Том 12 (XVI век, литература «обобщающих предприятий»)

Она же, целовавши всех и благословивши, и возревши на небо, и рече: «Ты, Господи сердцевидче, ходивый со Авраамом, иди и с нами и с рабы твоими, со Еуфросиниею, и з Давыдомъ, и со Евпраксиею!» И тако поидоша сущии с нею.

О, страшное чюдо! Не бывши ни в коей стране, ни во граде, ни в селе, ныне же, вземши мужскую крепость, премину вся грады и власти, приимающе от всех честь велику князей. И тако и срете ю царь, идый на угры,[989] и послав ю в Царьград с великою честию. Она же пришедши, поклонилася святым церквам и ту сущей великой церкви Святой Софии. И поклонившися, и благословившуся от патриарха и покупивши различныя потребы, темиян и кацию злату, и иде во Иерусалимъ.

И пришедши во Иерусалимъ, и посла слугу своего Михаила к сущему тамо патриарху, глаголющи: «Владыко святый, сотвори милость на мне: повели ми, да отворят ми ся врата Христова».[990]

Он же повеле прошению ея быти отворими. И пришедши ко вратом, и паде на земли, глаголюще: «Господи Исусе Христе! Не вмени ми сего во грех, занеже изволих изследити по стопам твоим и внидох во святый град сей». И иде ко Гробу Господню,[991] и пришедши и поклонившися, целовавши Гроб Господень, и сущии с нею. И покадивши Гроб Господень златою кадилницею и многоразличными фимияны, и изыде. Обита въ Святей Богородицы в Руском монастыри.[992] И во утрии день иде второе ко Гробу Господню и такожде сотвори; и в третий день тожде сотвори. И давши злата много, и воставивши кацию златую на Гробе и многоразличныя фимияны, и ставши у Гроба Господня и воздевши руце свои, и возревши на небо, со слезами, воздохнувши из глубины сердца, глаголаше: «Господи Исусе Христе, Сыне Божий, рождейся от Приснодевы Мария спасения ради нашего, реклъ еси: „Просите, — и приимете".[993]

Аз же грешная, егоже просих, и получих от тебе, Владыко. Се же еще прошу у тебе, милостиве, да скончаю место прошения моего: приими духъ мой от мене во святем граде твоем Иерусалиме! Пресели мя в вышний град твой Иерусалимъ! Покой мя на лоне патриарха Авраама со всеми угождьшими ти! Аминь». Сице глаголюще, изыде во иже реченную церковь святыя Богородицы, идеже обитала, ту же, посещением Божиим, впаде в недуг и нача болети. И лежащи на ложи своем, глаголюще: «Слава тебе, Владыко, яко восхоте и сотвори мне, рабе твоей!»

И тоя же ради болезни не може ити на Иердан.[994] И иде брат ея Давыдъ и сестра ея Еупраксия и сущии с нею. Она же лежаще на ложи своем, хваляще Бога, глаголющи: «Господи! Призри на рабу твою Еуфросинию и помилуй мя!» И приидоша бывшеи на Иердане; она же, с радостию воставше и приимше от них ерданскую воду, и пив, облияся по всему телу своему и, возлегши, рече: «Благословен Богъ, просвещая всякого человека, грядущаго в мир,[995] в веки! Молюся человеколюбивому Богу, ревнующе Петрову покаянию по

отвержении, и не отчая себе, но плакася горко:[996] приим того покаяние, и приими и мене, недостойную рабу твою Еуфросинию, молящуся на противнаго своего врага диявола, — да не возглаголет ми на Страшнемъ твоем Судищи ничтоже пред тобою, Господи, злый враг! Воступих ногама своима на змиеву его главу и супротивихся дерзости его окаянней, надеющеся на твое человеколюбие, Господи!»

И услыша Богъ молитву ея. И посла Господь ангела своего к ней глаголя: «О, блаженная ты еси в женах, и благословен труд твой! Се же отверзоша ти ся двери породныя, и вси анггели собрашася, держаще свеща, чающе твоего сретения, а дар, егоже просиши у Бога, дасть ти ся». И се рек аггелъ, и отиде от нея.

Блаженная же Еуфросиния возрадовася душею и вскоре посла в Лавру глаголюще: «Се уже приспе ми время, да же ми Богъ покоить; а приимите ли мя, что бых легла в церкви Святаго Савы?»[997]

Они же обещашася к ней, ту сущии черньцы: «Имеем запрещение от святаго Савы, иже жены не приимати ни коеяже, но се ти есть монастырь Святые Богородицы, Феодосиево общее,[998] в немже лежат жены святыя: мати святаго Савы, мати святаго Феодосия, мати святых безмезднику Козмы и Демияна, именем Феодотия,[999] и инии мнози святии. Ту ти подобает лечи».

И приехавъ посол ея, возвести Еуфросинии. Она же всем тем похвали Бога и пославши купи себе гроб в комаре Святой Богородицы.[1000] И лежа 24 дний, и позна ся во скончании, рече: «Призовите ми прозвитера, и да ми дастъ причащения. Уже бо зватой близ предстоит, ждый повеления Владычня». И прииде прозвитер, несый причащения. Она же воставши и поклонися 3-жды, и приимши Пречистое Тело, и тако возлеже и предасть душу свою в руце Бога жива, месяца мая въ 24 день иде в покой небесный.