов епископа Феодора.[915]

Во Владимир и во иныя грады. По сих же посла во град Владимир епископа Стефана[916] и во иныя многия грады разсла епископы. И бысть слава Господня повсюду, и радовахуся людие, и сияше в них православие, и имя Христово величашеся, и слово Божие растяше и множашеся.

Глава 52. Начало церкви соборныя в Киеве.[917] И паки благоволением Божиим в четвертое лето по крещении блаженный Владимир совет благъ совеща со отцемъ своим, преосвященным митрополитом Леонтом, и со епископы и з боляры, еже бы воздвигнути камениемъ поставлену великую церковь соборную Десятинную во имя Пречистыя владычица нашея Богородица и Приснодевы Мария в преименитом граде Киеве. Молитвовавше же доволно, яко да обрящут место удобно, идеже благоволит Богъ и Пречистая Богородица таковей Божественей церкви создане быти, и милостыню многую убозей чади повелеша раздаяти, — и Божиимъ хотением обретоша место благопотребно, на немже месте дом был прежереченнаго человека Божия, зовомаго варяга, и сына его Иванна, идеже мученическими венцы от Бога увязошася, и честною их кровию первее освятил есть Богъ дом той. И на том месте начаша здати соборную церков Богоматери. Мастеры же бяху прежереченнии хитрецы.