Том 12 (XVI век, литература «обобщающих предприятий»)

Рыдание дияволе. Злодеивый же диявол и все его бесовское множество и темное их богопротивное соборище, видяще многих людей благочестием просвещаемы, а идолы на земли попираемы, и рыдая диявол стоняше и сетуя, глаголя: «Увы мне! О, горе мне, яко и отсюду прогоним есмь! Зде бо мнях жилище себе имети, понеже зде не сут учения апостольскаго, и людие, не ведуще Бога, мне угодие творяху и служаху ми, о нихже веселяхся преже. Ныне же от таковых невеглас побежен есмь, а не от апостолъ, ни от мученикъ, и не имам уже царствовати во странах их».

Блаженный же Владимир, яко виде крещены вся люди града его, возрадовася душею и сердцем, яко позна сущаго Бога не токмо сам, но и люди его, с нимиже ликовствуя и со многим благодарением молитвы прилежныя принося Богу и возрев на небо, и вопияше, умилно глаголя. Молитва: «Боже, сотворивый небо и землю, призри на новопросвещенныя люди сия и дай же нам разум, еже уведети и знати тя, единого истиннаго Бога, якоже познаша тя страны християнския! И утверди в них и во мне веру твою праву и несовратну! И мне помози, Господи, на вся сопротивныя враги, да надеяся на твою державную помощ, побежу вся козни дьяволя и вся враги видимыя и невидимыя, яко твоя держава нерушима и царствие непременно Отца и Сына и Святаго Духа, ныне и присно и в бесконечныя веки. Аминь».

Глава 39.

Святыя церкви зижемыи и презвитеры поставляемы. И сице помолися и повеле святыя церкви воздвизати повсюду, во градех же и весех, и честныя монастыри составляти, идолския же храмы истребляти и под тех вчиневати областию. На холме же, идеже стоял кумир Перун и прочии демонстии кумири, и ту постави церковь святаго Василия;[906] такоже и по всем градовом и весем воздвизахуся церкви. Дары же великия и стяжания земная доволно святым церквам даяти завеща. Святителие же поставляху попы, освещше их на вся церкви, помолившеся о них с постом, и предаша их Господеви, в негоже вероваша. И тако благодатию Божиею умножашеся число учителей, и вера православная преспеваше везде и цветяше, сияше яко солнце.

Глава 40. Учение книжное отрочатом в Киеве.[907]

Таже по сих благоволениемъ Божиим пресвященный митрополит Михаил купнотщателно съ сыном своим, богомудрым самодержцем Владимиром, умыслиша, како наипаче утвердити веру православную в Рустей земли: и повеле взимати у нарочитых людей младыя дети, и даяху учити их книжному писанию, азбукам и всякому написанному святых книг слову. И тогда матери чад своих, даемых учитися грамоте, плакахуся по них яко по мертвецех, еще бо не велми бяху тогда утвердилися верою. И бысть множество училищ книжных. Богодухновенный же учитель, пресвященный митрополит Михаил, призываше к себе всех тех учителей грамотных и наказываше их праве и благочинне учити юныя дети, якоже словесем книжнаго разума, такоже и благонравию, и правде, и любви, и зачалу премудрости, страху Божию, и чистоте, и смиреномудрию; учити же их не яростию, ни жестостию, ни гневом, но растовидным страхом и любовным обычаем и сладким проучением и ласковым утешением, да не унывают, ни ослабеют, прилежно и часто прослушивати и наказывати их; предавати же комуждо их урок учения с рассуждением противу коегождо силы и со ослаблением, да не унывают же; наипаче же всегда прилагати имъ учение от закона Господня на ползу души же и телу; от безумных же и неподобных словес всячески ошаятися.

И тако благодатию Божиею елицы научишася грамоте, от нихже бысть множество премудрых философовъ, яко сбытися пророчеству, глаголющему яко к лицу Руския земли: «Во дни оны услышат глусии словеса книжная, и ясенъ будет язык гугнивых».[908] Сии убо рустии людие прежде сего никогдаже не слышаша словес Божественых Писаний, но бяху, яко зверии, идолослужебни, безумнии и кровопролитливи; ныне же премилостиваго Христа Бога премудрымъ устроениемъ и благодатию его просвещени и евангельски живуще, и быша премудрии философи дивни, якоже рече пророкъ: «Помилую егоже аще помилую».[909] Тако бо помилова Богъ люди руския порожением банею паки бытия и обновлением Святаго Духа и научением премудрости разума книжнаго, имже мощи обрести путь спасения. Мнози же и обретоша, и совершенно Богу угодиша, и Небесное Царство получиша. Сих же ради всехъ и всяческих ради слава единому содетелю, всех благих подателю Богу! (...)

Преставление митрополита Михаила. Блаженный же и приснопамятный пресвященный митрополит Михаилъ в добродетелных исправлениих препроводи житие, преиде от мира в премирное блаженство к желаемому Христу Богу, в вечную жизнь с миром радостно преселися, пожив на земли крепкимъ житием добре и боголюбезне; многи труды о Господе показа, и многия идолския требища разори, и многия люди неверныя в веру Христову обрати, и веру православную в новокрещеных людех утверди, и всех богоразумию научи.