Том 12 (XVI век, литература «обобщающих предприятий»)

Глава 53. Начало Ростовстей церкви. Такоже и во граде Ростове тогда вера благочестивая нача обновлятися пришествием святаго и праведнаго страстотерпца, боголюбиваго князя Бориса Владимирича,[918] идеже тогда прежепомянутый епископъ Феодоръ люботрудно подвизаяся, проповедая слово Божие, и аще же и многа озлобления от неверных подят, но обаче помощию Божиею и Пречистыя Богоматери постави в Ростове церковь, велми чюдну и прекрасну, дубовными древесы, во имя Пречистыя Богородицы, честнаго ея Успения, о нейже бяше писано, якоже до тоя не бысть така церкви, ниже потом имат быти. И о чюдотворце Леонтии. Пребысть же та дивная церкви лет 165.

[919] При державе же благовернаго великого князя Андрея Георгиевича Боголюбовскаго[920] Божиим попущением погоре град Ростов, и чюдная та церковь згоре. И на том месте начаша здати церковь каменну. Ей же рвы копающе, обретоша многочюдесныя мощи целы со всею одежею великаго святителя Леонтия,[921]

иже бысть родом Царяграда, от Божия же анггела объявлен бысть патриарху, да его освятить во епископы граду Ростову, идеже прежнии епископи Феодоръ и Ларионъ[922] изгнани быша из Ростова от неверных людий.* Святый же Леонтий прииде в Ростов и виде люди, состаревшася в неверии; и остави старыя люди, младенца же к церкви призываше, и сладостною кутьею кормяше их, и благочестию учаше их, и крещаше их. Родителие же их, вземше различная оружия, и устремишася не токмо изгнати святаго Леонтия, но и убити хотяху. Святый же изыде противу их с честным крестом и со всем освященным собором, — невернии же ослепоша; святый же Леонтий всех их крести, — и прозреша вси. И оттоле в Ростове утвердися совершенно благочестие и доныне.

Глава 54. Начало Белаграда и в нем епископа.

[923] И не токмо же тогда древния грады благочестиемъ просвещахуся, но и на пустынных местех святый Владимир многия грады созидая и в них святыя церкви воздвизая и благочестием исполняя. Тогда же и Белград постави, и церковь в нем Христова Преображения воздвиже, и возлюби град той паче инех градов, наполни же отвсюду множеством людий, в негоже епископа Никиту посла, егоже постави Леонтъ митрополит. (...)

Глава 65. О храбрых мужех. Елико же преблагий Богъ в телесных преспеяниих усугуби благородию его благодать мужества и смысла, тако же дарова ему и велможи премудры и разумны и во благосоветии дивны, мнози же и силни и храбростию удалы и нарочиты. Якоже некогда Давыдъ царь имяше у себе силных муж тридесят и седмь[924]

таковыи мужествены, яко меншему их могущу быти на сто мужей, вящшему же наипаче возможно, — и противу тысящи братися, тако и сей блаженный Владимер по благодати Божией имяше у себе, якоже вышереченно, мужи храбрыи, и удалы, и силны. Янъ. В них же бяше прежереченный Янъ Усмошвец,[925] иже убивый исполина печенежска, велика и силна. Рагдай. Такоже дивен бяше в победах и Рагдай удалый, иже на бран един исходити могий противу триех сот супротивных. Александръ. Подобно же симъ мужество и храбрость имея и Александръ, рекомый Поповичь. Малвредъ. Таков же бе и Матвред силный. Андрих. Равен же мужеством и Андриох Добляйков,[926] и инии мнози. Храбрость Александрова. Бысть же тогда некто половчин, именуемый Володар, и сей дияволим научением, забывъ многое к себе благодеяние государя своего святаго и великого князя Владимера, прииде бранию ко граду Киеву со братом си и со многими половцы, яко время удобно усмотрив своему зломыслию: великому бо князю Владимеру самому не сущу тогда в Киеве, но в Переславце на Дунаи. И бысть тогда в Киеве смятение велие; но обаче веры ради и благодеяния блаженнаго Владимера вскоре разори Богъ неправедныя советы безумнаго Володаря, и не токмо не успе граду ничтоже зло сотворити, наипаче же — сам погибе и прочии с ним. На них же бо Богом подвизаем изыде нощию вышереченный Александръ Попович и абие победи их; самого же враждотворца Володаря оружию во снед сотвори и конечной пагубе предаде, с ним же вкупе и брата его и низложив и мертва сотвори и иных множество половец изби, овех же в поле прогна. Слышав же сия блаженный Владимер самодержец возрадовася зело и велие благодарение воздаваше Богу, на Александра же возложи гривну злату и сотвори его велможу честней полате своей. Александрово и Яново мужество. И паки потом Александръ Попович и Ян Усмошвец, иже убивый печенежска исполина, и сия предивна храбра оба вкупе помощию Божиею многи победы показаша и многим сопротивным одолеваша. Некогда же множество печенег избиша и самого князя их Радмана и со трема сыны его живых изымаша и ко блаженному Владимеру в Киев приведоша. Боголюбивый же Владимер о всех Божиих благодеяниих сугубо радовашеся и веселяшеся душею, купно же и телом, в пространствии сердца со всеми людми и творяше празнование светло, в молитвах и во благодарениих и во псалмех и в песнех духовных выну хваляще и славяще Бога и Пречистую Богородицу и всех святых; и милостыню многу раздаяше по церквам Божиим и по монастыремъ, и нищим, яко да всегда на молитву подвижнейше будут к Богу. (...)