Том 12 (XVI век, литература «обобщающих предприятий»)

Во едину убо нощ возлеже, хотя опочити от многаго труда, иже к Богу в молитвах, и виде видение: поем ю анггелъ и виде ю, идеже бе церквица Святаго Спаса, метохия Святые Софии, яже зовется Селцо[970] от людей. И ту показа ей анггелъ Господень и глагола: «Еуфросинии, ту ти подобает быти». Она же убудившися и дивляшеся в себе глаголющи: «Что ми се хощет быти?» И тое же нощи то же виде дважды и 3-жды. И убудившися от сна и страхом славословящи Бога и глаголющи: «Слава тебе, Боже наш! Слава тебе, сподобивый мя во днешний день видети лице анггельское святое!» И по том нача глаголати: «Готово сердце мое, Боже, готово!»

[971] И паки: «К тебе привергохся от утробы матери моея, Богъ мой еси ты,[972]

како восхоте, тако и сотвори на мне, рабе твоей».

И кончавши ей утреняя, и явися епископу Илии тожде анггелъ, глаголя: «Введи рабу Божию Еуфросинию в церковь Святому Спасу в нарекомо Селцо. Место бо то свято есть, яко достойно есть Царствию Небесному. Яко миро добровонно молитва ея восходит к Богу; яко венец на главе цареве, тако почивает Духъ Святый на ней; яко солнце сияет по всей земли, и тако житие ея просияет пред анггелы Божии». Сей воста вскоре епископъ со страхом и трепетом и прииде к ней. Еуфросиния же, видевши его, срете, поклонися ему и рече: «Благослови, владыко святый!» Он же глагола ей: «Богъ да благословит тя, чадо, и даст ти терпение и силу на вся враги, видимыя и невидимыя». Она же рече: «Аминь. Буди мне по глаголу твоему, владыко святый». И седоста. Блаженный же епископъ отверзъ уста своя, начат глаголати о спасении души. Блаженная же Евфросиния приимаше словеса его, яко семена, в житницу души своей, плодящи ово 30, ово 60, ово 100.

Много же побеседоваста с нею, и се прорече ей: «Дщи, хощу пререщи ти слово, ты же с любовию приими». Она же рече: «Отче господине, рада прииму слово твое, яко дар многоценен». И глагола ей епископъ: «Ведаеши, чадо, се церковь есть соборная, идеже седиши. Ту вси людие собираются, а тебе не лепо зде пребывати. Есть церквица Святаго Спаса в Селцы, идеже братия наша лежа, преже нас бывшии епископи. Негли Богъ поспешит ти молитвами их и твоим трудом, и возградится место велико».

Еуфросиния же, слышавши от епископа, яко тако ей изглагола, и возрадовася душею и возвеселися сердцемъ, явлению аггелову веру приимше, еже виде и слыша от него, и глагола епископу: «Богъ да поспешит ми, отче, молитвами твоими святыми».

Призвав же епископъ князя Бориса,[973] отца сестры ея, и отца ея Георгия, и преподобную Еуфросинию, и силныя мужа и постави я сам на ся послухи, рек: «Се отдаваю Еуфросинии место Святаго Спаса при вас, да по жоем животе никтоже не посудит моего даяния». И се слышавши князи обои и боляре вси от епископа, и поклонистася ему, глаголющи вси людие тако рече: «Ей, владыко святый! Се ти есть Бог положил на сердцы твоем, еже еси тако смыслил о отроковицы сей, попечение о ней имея». Еуфросинии реша: «Ты иди, послушай епископа, еже ти велит, тако сотвори, той есть всем нам отецъ, подобает нам послушати его». Еуфросиния же, возревши на ня осклабленнымъ лицем, и рече им: «Рада иду; яко повелит ми, тако и будет воля Господня о мне». Князи же и боляре вси, слышавше от преподобныя Еуфросинии глаголъ сей, возрадовася и приимше благословение от епископа, и поклонишася преподобной Еуфросинии, и целовавше ю любезнымъ целованием и ехаша в домы своя.

Еуфросиния же, поклонився Святой Софии и благословившися от епископа, и той нощи воставши, поемше с собою едину черницу и пришедши ей на место, зовомое Селцо, идеже есть церквица Святаго Спаса. И влезши ей в церковь и поклонившися, и возгласи сице: «Ты, Господи, заповеда святым своим апостоломъ, рек: „Не носите с собою ничтоже, токмо жезлъ".[974] Азъ же, Господи, твоему словеси последствующи, изыдох на место, ничтоже носяще, но точию твое слово в себе имущи, еже рещи: „Господи, помилуй!" И еще за все имение имею книги сия, имиже утешает ми ся душа и сердце веселит; лише же сих трех хлебов не имам ничтоже, — но токмо тебе, помощника, и заступника, и кормителя. Ты бо еси отецъ убогим, нагим одеяние, обидимым помощьник, ненадеющимся надежда. И буди имя твое благословено на рабе твоей Еуфросинии отселе и до века. Аминь». И так рекши, нача подвижнейши быти на молитву, яже к Богу.

И ту ей пребывающи неколико время, и тогда посла ко отцу своему, глаголющи: «Пусти ко мне Гордиславу сестру, да научится грамоте». Он же пусти Гордиславу к ней, тако ей беста нарекла родителя имя. Она же с прилежанием учаше ю о спасении души. Она же с прилежанием приимаше, яко нива плодовита, умягчивши сердце свое, и глаголаше: «Господь Богъ да устроит ми на спасение души моей твоими, госпоже, молитвами». И се ей рекши, преподобная же Еуфросиния введе ю в церковь, повеле иерееви, огласивши, облачити в чернеческия ризы; и нарече имя ей Евдокия.