Том 12 (XVI век, литература «обобщающих предприятий»)

Но обаче бран непрестанна с казанцы русскому воинству бяше, дондеже великий княз послал берегом под Казань братию свою, князя Юря и князя Андрея, с нимиже совокупися и судовая рать. И септября 1 брани бывши весь день у Казани с царем Обреимом, и помощию Божиею победиша татар и воду у них отяша. Царь же Обреим, видя себе в велицей беде, и посла ко князю Юрю, добиша челом на всей воли великаго князя.[1128]

Глава 4. О преставлении блаженнаго Ионы, архиепископа Новоградскаго, и о владыце Феофиле, и о взятии Новаграда.[1129] Всей же главе 1 1 титлъ.

Титла 1.

В лето же 6979-го, ноября 8 блаженный архиепископъ Великаго Новаграда чюдотворец Иона преставися к Богу, иже пророчествова с митрополитом Ионою чюдотворцем великому князю Василию Василевичю, яко сий благородный сынъ его, великий княз Иван, разорит вся самоволныя обычая людей новоградских и во всю свою волю приведет их, еже и збысться. По преставлении же сего прозорливаго и святейшаго архиепископа Ионы людие же новоградстии избраша по жребию некоего священноинока, именем Феофила, и возведоша его на двор архиепископл по древнему обычаю, и послаша на Москву к митрополиту Филипу и к великой княгини Марии,[1130] матери великаго князя Ивана Василевича, с молением бити челом и опаса просити, да бы пожаловал великий князь, моления их не презрил и повелел бы нареченному их Феофилу приити на Москву, и отцу бы своему митрополиту велел поставити его во архиепископы Великому Новуграду и Пскову. Великий же князь митрополича ради и матери своея печалованя моления их и прошения не презре и всякого их прежняго бесчинства и неисправления не воспомяну, ничимже озлоби их, но паче — милосердуя их, и посланника их любочестно отпусти, и нареченнаго во святительство Феофила повеле прислати на Москву, да безо всякого прекословения отцу своему митрополиту велит поставити его во архиепископы. Посланнику же их пришедшу в Новград и возвестившу всем милостивное жалованье великаго князя, посадницы же и тысящские и прочии людие велми о сем возрадовашася.

О измене новоградцев. Нецыи же от них, посадничи дети Исака Борецкого с материю их Марфою[1131] и со инеми изменники, научены дияволом, ко своей им пагубе начаша нелепая и развращенная глаголати и, на вече приходящи, сице кричати: «Не хощем быти владомы великим князем Московским, ни именоватися отчеством его, понеже велики обиды и неправды содевает нам. Мы есмы волнии людие, Великий Новград! Хощем быти владоми кралем Казимером Полским!»

[1132] И тако возмятеся весь град ихъ, и восколебашася, яко пьяни. Овии по древнему хотяху владоми быти великим князем Московским, друзии же Литовскому кралю хотяху подовластни быти. Враждотворнии же изменницы наимствоваху худейших человекъ, иже суть готови на всякое неистовство, и ти, приходяще на вече и не престающе в колоколы звоняху и кричаще, глаголаху: «Краля хощем, да владеет нами!» Инии же: «Великаго князя Московскаго, егоже хощем, есмы держава от древних лет и до ныне». Окаянных же изменников безумнии наемницы камение метаху на тех, иже не хотяху отступити от великаго князя. Мнози же от них, старии посадницы, и тысящские, и лучшии людие, и прочии гражане, увещеваху крамолующих, глаголюще к ним: «Не возможно, братие, сице тому быти, еже вдатися нам кралю и архиепископа поставити от его называющагося митрополита Григория, латынянина суща, иже есть ученикъ сущаго латынянина, суемысленаго Исидора.[1133] Мы же изначалственая держава есмы от великаго князя Рюрика, егоже по своей воли взяла вся Русская земля наша из Варяг, егоже правнукъ, блаженный великий князь Владимер, истинное благочестие обрете и крестися и всю нашу Русскую землю во крещение приведе. И от того святаго Владимера даже и до сего господина нашего великаго князя Иванава Василевича за латынею не бывали есмы и архиепископа от них не ставливали себе, якоже вы ныне суетно умышляете». Развратницы же они, якоже прежнии еретицы, дьяволи ученицы, хотяше свое умышление улучити, на благочестие дерзнуша и великому князю и митрополиту Филипу покоритися во благочестие не хотяще, Бога не боящеся, и православию противляхуся.

Безумное послание в Литву от новоградцев. И посланника своего в Литву к королю со многими дарми безумнии послаша, глаголюще: «Мы, волнии людие, Великий Новград, бьем челом тебе, честному кралю, да бы ты нашему государству, Великому Новуграду, и нам господинъ был. И архиепископа нам вели поставити своему митрополиту Григорию и князя нам дай из своея державы». Краль же возрадовася о словесех сих и дары их с любовию прият и много чествова посланников их.

Олелковичь. К ним же посла князя Михаила Олелкова сына киевскаго.[1134] Новоградцы же прияша его честне. Великаго же князя наместников не сослаша з городища.

Суждалской. А иже был у них князь Василий Горбатой, брат Суждалских князей,[1135] егоже яко слугу у себе имяху, и того послаша в Заволочье, в заставу на Двину: готовляхуся, безумнии, на брань против воинства великаго князя.