Том 12 (XVI век, литература «обобщающих предприятий»)

Мы же, братие, на предлежашее возвратимся. Видевши же преподобная Еуфросиния монастырь свой украшен и всего блага исполнен, умысли создати вторую церковь камену, Святыя Богородица.[982] И ту свершивши, и иконами украси и, светив, дасть ю мнихом,[983]

и бысть монастырь велик. И видевши монастыря два, превелика зело, пребогата, и рече в себе: «Слава тебе, Владыко! Благодарю тя, Святый! Что есми восхотела, то еси дал и скончал еси желание сердца моего, Господи!» И рече: «Господи, помилуй мя и скончай прошение мое, — да бых видела Пречистую Богородицу Одигитрию в сей церкви». И посла слугу своего Михаила в Царьград к цареви, нарицаемому Мануилу, и к патриарху Луце з дары многоценными, просящи от нею образа Святыя Богородицы, еже бе евангелистъ Лука написал[984] три иконы, и еще в жизни сей сущии Святой Богородицы, и постави едину во Иеросалиме, а другую в Цареграде, а третию въ Ефесе. Она же с прилежанием прошаше Ефеской иконы Святой Богородицы. Видев же царь любовь ея, и посла в Ефес семсот оружников своих и принесе икону Святыя Богородица в Царьград. Патриархъ же Лука собра епископы и соборы вси Святыя София,[985]

и благослови, и дасть образ Святыя Богородица слузе преподобныя. Он же с радостию прият и принесе госпоже своей Еуфросинии.

Она же, внесши в церковь Святые Богородицы и поставивши ю и воздевши руце, и рече: «Слава тебе, Господи! Слава тебе, Владыко, сподобивый мя видети во днешний день образ Матере твоея!» И сия рекши, украси ю златом и камением многоценным, и устави в вся вторники носити ю по святым церквам, украсивши всю землю полотскую своимъ боголепнымъ монастырем.

И видевши, яко посети Богъ монастырь ея, и вожделе доити святаго града Иеросалима и поклонитися Гробу Господню и всем святым местомъ, — и видети, и целовати, и тамо живот скончати. Видевши же стадо божественых овец совокуплено множество, радовашеся им, яко своему спасению; на всякъ день учаше терпению, воздержанию; уныя же учаше душевней чистоте и бестрастию телесному, говению благообразну, ступанию кротку, гласу смиренну, слову благочинну, ядению и питию безмолвну, при старейших — молчати, мудрейших — послушати, ко старейшим — покорени, к точным и меньшим — любовь без лицемерия, мало вещати, а

множайшее разумети. Тако бо бяше дан дар сей блаженей Еуфросинии от Бога: аще кто ея вопрошаше о которой вещи, она же ему разрешаше то, — и добро получаше. Но всех хотяше имети яко единодушно.

И посла по всей братии своей, поведа им мысль свою, яко она восхоте ити во Иерусалимъ. Они же, слышавше весть сию, з жалостию многою сьехашеся отвсюду ко блаженней Еуфросинии и моляху ея со слезами, да бых не оставила сирых. Она же утешаше благим своим смыслом, яко мати дети своя любящи. И любимый ей брат, нарицаемый во святемъ крещении имянем Вячиславъ,[986] и приехавъ к сестре своей Еуфросинии со княгинею и з детми своими, и пришед, и поклонися ей, глаголя: «Госпожа моя мати и сестро! Что оставляеши мя, правителю души моей и свете очию моею?» И горко ему плачющеся, блаженная же Еуфросиния повеле ему ити, где бы обитал. Дети же его повеле оставити о сестре своей Евдокеи. Дан же бе дар блаженней Еуфросинии от Бога: аще кого озряше очима своима, то разумеяше, в коем человеце сосуд будет избран Богови. Тогда же блаженная, видевши братанне свои, и рече има: «Хощу ваю обручати жениху безсмертному и ввести ваю в чертог Царства его». Онема же послушающа, усладися душа их паче сота медвена словесем преблаженныя; падшима на ногу ея и глаголаста к ней: «Воля Господня да будет и твоя святая молитва. Якоже хощеши, и сотвори нама, госпоже». Преподобная же, с радостию и с поспешением призвавши брата своего, и рече ему: «Аз хощу пострищи Кираанну и Олгу», — тако бо ю бяста нарекая родителя. Смяте же ся отецъ ею о словеси семъ и рече: «Госпожа моя, что ми хощеши творити? Два плача прилагаеши души моей: да плачюся отхода твоего ради, и зсетую чаду деля своею». Мати же ею жалостию терзашеся. Блаженная же Еуфросиния пославши призва епископа тогда престолъ правящи Святой Софии, нарицаемаго Дионисия,[987]

и введше ю въ церковь, и повеле острищи ея и нарече Кираанне Агафия, а Олге Евфимия, — и благословивши ею благословением святых отецъ.

Сама же блаженная Еуфросиния, положивши великий свой наряд обема монастырема, з братиею и сестрама, и дасть держати сестре своей Евдокее и оба монастыря, сама же поклонившися Святому Спасу и Святей Богородицы, и рече: «Господи сердцевидче! Се оставляю дом незатворен никомуже, — и ты, Господи, не затвори от нас твоего Царства!» И тако поиде во Иерусалимъ, поемши брата своего Давыда[988] и сестру свою Еупраксию.

Вси же братия ея горко плакахуся отхода ради госпожи своея. И вси гражане выидоша проводити ея. Старии плакахуся, яко дщери, рекуще: «Увы нам, уже старости нашея, просвещение души нашей!» Уныя же глаголаху: «Како зайде свете очию нашею! Кто нашу уность восхластит? Вздержание юности нашея, не оставляй нас сирых, но в молитвах своих не забывай нас, госпоже, яже к Богу!»