Том 12 (XVI век, литература «обобщающих предприятий»)

Титла 3. Послание великаго князя в Новград.[1136]

Слышав же сие великий князь Иван Василевич, что въ его отечестве, в Великом Новеграде, великое возмятение, и посла к ним послы своя, глаголя сице: «О, людие новоградстии! Отчина моя есте изначала, от перваго в земли вашей великого князя Рюрика и до правнука его, святаго и великаго князя Владимера, крестившаго всю Землю русскую, и от того великаго князя Владимера Киевскаго и до великаго князя Дмитрея-Всеволода Юревича Владимерскаго, а от того даждь и до мене род ихъ мы владеем вами, и жалуем вас, и бороним отвсюду. И казнити вас волны же есмя за презорство ваше к нам. А за королем ни за которым, ни за великим князем Литовским не бывали есте, како и земля ваша стала. Ныне же отступаете от християнства к латынству чрез крестное к нам целование. Аз же, великий князь, ничтоже тщетно содеваю вам, ни тягости излишние не налагаю на вас, но якоже быша дани и оброки при отце моем великом князе Василе Василевиче, и при деде, и при прадеде, и при прочих великих князех рода нашего. Вы же бо не едину сию измену ко мне показуете; егоже ради смирити вас хощет Господь Богъ. Но аз, не хотя видети многаго християнскаго кровопролития, и того ради наипаче легчайше хощу пожаловати вас, свою отчину. И вы не наведите сами на себя гнева Божия, от нашего извечнаго над вами державства не отступайте и к латынству не прилагайтеся».

Титла 4. Послание Филиппа митрополита в Новград.[1137]

Преосвященный же Филипп, митрополит всеа Русии, такоже не единою от себе посылая к ним в Великий Новград поучение от Святых Писаний сице: «Слышу, сынове, яко у вас нецыи поощряются на многое стремление, и на многое земли неустроение, и не тишину хотяще ввести, велик мятеж и раскол святей Божии церкви: отступая от православия и от древния державы, хотяще к латынству приложитися. И вы у себя таковых безумных людей сами исправите таковаго злаго их научения, понеже, сынове, то дело благоотметно есть: еже благочестия свет оставити и ко тме латынския прелести приложитися, яко нечающе от Бога праведнаго суда его, ни устрашаяся от него многих вечных мук. И вы Божия гнева убойтеся и сего страшнаго серпа, великим Захариею пророкомъ виденнаго,[1138]

сходящаго с небеси на сыны непокоривыя. И того ради наказуйте бесчинныя, творящая в вас распря и соблазны, и учите их на добро, по древнему пути отецъ своих ходити и жити во прежнем си благочестии и тишине. Многая бо неутолимая лютая предстоят в таковом начинании, — еже оставити закон благочестия спасеныя заповеди живаго Бога и приступити к латынству. Вси бо прелщенныя души верных взыщутся от Господа Бога на тех прелестных богоотступницех. И вы от таковаго их злодейства возражайте по реченному: „Бежи греха, яко ратника, бежи от прелести, яко от лица змиина, да не уязвит твоея душа жалом пагубы некончаемыя". О сих, сынове, сами весте, како в преже бывшая времена коликая царства великих земель, многия грады и места преступления ради закона и преслушания ради святых пророкъ и апостолъ, и святых отецъ учения не послушавше, в пагубу многу впадоша и в запустение быша; а не покорившияся земли и грады Богом порученному их государю сотрошася и разорени быша. Царствующий же великий град Костянтинополь, иже преже благочестием просиявый паче инех царствий, не тоя же ли ради латынския прелести погибе и от благочестия истребися и доныне погаными турки одержим бысть.[1139] И, сынове, Божия страха убойтеся! Не един в вас, не два блазнитеся, хотяще от истинны отступити и с праваго пути заблудити, якоже забывше великую над вами древнюю державу и закона отецъ своих от дед, от прадед, но бесчисленое ваше множество народа вси прелщаетеся. И вы, сынове, смиритеся емуже Богом покорени есте, под крепкою рукою благовернаго и благочестиваго государя, великаго князя Ивана Василевича всеа Русии, вашего очича и дедича, по реченному великим светилником Христовым апостолом Павлом, вселенским учителем: „Всяк, — рече, — повинуяйся власти, Божию повелению повинуется, а противляяйся власти, Божию повелению противится".[1140]

И паки рече: „Бога бойтеся, а князя чтите: Божий бо слуга есть. Не туне меч носит — в месть врагом, в похвалу же добродетлемъ".[1141] И вы, чада, о сих поразумейте и того ради смиритеся. И Богъ мира будет с вами».

Титла 4. Поучение Феофилово. Прежде же о сих и по сих преподобный священноинок, нареченный на владычество Феофил, велми возбраняше им от таковых лукавых умышлениих и повелеваше им престати от таковаго злаго начинания. Они же не послушаху словес его. Он же того ради хотяше снити в монастырь и в келии безмолствовати. И не попустиша его. Боляре же новоградстии, и посадницы, и тысящские, и прочии гражане, иже не хотяху перваго обычая изменити и крестнаго целования преступити, слышавше словеса послов великаго князя, и митрополиче благословение и поучение, и своего нареченнаго на владычество Феофила поучение и возбранение, мнози возрадовашася радостию великою и по древнему исправитися хотяху великому князю.