Читаем Том 12 (XVI век, литература «обобщающих предприятий») полностью

Том 12 (XVI век, литература «обобщающих предприятий»)

По Феопенъте же митрополите (4 митрополит) советом самодержца Ярослава епископи рустии, сшедшеся и рассудивше по священным правилом божественых апостолъ и святых отецъ, поставиша на Рускую митрополию святителя мужа именем Илариона[944] (5 митрополит), иже ископа себе пещеру, в нейже последи его вселися преподобный Антоний Печерский, о немже доволно есть в Житии его, прочее же в Патерице Печерскомъ.[945]

Глава 5. Всякоя святыни исполнение.

[946] И тако многотрудным их к Богу преспеянием идолский мрак от нас до конца отгнася, и заря благоверия просвети нас. Тма бесовскаго служения от нас истребися и погибе, и солнце евангельское землю нашу осия. Капища раздрушишася, и святыя церкви водрузишася. Идоли сокрушишася, и святым иконам поклонение утвержашеся. Беси отбегаху, и крестный образ грады и места освящаше. Пастырие словесным Христовым овцам умножахуся; святителей чинове, архиепископи и епископи и презвитери и диякони бескровную жертву к Богу возношаху и святыя церкви и весь клирос, благолепием одевающе, украшаху. Апостолская труба и евангельский гром вся наша грады огласи, и повсюду благовонный фимиян, к Богу воспущаем, воздух освяти. И многи манастыреве по горам и по удолиям и на островех морских сташа, и повсюду вси людие, мужие и жены, малии и велицыи, исполняху святыя церкви и, воспрославляюще, глаголаху: «Един святъ, един Господь Исусъ Христос во славу Богу Отцу, аминь![947] Христос победи, Христос одоле, Христос воцарися и прославися со Отцем и со Святым Духом, иже везде сый и вся исполняя[948] и от небытия в бытие вся приведый!»

Не токмо же единеми благоволи Богъ в Руси славитися имени его святому, но и богогласным пением хотя украсити церковное исполнение.

Глава 6. Богогласное пение от грек. Веры же ради христолюбиваго Ярослава приидоша к нему от Царяграда богоподвизаемии трие певцы гречестии с роды своими, от нихже начат быти в Рустей земли анггелоподобное пение, изрядное осмогласие, наипаче же и трисоставное сладкогласование и самое прекрасное демественое пение[949] в похвалу и в славу Богу и Пречистой его Матери и всем святым, в церковное сладкодушное утешение и украшение, на ползу слышащим, во умиление душевное и во умягчение сердечное к Богу.

Глава 7. Преставление великаго князя Ярослава. Богомудрый же Ярослав сице вседушно подвизася о утвержении православия, якоже и святый отецъ его Владимер, и тако богоугодно поживе и старости маститыи достиже; и болезновати нача, и разряди грады державы своея во обладание сыновом своим. 6 сынов. Емуже бяху сынов 6:

[950] Всеволод, Изяслав, Светослав, Всеволод, Игорь, Вячеслав. И наказа их в любви пребывати и Божий страх имети и отечество державства в мире и во благочестии исправляти.

И пришед в Вышеград и велми изнемогаше. Сыну же его Изяславу тогда сущу в Киеве, а прочии сынове его во своих пределех тогда бяху державствующе. Един же от сынов его, Всеволод, бысть у него: бе бо любим отцем паче всея братия, егоже всегда имяше у себе.

Благочестивый же самодержец Ярослав поживе всех лет 76; егда же приспе конец жития его, и со многим благодарением святую свою и боголюбивую душу предасть Господеви, в лето 6562 месяца февраля 24 день[951] в первую суботу поста святыя великия Четверодесятницы. Въ Цари же граде тогда царствуя Михаил Пафлегоненин.[952]

Боголюбивый же отчелюбец Всеволод много плакася и, спрятав честное тело приснопамятнаго и святопочившаго отца своего, егоже возложше на сани[953] и повезоша в Киев. И плакаху по нем вси людие; и принесше вложиша его в раку мраморяну. Священный же лик, отпевше над ним, якоже обычай обдержит, и погребоша его честно в церкви Святыя Софии. (...)