Том 16 (XVII век, «смеховой мир»)

Черепаха орла моляше, дабы он летати[616] ю научил. Орлу же сказующу: далече сему быти от естества ея. Она же наипаче с молением прилежаше.

Взем убо ю орел нохтями и на высоту вознесе, посем пусти ю летати. Она же, на камение падши, сокрушися.

ТОЛКОВАНИЕ. Притча являет, яко мнози, любопрения ради[617] мудрейших преслушавше, себе самех вредиша.

58. О БЛОХЕ

Блоха некогда, вскочивши на ногу мужу, сяде. Он же Ираклея[618]–богатыря[619] на помощь призываше. Ей же угрызши*[620] и абие отбегши, со стенанием муж рече: «О Ираклею! аще на блоху не способил еси, како на болших сопротивников пособиши?»

ТОЛКОВАНИЕ. Притча являет, яко не подобает о малых вещех Бога призывати, но токмо в нужных.

59. О ЕЛЕНИЦЕ

Еленица[621], единым оком ослеплена, при брегу морскомъ пасяшеся. И убо здравым оком к земли зряше, ловцев блюдяшеся, ослепленое же око к морю

имяше, откуду ничего же не начаяся.

Приплывшим же неким и сие смотряющим[622] и уразумевшим, застрелиша ю. Она же, умирающи,[623] восплакася и рече: «Отнеле[624] же бояхся, оттуду ничто же пострадах. Откуду же не начаяхся зла получити, оттуду предана есмь на смерть!»

ТОЛКОВАНИЕ. Притча являет, яко многожды нам вредная мнящаяся быти — бывают полезная; полезная же — вредная.

60. О ЕЛЕНЕ И О ЛВЕ

Елень, ловцов бегающи, в пещеру вбеже. Лву же тамо впаде и от него поимася. Умирающи же, глаголаше: «Ох мне, человеков бегающи, зверю лютейшему в руце[625] впадох!»

ТОЛКОВАНИЕ. Притча знаменует, яко мнозии человецы, от малых бед бегающии, в великия беды

впадоша.

61. О ЕЛЕНЕ И О ВИНОГРАДЕ

Елень, бегающи от ловцов, под виноградом скрыся. Проминувшим же ловцом мало, елень совершенно уже проминути их мняще, начат виноградное листвие ясти. Им же от трясения шумящим, — услышавше,[626] ловцы возвратишася к шуму, мняще и познавше, яко нечто от зверей есть крыющеся, стрелами стреляюще, убиша еленя. Он же, умирая, сицевая глаголаше: «Праведно убо аз пострадах: не бы подобаше ми спасающую и покрывающу мя от смерти[627] сию погубляти».

ТОЛКОВАНИЕ. Притча являет, яко обидящии благодетелей своих от Бога мучими бывают.

62. О ОСЛЕ И ЛВЕ

Осел некогда со алектором вместе пасяхуся. Лву же нашедшу на осла, алектор возгласи. Лву же, — глаголют, — алекторова гласа боятися,[628] — убоявся, лев побеже.[629] Осел же мняше, яко его убояся лев и побеже текий[630] скоро, лва гоняше.

[631]

И егда далече его отогна, идеже не к тому бысть алекторов глас слышан, возвращься лев, осла снеде. Осел же, умирая, вопияше: «Бедный убо аз и безумный! Не сый[632] воинских родителей, и почто на брань устремихся?!»

ТОЛКОВАНИЕ. Притча знаменует, яко мнози человецы, несохранително и небрежно[633] на смиряющихся врагов лстивно[634] и неразсужденно приступающе, от смирения сих погибают.

63. О ОГОРОДНИКЕ И ПСЕ

Огородников пес в кладезь впаде. Огородник же, хотя его оттуду извлещи, сниде и сам в студенец[635]. Разумев же пес, яко еще глубочае сего хощет, сошед, погрузити, и обращься, огородника угрызаше. Он же, з жалостию возвращься, рече: «Праведно убо пострадах: что мне треба есть и чесо ради[636] своего губителя[637] извлещи потщахся?[638]»

ТОЛКОВАНИЕ. Притча к неправедным и неблагодарным.

64. О СВИНИИ И О СУКЕ

Свиния и сука между собою браняхуся. И убо свиния кляся на Афродиту зубами расторгнути суку. И сука к ней, отвешав, рече:[639]

«Добре нам на Афродиту кленешися: являеши ся убо, яко вяшще от нея любима еси, — иже твоих нечистых плотей (вкушающая) ниже всячески во святилище приносити тя велит».[640]

И свиния рече: «Сего ради убо наипаче являет бог,[641] приимущи и любящая мя, ибо от убивающаго мя всегда, сопротивляяся,[642] отвращается. Ты же убо зле воняеши — и жива, и умерши!»

ТОЛКОВАНИЕ. Притча являет, яко премудрии от риторей, яже от врагов уничижения благообразно в похвалу преображают.

65. О СВИНИИ И О СУКЕ

Свиния и сука о благородствии пряхуся[643]. Рече же сука: благородна быти от всех пеших[644] животных. Свиния же, обращся, к сим[645] рече: «Но егда сия глаголати будеши, разумей, яко сего ради и слепых своих щенят родиши!»

ТОЛКОВАНИЕ. Притча являет, яко не в скорости вещи, но в совершении[646] разсужаются.

66. О ЗМИИ И О РАКЕ

Змий с раком живуще и дружбу с собою сотворше. И убо рак прост сый нравом, пременити моляся змию лукавство. Змей же никако же приимаше сего словес и упоминания[647].[648]