Том 12 (XVI век, литература «обобщающих предприятий»)

И по мале времяни присла отецъ к ней и рече к ней: «Пусти ко мне сестру свою». Она же отвещавши: «Еще не извыче всей грамоте». И уведев отецъ ея, яко, утаившися его, остриже ю, и возярившися на праведную Еуфросинию и сердцемъ горя, приехав к монастыреви, глаголя: «Чадо мое, что сотвори! Приложи сетование к сетованию души моей и печал к печали!» И се ему глаголющи от горести сердца своего, реками слез часто излеваше от очию своею, любезно держаше Евдокию: «Чадо мое, на се ли вас родих, или на се вас мати воспита? Уже ли ваш брак готовятъ? Уже ли чертог и брачныя порты ваю на сетование положих себе? Чадо мое милое, что ми воздаста в радрости места горкое рыдание и печали сердце мое наполниста!» И вси боряре его, слышавше жалость князя своего, плакахуся горько о напрасней печали князя своего.

Блаженная же Еуфросиния отвещавши отцу своему: «Что ради печалуешися о нас? Имаеве бо печалника и помощника единаго Бога». Отецъ же ея малу утеху приимъ от словес преподобныя и еха в дом свой. Евдокия же пребываше в монастыри, повинующися сестре своей.

Блаженная же Еуфросиния трудом многимъ моляшеся к Богу о месте сем, дабы Богъ устроил ей се на неколико время. Бяше же княжна Борисовна имянем Звенислава,[975] и та, пришедши единою от дний принесе свою всю утвар златую и порты многоценны в монастыри къ Еуфросинии и рече: «Ей, госпоже сестро, вся красная мира сего ни во чтоже ми ся мнит. Се даю Святому Спасу и сама хощу поклонити главу свою под иго Христово». Она же прият ю с радостию и повеле иереови пострищи ю и нарече имя ей Епраксие. И тако начаста пребывати в монастыри во едину мысль яже к Богу, и тако бяше видети, яко едина душа в дву телесу.

И потом блаженная Еуфросиния заложи церковь камену Святаго Спаса;[976]

от начатка же Святаго Спаса до совершения церкви — 30 недель. И се хощу вам, братие, чюдо сказати. Бе муж, именем Иван, приставник над делатели церковными, к немуже прихожаше глас многажды, свитающи дни, глаголя: «О, Иоанне, востани, поиди на дело Вседержителя Спаса!» И во един от дний, востав, прииде ко блаженной Еуфросинии и рече ей. «Ты ли, госпоже, присылаеши понужати меня на дело?» Она же рече: «Ни». И паки, разсмотривши, премудрая жена рече ему: «Аще не аз тя возбужаю, а кто тя позывает на таковое дело, того послушай сприлежно с потщанием».

И паки другое чюдо скажю вам, добрии послушницы. Уже скончаней бывши церкви, и мала недоставшимъ плитам, нечимъ бяше верха совершити. И поискавше и не обретоша ничтоже. И печаловашеся о том и воздыхающи и рече: «Слава тебе, Владыко, вседерьжителю и человеколюбче, даровавый нам сия болшая! Дай намъ и меншая, имже свершится церковь твоя!» И тако ей помолшися, заутра по строению Божию обретошася плиты в пещи.[977] И в том дни совершиша церковь и поставиша крестъ. Преподобная же Еуфросиния, видевше совершену церковь, возрадовася душею. И бысть священие и велия радость всем крестияном. И собравшися князи, и силнии мужи, и черноризцы, и простии людие, и бысть радость, и празноваша дни многи, разыдошася кождо их во свояси.

Видев же преподобная, яко исполнил Богъ желание сердца ея, и вшедши в церковь, паде ницъ на земли, и воздохнувши со слезами, и нача глаголати: «Ты, Господи, сердцевидче, благодателю, Боже богом! Милостивый Господи, призри на храм свой, яже создах во имя твое, — якоже рече Соломон: „Вышний в нерукотвореннах церквах живет".[978]

Ты же, Господи, призри на мя, недостойную рабу твою Еуфросинию, и на рабы твоя сия, яже собрах во имя твое: да приимши иго твое легкое[979] на выя своя и поидут во след тебе. И сотвори я овца двора твоего, и буди им пастух и дверник, да ни един от них не будет восхищен волкомъ губителя диявола. И буди им, Господи, оружие и забрало, да не приидет на ны зло и рана не подвигнется к телесем нашим.[980]

И не погуби нас со безаконии нашими, и на тя упование наше положихом, яко ты еси Бог знающим тя, и тебе хвалу воздаю до последняго ми издыхания в веки. Амикь».

Сестры же учаше, сице глаголющи: «Се собрах вы, яко кокошъ птенца своя под крыле, в паствину свою яко овцы, да пасетася в заповедехъ Божиих, да яз веселым сердцемъ подвизаюся учити вас, видящи плоды ваша трудныя. И толик дождь проливаю к вам учением, а нивы ваша во единой мере стоят, не ратующе, ни поступающе горе, а год приспевает во свершение, и лопата на гумне лежит.[981] Но боюсь, егда будет плевел в вас, и предани будете огню неугасимому. Потщитеся, чадо мое, убежате того всего, но сотворитеся пшеницы и смелетеся в жерновах смирением и молитвами и постомъ, да хлеб чистъ принесетеся на трапезу Христову». Сице же и всегда учаше беспрестани, яко мати чадолюбивая, к детем своим любовь показующи.