Том 12 (XVI век, литература «обобщающих предприятий»)

Якоже древле возлюби Богъ и благослови и умножи семя праведнаго Авраама,[930] тако и зде в новой благодати в Рустей земли возлюби Богъ и благослови и умножи новаго Израиля, семя праведнаго Василия, рекомаго Владимера, иже и до ныне вси тщахуся угодная Богу сотворити. Якоже сий богомудрый Георгий-Ярослав сам тщашеся угодная Богу сотворити и вся благолепотныя чиновы християнскаго исполнения и церковнаго светлоукрашения и святых апостолъ и святых отецъ предания удобрити и уяснити, такоже и во всей области царствия своего вся люди во благочестие управляя, и многи святыя церкви поставляя, и честныя монастыри устраяя.[931] И таковым подвигом его вера християнская в Руси сугубо распростирашеся и утвержашеся совершенным благочестием, и черноризцы умножахуся. Сам же вседушно любяще церковныя уставы и презвитеры по велику чтяше и Божественыя книги прилежно сам почиташе.

Глава 2. О снискании святых книгъ. И многи книгописатели собра, и прелагаше от греческих книг на руский язык, и многи книги сниска,

[932] имиже поучахуся вернии людие, наслажающеся Божественаго учения. Якоже некто добръ земледелец землю взора и учреди, а другий насеет ю, а инии пожинают и ядят пщу нескудну, татсо и сий благочестивый Руския земли скипетродержател, великий князь Ярослав, на возделанной ниве человечестей отца его святым крещением, он же насеяв книжными словесы, еже мы, людие его, и до ныне пожинаем и пищи бесмертнаго живота насыщаемся от книжнаго учения. Велика бо есть полза от святых книг, имиже наказуеми и учими есть пути покаянию и удержанию от неподобных дел и словес, в нихже и мудрость к Богу обретаем. Книжная бо словеса реки сут, напаяющи вселенную, книги об неисчетная премудрости глубина, и сии суть исходящем мости, сими бо в печали утешаеми есмы, сии сут уста воздержанию. И что болши тоя премудрости? Якоже и Соломонъ похваляя глаголаше, яко от лица Господня: «Азъ, премудрость, вселих совет и разум, и смыслъ аз призвах. Мой страх, мои совети, моя мудрость, мое утвержение, моя крепость. Мною царие царствуют, а сильнии пишут правду; мною велможи величаются и судия держат землю. Аз мене любящая люблю, и ищущии мене обрящутъ благодать».[933] Аще кто прилежно взыщет премудрости, той велику ползу души своей обрящет. Иже бо святыя книги почитает, той з Богом беседует, а иже кто почитает пророческия беседы, и евангельския животныя глаголы, и апостольская проповедания, и отеческая учения, и жития святых, сей приемлет сугубо ползу души своей.

Христолюбивый же Ярослав зелным тщанием многи книги написав, и положи в церькви Святей Софии, юже сам созда и украси[934] златом и сребром и сосуды церковными; и иныя церкви воздвизая по градом и по многимъ местом, и почитая священники, и доволствуя их оброки от имения своего, и веля им учити и наставляти люди закону Божию, яко темъ дати ответ о душах их. И тако священницы понужаху люди приходити ко святым церквам и учаху их благочестию. И благодатию Христовою умножахуся число священникъ, и людие безчислении Христову закону радостно последоваху. Диявол же сетоваше, побежаем новопросвещенными людми.

Глава 3.

О победах на сопротивныя и о поставлении града Юрьева Ливонского.[935] Сия же видев благоверный самодержецъ Ярослав радовашеся и велие благодарение воздаваше Богу. И елико же ему вера в сердцы цветяше, и отеческое благочестие во основание трудолюбно назидая и божественными добродетелми совершая, потолику преблагий Богъ сугубо тому и державу царствия умножи и многи окружныя страны поработи ему. Покаряющаяся ему мирно устраяше, а враждующих ему оружием к себе прикланяше. Печенеги же устремившаяся бранию на отечество его, и сих Божиею помощию преславно победи.[936] И сам хождаше на супротивныя ему страны, и Ясы

[937] взят, такоже и Белзы,[938] взят, и литву одоле, и мазовшаны;[939] такоже Юрьевъ немецкой и чюдь победи, иже в пределех преславнаго града Пскова, и тамо же и град постави Юрьевъ по имени своему.

Глава 4.

Книжное учение в Новегороде отрочатомъ.[940] Прииде же в Великий Новград и ту поручи господьствовати сыну своему Владимеру. И собра Ярослав от старейшин новоградских и от презвитеро детей 300 и повеле их учити грамоте.

Сынъ же его Владимер и ко Царюграду ходи ратию, отцем послан. В Великом же Новеграде той же Владимер в лето 6555 воздвиже храм велик и пречестен Святыя София,[941] иже есть Божия Слова Премудрости. По сем же и преименитый град Киев совершен бысть, егоже сий великий князь Ярослав болший перваго заложы. Вкупе же и церковь Святая София и Златая Врата в лето 6545 совершишася.[942] По лете же едином и церковь Святыя Богородица, иже в Киеве, Феопентомъ митрополитом освящена бысть,[943] юже святый Владимер, отецъ Ярославль, велику созда.